3
Nipäcuptiquim sumä munayniyu Tayta Dios niyäśhunqui:
“Pulinäcäta allichananpämia juc willacünïta ñawpachimuśhä.
Jinaptinmi ashipäcuśhayqui Tayta Dios,
alawana wasinman unꞌaypi śhamunꞌa.
Limalicuyta willaycunanpä cäcä śhayämunñamá;
sumä alcaśhayqui willacüca śhayämunñamari” nil.
2 Awari,
pay śhamuptin ¿mayanmá awantaycunman?
Pay licalimuptin ¿mayanmá śhaycuycunman?b
Payꞌa anlacta yaluchï jabunnümá;
fundinapä ninanümá śhayämun.c
3 Pay illayta fundïcänümari taycuycunꞌa,
üructa chulluchïcänümád Levipa milaynincunacta juchancunapi chuyanchaycunꞌa.
Jinaptinmi uycunancunäta Tayta Dios munaśhanmannu tincüninman uycälinꞌa.
4 Jinaptinmi unay caśhannu,
punta watacunäćhünu Juda lädup,
Jerusalen malcap uycälishancunacta Tayta Dios cushisha ćhasquiycunꞌa.
5 Jinaman sumä munayniyu Tayta Diosmari nin:
“Amcunacta cäraycälinacpämi śhamuśhä.
Chay rüjacunäta,
mansibäducunäta,
yanꞌal limalicücunäta,
lulachiculcul mana pägäcunäta,
japanyäśhacunätawan mana taytayu-mamayücunäta ñacachïcunäta,
chaynütac mana Israel caśhtacunäta pasaypi mana allinpä licaycücunäta,
jinaman mana manchacamäcunätapis chayćhu juclla cäraycälinacpämari caycuśhä.
Ćhuncapïta jucta-cama uycunancäpïmi nin
6-7 “Amcuna awquilluyquicunapïtamá camachicuynïta juc läduman ćhulaycul mana cäsucalcämanquichu.
Yaꞌa Tayta Diosñatacmi ichá imam nishämannülla caycú.e
Chaymari Jacobpa am milaynincuna,
limalicuśhänuf camacaycüśhachu mana capäculanqui.
Yaꞌa sumä munayniyu Tayta Diosmi niyalcac:
‘Yaꞌaman cuticalcämuy;
yaꞌapis amcunamanmi cuticamuśhä’g nil.
Niptí amcunañatacmi:
‘¿Imanuypam cutipämuśhä?’
niyalcanqui.
8 Má,
¿mayanpamá cäran canman Tayta Diosta suwayänanpä?
Awari,
amcunamá suwayalcämanqui.
Jinaman nipäcunquilämi canpis:
‘Imactam suwayalcac’ nil.
Uycunayquicunaćhu,
ćhuncapi jucta-cama apamuyćhümari.
9 Awari,
amcunamá llapayqui suwayalcämanqui.
Chayurá lluy malcantinmanmá sumä mana allinca ćhälälishunqui.
10 Micuy mana pishinanpä ćhuncapi jucta-cama lluy-lluy uycunayquicunapïtari alawana wasïman apapämuy.
Chayćha wasïćhu micuy cacunꞌa.
Má licaycamayꞌari,
¿manachun sïlüpa bintanancunacta quićhaycul alli-allicta uycälishayqui,
ćhasquiyta mana atipapäcunayquicama imatá?h
Sumä munayniyu yaꞌa Tayta Diosmari niyá.
11 Chay talpuyniquicuna,
üba lantayquicuna camacaycüśha mana cananpämari camacaycü culucunäta alapacüśhä.
Sumä munayniyu yaꞌa Tayta Diosmari niyá.
12 Chaynu malcayquita Tayta Dios allinpä licaycuptinmari lluy nasyuncunaca munapapäcunꞌa.
Sumä munayniyu yaꞌa Tayta Diosmari niyá” nil.
13 Chaynütacmi Tayta Dios nin:
“Amcuna ‘nana-nanaypa cunträmi limayalcanqui’ nil nipäcunqui.
Jinaman nipäcunquilämi canpis:
‘¿Imactam cuntrayqui limayalcá?’
nil.
14 Chay nishayquiwanmari:
‘Yanꞌal-yanꞌalmi Tayta Diosta sirbinchic.
¿Imactam julucunchic camachicuyninta cäsucul,
jinaman sumä munayniyu Tayta Diospa ñawpäninćhu llaquisha cayal?’
nil cuntran niyalcanqui.
15 Jinaman niyalcanquilämi:
‘Nunatucüśha nunacunaca sumä cushishari cawsayalcan.
Mana allinta luläcunaca imapapis janallanćhuꞌari cayalcan.
Tayta Diosta mana cäsuculpis manamari ima mućhuchicuyllactapis ćhasquipäcunchu’ nil.i
Chaynu nilmari cuntran limayalcanqui” nil.
16 Chayćhu Tayta Diosta manchacü nunacunäñatacmi quiquin-pula callpanchanaculcäla.
Chayta Tayta Dios tuquicta uyaliyculmi ñawpäninćhu juc isquirbina cä pitwiläcäman asintaycachila,
payta cäsucücunaca,
paypa śhutinta altuman juluycücunaca yalpaśha capäcunanpä.j
Tayta Diospa limalicuśhancäpïmi nin
17 Sumä munayniyu Tayta Diosmi nin:
“Lluyta cäraycuná muyuncäćhümari paycunacta ama-pacha niycuśhä.
Maynümi juc tayta sirbïnin chulinta llaquipaycun,
chaynümi paycunacta llaquipaycuśhä.k
18 Chayćhümi mayancuna allin luläcuna ütac mana allin luläcuna caśhantapis yapa tantiaycälinqui.
Chaynütac Tayta Diosta mayan sirbïcuna ütac mana sirbïcuna caśhantapis tantiaycälinqui” nil.