Bawtisä Juanmi chunyäcäćhu
3
Chay timpum Judeap chunyäninman Bawtisä Juan ćhämula caynüta willacuśhtin:
2 “Diosninchicpa gubirnunćhu canapä timpu jananchicćhüñamari cayan.
¡Chayurá juchayquipi wanaculcul payman cutipämuy!”
nil.
3 Paypïmi Diospa unay willacünin Isaias isquirbishanćhu niyan:
“Chunyäninćhu ayaycaćhäcäta uyalipäcuy:
‘Taytanchic ćhämunanpä sumäta allichaculcay.
Ñatac paypa pulinanta tuquicta lulapäcuy’a ” nil.
4 Chay Bawtisä Juanꞌa camïllu uywap millwanpïta luläśha müdanawanmi müdacula;
utapi luläśha waćhacuwanmi ćhulaculapis.
Langusta culucunallacta urunwaycunap mishquincunallactam miculapis.
5 Chay caśhancämanmi achca nunacuna limaśhanta uyalï śhapämula intirupïta:
Jerusalenpïta,
jinantin Judeap malcancunapïtapis,
aśhta Jordan mayup lädunćhu lluy malcacunapïtapis.
6 Chayćhu juchancunacta lluy willapacücunätam chay Jordan mayućhu bawtisala.
7 Chayman achca fariseo caśhtacuna,
saduseo caśhtacuna bawtisachicü śhapämuptinmi Juan nila:
“¡Pasaypi culibray caśhtacuna!
¿pitá nishulanqui ‘¡Diospa castigun janayquićhüñam cayan ayicunayquipä!’
nil?
8 Juchayquicunapi wanaculcäśhayquitari camalachipäcuy.
9 ‘Abrahampa ayllun caynïwanmi Diosninchicpa allinña cá’ ¿niyanquichun,
imam?
Dios munalꞌa cay lumicunapïtapis Abrampa ayllunman muyuchinmanmi.
10 Cananꞌa jaćhacunäta sapipi cuchunanpá paypa ächan listuñam cayan.
Mana alli wayuyniyu jaćhactamari wicapalcachil cañanꞌa.
11 “Yaꞌa rasunpa juchayqui wanacücunätam yacullawan bawtisapäcuc.
Ipäta śhamücämi ichá yaꞌapïta mas munayniyu captin nï śhucuyninta apaycunalläpäpis cächu.
Paymari Chuya Ispirituwanpis ninawanpis bawtisapäcuśhunqui.
12 Ñatac trïgucta waywachï nunanümari payꞌa śhayämun,
lluy nunacunäta cäraycunanpämi.
Waywalcachilmi trïgucta pilwanman ćhulaycunꞌa;
amuntañatacmi wiñay simpri nina waläcäman jitaycunꞌa” nin.
Juanmi Jesusta bawtisan
13 Ñatac Jesusmi Galileapïta śhamula Juan bawtisaśhan Jordan mayüćhu bawtisachicunanpä.
14 Chayćhümi Juan mana munalachu “¿Imanuypatan bawtisacman aśhwanpa amlä bawtisamänayqui cayaptin?”
nil.
15 Niptinmi Jesus:
“Cananpá chaynu caycunan.
Dios mandamäśhanchicta lulaycunanchicmi cayan” nin.