Mana allin lulä chalapacücäta cäraycul alüläliy
5
Amcunaćhüshi jucniqui märaśhtanwan mansibacüśha cayan.
¡¿Ima cätatan lulayalcanqui?!
¡Diosninchicta mana lisï nunacunaćhüpis manam caynu mansibacuy canchu!
2 Chaycunapi sumä pinꞌacüśha uyshuycaćhayalcänayquitá,
¡aśhwanpam yaćhätucuśhalä alawacuyalcäñanquiña canpis!
Caynu mansibädu nunactá amcunapi alülälinquimanmi.
3 Ñatac amcunawan mana cusca cayalpis,
śhunꞌú amcunawan cuscam cayan.
Chaymi amcunaćhu cayä-yupay Jesusninchicpa pudirnin caynïwan chay jucha luläcäta cäraycülüña.
4-5 Chayurá Jesusninchicpa pudirninnuy munayninćhu juntunaculcaptiqui,
jinaman yaꞌapis amcunaćhu śhunꞌüwan cayaptí,
chay nunacta Satanaśhpa munayninman jitaycäläliy,
chayćhu aychan ñacayćhu wañunancama pasananpä.
Almantam ichá Jesusninchic cutimul salbaycunꞌa.
6 Chayurá amcuna manamá caycunapïlä alawacuyalcänayquichu.
¿Manachun tantianqui:
“Ash libadürallam punquichicüllan achca arinacta” nil limayllactapis?
7 Chaymi chay unay libadüranuypis mana allinćhu cäcunäta wicapälälinayqui.
Jinalmi mana libadürayu muśhü arina-yupay allinpa licaśhaña capäcunqui.
Chaynu allinpäña licaśha capäcunayquipämi Mana Libadürayu Tanta Fistaćhu uwish wañuchisha cäcänüpis Salbacüninchic Jesus wañuchisha cala.
8 Chaynu yaꞌanchic-laycu wañuyaptinꞌa,
cushishaña fistachacuśhun.
Amañari libadürayu tantäta micuśhtinchu;
chayꞌa mana allincäćhu juchaćhu cawsayllam.
Aśhwanpa micuśhun libadürannä tantäta;
chayꞌa allincällacta pinsaśhtin rasuncäta limaśhtin cawsaymi.
9 Chaynütacmi punta cartaćhu nipäculacña mansibäducunäwan mana cusca capäcunayquipä.
10 Caywan manam nipäculacchu cay pachäćhu llapa jucha-sapa mansibäducunapïta,
lägacunapïta,
suwacunapïta,
taytachacunamana chalapacücunapïtapis japächaculcänayquipächu.
Jinapäcunayquipá cay pachäpïćha yalapäcunquiman.
11 Aśhwanpam mana jucllachanaculcanquimanchu:
“Yaꞌa chalapacü-masiquim cayá” nil mansibäducunäwan,
lägacunäwan,
taytachacunaman chalapacücunäwan,
waśha limäcunäwan,
shincacunäwan,
suwacunäwanpis.
Caynu nunacunäwan amam cusca micapäcunquipischu.
12-13 Ñatac mana chalapacücunäta cäraycunäpächu yaꞌa manam cayá.
Paycunactá quiquin Diosmi cäraycunꞌa.
Amcunañatacmi ichá chalapacü-masiquicunacta cäraycälinayquipä cayalcanqui.
Chayurá “chay jucha-sapäta alüläliy-ari”b.