Puydï caćhancuna ipa-ipanninćhümi licaycuśha
4
Chayurá yaꞌacunacta licapämanquiman Jesuspa sirbïllanpämi,
jinaman Dios pacalächishan camalaycachishanta cuydaycüllanpämi.
2 Má,
imactapis licaycü nunaca chalapacunä caśhantamá camalaycachinan.
3 Yaꞌactañatacmi imapis mana ancha ucamanchu amcuna nï quija arrinläcuna ashipal yaćhapaycälimänanpis.
¡Manamá nï quiquïpis licacuycüchu!
4 Masqui śhunꞌüćhu allin caycuśhäta yaćhaculpis,
chaypächu manam juchannäña licaycuśha caśhä.
Quiquin Jesusmari licaycamäcá.
5 Chayurá cäraycuyta ama-ari puntacuyalcaychu;
Jesus cutimunancama alcaycäliy.
Paymi tutapäcäćhu pacaläcäta acchïman juluycunꞌa,
chaynütac imanuy śhunꞌuyu capäcuśhantapis lluy camalaycachinꞌa.
Chayćhüćha lulayninman tincüta-cama Tayta Diospa alawayninta ćhasquipäcunꞌa.
6 Chalapacü-masïcuna,
Apolospïtapis,
yaꞌapïtapis tincuchiypa niycälic amcunap allinniquipämi.
Isquirbishacta tuquicta yaćhayculꞌa manaćhá chaynu quiquiqui-pula alawanacuyalcanquimanchu waquinniquicunap mana allinniquipä.
7 Chaynütac ¿imayquiwantan mas puydï allinnu cacuyanqui?
¿Imallayquiꞌa Diosninchic mana uycuśhuśhayqui cayantan?
Lluypis paypa uycuśhuśhayqui cayaptinꞌa ¿imapïtan-nila nunatucüśha alawacuyanquiman,
quiquillayqui licalichicamuśhacta-yupaylä canpis?
8 ¡Lluy munaśhayquitañamá uywacuyalcanqui!
¡Maynu cäniyü-camañamá cacuyalcanqui!
¡Yaꞌacunacta ipanchaycälimal aśhta puydï mandacücunamanñamá muyülälinquipis!
Rasunpa puydï mandacüña cayalcaptiquiꞌa allinćha canman;
yaꞌacunapis amcunawan cusca mandacüña caycälïmanćha.
9 Yaꞌapïtá,
Diosninchic yaꞌa puydï caćhancunacta ćhulaycäliman wañuypa unanchaycuśha-yupaytanu jamuyäśha ipa-ipamanmi.
Chaymi cay pachäpäpis,
anjilcunapäpis,
llapa nunacunapäpis,
yaꞌacunawan ima pasaśhantapis licaculcänanpä cayalcá.
10 Canan Jesusninchicpa janan yaꞌacuna pasaypi mana tantiayniyu luclumá cacuyalcá.
Amcunañatacmi ichá Jesusninchicćhu ¡maynu sumä yaćhayniyu cacuyalcanqui!
Yaꞌacunañatacmi mana callpayu cacuyalcá;
amcunañatacmi ichá callpa-sapa-camalä canpis.
Amcuná alawäśhalämi;
yaꞌacunactañatacmi ichá jamuyäśha.
11 Canancamapis micuypi,
yacupi,
müdanacunapïpis,
aśhta supay-apachishacunam cayalcá.
Manamá wasilläcunapis canchu.
12 Chaynütacmi wañuy-wañuy pishipäśha maquïwan lulapäculcá.
Nunacunaca palapämaptinpis allinwanmi cutiycälichí.
Ñacalcächimaptinpis awantayalcälämi.
13 Chaynütac tumpapämaptinpis tuquillapmi limapaycälí.
Canancamapis cay pachäćhu nunacunaca mana imapäpis bälïpämi,
wicapäśha canapä amu-yupaytamari licapäman.
14 Caycunacta isquirbimuc manam pinꞌacachipäcunacpächu,
aśhwanpam cuyay chulïtanuy anyaycälic.
15 Masqui ćhunca walanganpi Jesusninchicćhu licaycüniquicuna cayaptinpis,
taytayquinuꞌa manamá achcachu.
Salbacü Jesusninchicpi wamäta willaycäliptí chalapaculcäśhayquiwanmi taytayqui-yupayman yaꞌa muyülú.
16 Chaymi ruygaycälic yaꞌa cawsaśhämannuy atichipämänayquipä.
17 Chaymi amcunaman masïsu chalapacü cuyay chulïnuy Timoteocta caćhayämú.
Paymi yalpachipäcuśhunqui intiru malcaćhu yaćhachishätanülla sumäpa cawsaycuśhätapis.
18 Ñatac waquinniquicunam sumä nunatucüśha cayalcanqui “Manañaćh Pablo śhamunꞌachu watucüninchic” nil.
19 Ñatac Tayta Diosninchic munaptinꞌa wala śhalunllapis watucüniqui śhamuśhämi.
Chayćhümi limaycaćhaśhanmannuy rasunpa lulaynin caśhantapis sumäta licaycuśhä.
20 Diosninchicpa mandacuyninćhu cawsay manamari limayllachu,
aśhwanpa lulaycuyta atipaymi.
21 Amcunaman licä śhamul ¿imanuy śhamunätatan munapäcunqui?
¿Asutiwan camacaycälinactachun icha cuyacuywan llampu śhunꞌuyu watucaycälinactachun?