Puydï willacücunaca Tayta Diospa lulawshïnincunallam
3
Chalapacü-masïcuna,
paypa Ispiritunwan tantiayätanüchu manam limapaycälilac,
sinuꞌa nunacuna tantiaśhanmannuy,
chalapacuyta allaycü iñachacunactanümi.
2 Lichillactalä uycälilac manalä micuypa mana capäcuptiquim;
nïtac cananpis atipapäcunquimanlächu,
3 munayllayquićhülä cawsayalcalꞌa.
Chaynu quiquillayquipä wañupacuycuna,
iwinacuycuna amcunaćhu cayaptin ¿manachun lluy nunacunanüllalä cayalcanqui?
Caycuna ¿manachun lluy nunacunallap munayninmannuy cawsapäcuśhayquita camalachicun?
4 ¿Manachun waquinniquicuna:
“Yaꞌa Pablop atïninmi cayá” jucniquicunañatac:
“Yaꞌa Apolospam cayá” nil niyalcäśhayquiwan nunacunap munayninmannuy cawsayalcanqui?
5 Chaynu nipäcunayquipä ¿mayantá Pablo?
¿Mayantá Apolos?
Taytanchicman chalapacachishunayquipä uywaynin nunancunallamá;
Jesus unanchaycuśhan lulayta lulaycücunällamari.
6 Yaꞌam talpulá;
Apolosmi chächupälaa.
Ñatac quiquin Tayta Diosmi wiñaycachïcá.
7 Chayurá talpücäpis,
chächupacäpis manam imapischu capäcú,
sinuꞌa wiñaycachïcá Tayta Diosllanchicmá.
8 Talpücäwan chächücäpis chaycusca capäcú jucllapä lulapäcuśhäpam.
Lulaycälishäpïtañatacmi ichá Tayta Dios tincünïman uycälimänan cayan.
9 Chayurá Tayta Diospa lulawshï-masinmi capäcú;
amcunañatacmi Diosllanchicpa lulachishan ćhaclannuy,
jinaman wasi lulachishancänuy cayalcanqui.
10 Tayta Diosmi llaquipayninćhu chay wasićhu albañilpa ćhulaycamäla.
Chayćhümi sumä albañilnuy simintunta ćhulayculá.
Juccunañatacmi janäninman pilapäcun.
Ñatac imanuy lulaśhantapis sumä tuquictamá licacaycälinan.
11 Chay ćhuläśha cä simintu Salbacü Jesus cayaptinꞌa manañam juctá mayanpis ćhulanmanñachu.
12 Cay simintup janäninman mayanpis üruwan,
illaywan,
sumä ćhaniyu aläjacunawan,
ütac tablawan,
śhuꞌuśhwan,
päśhawanpis ishpichinmanmi.
13 Ñatac imawan lulaśha caśhanpis cäraycunan muyuncäćhümi lluy camalacunꞌa.
Chayćhümi ninawan-yupaypis imanuy lulaśha caśhanta lluy licaycuśha canꞌa.
14 Chaymi mayanpapis lulaynin,
tacyaycuptinꞌa tincüninman allinta ćhasquiycunꞌa.
15 Ñatac chay lulaynin lupäluptinꞌa yanꞌal pampapämi lulaynincuna canꞌa.
Quiquinmi ichá ninapïta ayïcänüpis salbacunꞌa.
16 Icha ¿manachun Tayta Diospa wasin capäcuśhayquita,
jinal paypa Ispiritun amcunaćhu yaćhaśhanta tantiapäcunqui,
imatá?
17 Mayanpis Diospa wasinta mana cäman muyuchïcätá,
paytapis mana cämantacmi muyuchinꞌa.
Tayta Diospa unanchaycuśha wasin payllapämá;
chay wasi amcunam capäcunqui.
18 Ama mayanpis ingañacuyächunchu:
mayanniquipis cay pachäćhu yaćhaycunallawan yaćhätuculꞌa,
rasunpa sumä yaćhayniyu cananpá pasaypi mana yaćhayniyünuy caycuchun.
19 Cay pachäćhu yaćhaycunaca Tayta Diospá luclu-caymi.
Isquirbishanćhüpis niyanmi:
“Chay yaćhätucücunätá quiquinpa yaćhätucuyllanćhümi Tayta Dios pantächin”b nil.
20 Chaynütacmi niyan:
“Tayta Dios lisinmi llapa yaćhätucücunäpa tantiaynincunacta;
yanꞌalpä caśhantapis yaćhantacmi”c nil.
21 Chaymi mana mayanniquipis nunatucüśha “Paypa atïninmi cayá” nil cayalcänayquichu.
Rasunpa,
lluypis amcunapmi:
22 masqui Pablopis,
Apolospis,
Pedropis,
cay pachäpis,
cawsaycäpis,
wañuycäpis,
canan timpupis,
śhamü timpucunäpis,
lluy ima cäcunäpis.
23 Amcunañatacmari Jesuspa capäcunqui,
Jesusñatacmá Tayta Diospa.