2-3 Diosninchicta imaypis mañacuśhäćhu Jesusninchicman masïsu chalapacul cuyaywan allincunäta lulal tacyaycälishayquitapis yaćhapäcümi.

Chaynütacmi paypa cutimuyninta licat-licatllaña alcayalcäśhayquitapis yalpalmi Taytanchicta anradisicú.

4 Quiquin Diosninchicpa cuyaśhan chalapacü-masïcuna,

aclapäcuśhulanqui nunan capäcunayquipämá.

5 Caynu caśhanta tantiapäcú allin willacuyca amcunaman imanuypa ćhämuśhanpamá:

manam nunacunallap limayllanmannüchu,

sinuꞌa munaywanmi,

Chuya Ispirituwanmi,

jinaman rasuncäwanmari.

Yaćhapäcunquitacmá amcunap allinniquipä sumä cawsapäcuśhätapis.

6 Chaymi yaꞌacunacta lical amcunapis rasunpa atichipämäśhayquiwanꞌa Duyñunchictapis atichipäculanqui.

Masqui imaña pasapäcuśhuptiquipis,

Chuya Ispiritu sumä cushicuyta uycälishulanqui ćhasquipäcuśhayqui-pachapïtam.

7 Caynu capäcuśhayquita licalmi Macedonia,

Acaya-läducunaćhu chalapacücunäpis atichipäcuśhulanqui.

8 Cay lulayniquiwan rasunpa amcuna Jesuspïta willaśhäcäta manam Macedoniaman Acayallamanchu sinuꞌa juc malcacunamanpis milachipäculanquim.

Chaymi Jesusman chalapaculcäśhallayqui intirućhüpis lluy muyuyan.

Chaynu cayaptin yaꞌacuna ¿imactam nipäcuśhä?

Manam imapis nipäcuná canñachu.

9-10 Lluy nunapis imanuypa ćhasquiycälimäśhayquitapis:

“Taytachancunactapis alawayta caćhayculmi rasunpa cawsä Diosta ćhasquïlälin.

Chulin cutimuynintapis jawcamá alcaycälin” niyanmá.

Aw-ari,

wañuycäpi Chulin Jesus śhalcamulmi wiñay simpri ñacaycäpi julaycamäśhun.