Tesalonicaćhu cawsaśhanpïmi Pablo liman
2
1-2 Chalapacü-masïcuna,
amcunaman manaläpis ćhämul Filipos malcaćhuꞌa may supay-apachishaćh,
palapäcuśhaćh capäculá.
Masqui caynu imaña pasalcämaptinpis,
quiquin Diosninchicmi callpanchamäla mana manchalil paypïta willaycälinacpä.
Chaymi śhamuyní mana yanꞌalpächu cala.
3 Yaꞌacuná umá imactapis chalaśhanpïchu manamá śhapämulá,
nïtac juc licchä pinsaynïwanchu limapapäculac nïtac imapis julucuynïwanchu yaćhachipäculac.
4 Aśhwanpa quiquin Diosninchicmi “Allinñam cayalcanqui” nil allin willacuyta maquïman ćhulaycälimäla.
Yaꞌacuna manam nunacunap munayllanpächu lulayalcá sinuꞌa imacta śhunꞌunchicćhu pinsaśhanchictapis yaćhä Diosninchicpa munayninpänümi.
5 Yaćhapäcuśhayquinüpis yaꞌacuna shimi mishquichïnuꞌa imaypis manam alawapäculacchu nïtac imayquitapis juluylläwanchu jinapäculá.
Caycunapïta quiquin Diosninchicmi tuquicta yaćhayan.
6 Nïtac amcunaćhu nï juccunaćhu allinpa licachiculcänäpächu,
sirbichiculcänäpächu śhapämulá.
Aw,
rasunpa Jesuspa puydï caćhancuna cayalcalꞌa chaynu ćhasquinamá capäcú.
7 Ñatac chay lulaytá manam uchucllapis pinsalcälilächu.
Aśhwanpa sumä cuyalmi tayta mamanu amcunacta cuyaywan ishpiycälichilac.
8 Amcuna manam yaćhapäcunquichu maynu cuyapäcuśhactapis.
Munayní manam willaycuyllachu,
aśhta bïdätapis amcunapi upäcümanmi cala.
9 Chalapacü-masïcuna,
rasunpa yalpapäcunquim amcunaćhu Diospi willayal mantiniculcänäpä mana piñachiynïwan tutay-muyun maynu-maynu lulapaculcäśhätapis.
10 Ñatac amcunapis ñawiquiwanmi licapäculanqui,
Tayta Diosninchicpis yaćhanmi amcunaćhu allin lulayniyu capäcuśhäta,
tuqui śhunꞌüwan licaycälishacta,
jinaman pipis nï limamänan capäcuśhätapis.
11 Chaynütacmi callpanchäcänuy,
jucniqui-jucniquita cunsuylaycälilac,
juc tayta chulinta licaycücä-yupaypis.
12 Chaymi Diosninchicpa gubirnunćhu wiñay simpripä sumä alli-alli rïnanayquipä aclacuśhan capäcuśhayquita yaćhal,
yaꞌacuna ćhuncay-ćhuncay limapaycälilac paypa tincüninmannuy cawsapäcunayquipä.
13 Ñatac chayćhu Jesuspi willaptí ¿manachun “Cay willamäśhanchicꞌa rasunpa Diospïtam uyaliyanchic;
manam nunap yaćhachicuyllantachu” nil cushisha ćhasquipäculanqui?
Cay nipäcuśhayquipïtam imaypis Diosninchicta anradisicú.
Rasunpa cay willaśhäca quiquin Diospi yalamümari.
Cay willacuyninta ćhasquiculcäśhayquipam quiquin Diosninchic amcunap bïdayquita allinman ticlayächin.
14 Chalapacü-masïcuna,
Judea malcacunaćhüpis Jesusman chalapacücunäwan pasaśhancänümi amcunacta malca-masiquicuna ñacachipäcuśhulanqui.
15 Chay Israelcunämi Diospa unay willacünincunactapis wañülächila,
jinamanꞌa Duyñunchic Jesustapis.
Chaypïtá yaꞌacunactapis alüläliman.
Paycuna manamá Diospa śhunꞌunpächu cawsayalcan;
lluy nunacunap cuntrantacmá cayalcanpis.
16 Chaynütac mana-Israelcunaca salbaculcänanpä allin willacuyta willäcunäpi mićhacamäśhanwanꞌa mas-mas juchactalämi tawacuyan maquinman juntachicucä-yupaypis.
Chaymi Diospa lluy piñacuynin ćhämuptinꞌa cay lulaśhancunapi sigüruña cunca cuchuynin canꞌa.
Chalapacücunäta licaycuypïmi wañupacun
17 Ñatac amcunawan chalapacü-masïcuna,
mana tinculpis śhunꞌüćhümi imaypis caycälilanqui.
Chaymi watucüniqui śhamuypi wañupaculá.
18 Jinalmi japallá achca cuti yalaćhacamuptïpis imaymana sasachacuycunacta supayca ćhulamuptin mana atipamulächu.
19 Chayurá ¿mayantá cushichimäní,
śhunꞌüta altuman juluycüca?
Amcuna yaꞌawan cusca Jesusninchicpa cutimuyninćhu cäcunämari.
20 Aw,
amcunapïtamari sumä cushisha cayalcá.