Dios munaśhanmannuy cawsapäcuy
4
Chalapacü-masïcuna,
amcunaćhu cayal,
Diospa śhunꞌunpänuy imanuy cawsaytapis yaćhachipäculacmi.
Chaynümá cawsayalcanqui.
Cananñatacmi Jesusninchic-laycu ruygaculcac masta-masta lulanayquipälä.
2 Yaćhapäcunquiñamari Jesusninchicpa pudirnin caynïwan imacta yaćhachipäcuśhactapis.
3 Chayćhu ¿manachun “Mana juchacullal,
mana pulinacullal cawsananchictam Diosninchic munan” nil niyalcac?
4 Chaynu captinꞌa,
aychayquita sumä allinta sujitaculcay;
5 manamá Diosta nï lisïcunänu munaśhanpa aysachicuyalcäśhancänüchu cayalcanqui.
6 Yanꞌal-lätac jucnin-jucnin nuna-masiquip masanninwan cayal casädu pirdichï capäcunquiman.
Nipäcuśhac-yupaypis chaynu nunactá Diosninchicmi chayman tincüta mućhuycachinꞌa.
7 Diosninchicmari yaꞌanchictá “Amcunam nuná capäcunqui” nil aclamälanchic,
paynuy tuqui mana juchacul cawsanapä.
8 Cay yaćhachicuyta jamuyäcá manam nunallap yaćhachicuyllantachu jalutacuyan,
sinuꞌa paynu canapä Chuya Ispiritunta umäninchic Diosninchictam.
9 Ñatac cuyanacul yanapänaculcänayquipïtá,
manañam nipäcunac canchu.
Quiquin Diosninchicmari yaćhayta umälanchicña lluywanpis juc taytap chulinnülla cuyanacul yanapänacunanchicpä.
10 Rasunpa cay nishannüshi amcuna lulayalcanqui lluy Macedonia malcacunäćhu cä malca-masiquicunawanpis.
Ñatac,
chalapacü-masïcuna,
caypïpis mas sumä-sumä yanapänaculcänayquitalämi licaycuyta muná.
11 Chaynütac lulayniquita caćhaycul matayyacuycul ama puliyalcaychu.
Aśhwanpa lulaculcay yaćhachipäcuśhacnüpis mana mañapacuśhtin puliyalcänayquipä.
12 Jinaptiquićh mayanman mana uyshuycunayquipis canꞌañachu,
aśhwanpam Diosman mana chalapacü lluy nunacunäpis alawal tuquip licapäcuśhunqui.
Jesusninchicpa cutimuynin caynümi
13 Chalapacü-masïcuna,
wañucü chalapacü-masinchiccunapïta yaćhaycälinayquitam muná Diosman mana chalapacücunänuy,
wiñay simpri cawsayta mana alcäcunänuy “Manañaćh tincuycuśhäñachu imaypis” nil mana llaquiculcänayquipämari.
14 Jesusninchic wañüśhanpi śhalcamuśhanta ampis yaꞌapis yaćhanchicmi.
Chaymi Jesusninchicmanña chalapacuyal wañücunätäpis Diosninchic śhalcachimunanta chalapaculcá.
15 Cay nishäcunacá quiquin Jesusninchic niycamäśhanchicnümi.
Rasunpa,
Jesusninchic cutimulꞌa manam wañücunäta caćhayculchu yaꞌanchic cawsäcunätalä puntacta puśhacamäśhun.
16 Chaypun altu sïlupi puydï anjil ayalpämuptin,
Diospa curnitillan llamadalpämuptin,
quiquin Jesusninchicmi jiꞌalpamunꞌa.
Jinaptinmari wañüśha chalapacücunaca śhalcamunꞌa.
17 Jinamanmi yaꞌanchic cawsäcunätawan cuscacta Jesus juclla puśhacamäśhun altu pucutay jananćhu lluypis juntunacunapä.
Chayćhümi wiñay simpripä paywan cacuśhun.
18 Chaymi caycunacta umanchicćhu uywal llapanchicpis cunsuylanacuycunanchic.