2
“Má,
sasirdüticuna amcunapämi cay camachicuy:
2 Amcuna mana cäsucalcämaptiquiꞌa,
śhutïtapis altuman mana julaycälimaptiquiꞌa mućhuycachishayquimá,
jinaman allinpä licaycuśhactapis pasaypi mana allinmanmari muyüchishä.
Awari,
śhutïta altuman mana julaycälimaptiquimá pasaypi mana allinpäña licayalcac.
Sumä munayniyu yaꞌa Tayta Diosmari niyá.
3 “Chaymi milayniquicunactapis yaꞌa mućhuycachishä.
Uywa uycamäśhayquicunap acancunactamá cärayquicunaman lawaycüśhä.
Jinaptïmi ¡chay acacunäwan cusca amcunapis wicapäśha capäcunqui!
4 Chaynüpamá cay camachicuy uycuśhäta tantiapäcunqui.
Cäsucalcämaptiquiꞌa Levia aylluman limalicuśhänümari imaypis caycunꞌa.
Sumä munayniyu yaꞌa Tayta Diosmari niyá” nil.
5 “Leviman limaliculá allin cawsaytawan jawca cayta uycunäpämari.b
Payñatac cäsucul manchacuywan licaycamänanpämari.
Awari,
pay manchacuywan licaycamal śhutïta altumanmi julaycamäla.
6 Pay camachicuy nishanmannüllamá yaćhachila;
ima mana allinllapis shiminćhu manamá cayculachu.
Munaśhämannümi tincüllanman,
allinlla cawsaycul,
jucha lulaypi achca nunacta japächaycachila.c
7 Sasirdütica sumä munayniyu Tayta Diospa willacünincuna captinmari paycunap shiminćhuꞌa yaćhaycälla timpuycunan.
Chaymi nunacunaca paypa shiminćhu yaćhaycäta ashiycälinan.d
8 “Am sasirdüticunäñatacmi ichá allincäpïta japächaculcul mana allincunacta yaćhachiyniquiwan achca nunacunacta mana allincäman palpälächinqui.
Chaynüpamari Leviman limalicuśhäta mana caśhanman muyülächinqui.
Sumä munayniyu yaꞌa Tayta Diosmari niyá.
9 Chaynu camachishäta mana cäsucamal waquincunacta śhalcuśhayquiwanmá camachicuynïpi japächacälälinqui.
Chaymari lluy nunap ćhïnishaman,
uyshulächishaman muyüchishayqui” nil.
Juda lädu ipanchaśhanpïtam nin
10 Canan má,
¿manachun lluypapis jucllaylla Taytanchic imamá?
¿Manachun Tayta Dioslla lluytapis camamälanchic imatá?e
Chayurá ¿imapïmá quiquinchic-pula ipanchanacuśhanchicwan awquillunchiccunaman Tayta Dios limalicuśhanta jalutacuyanchic?
11 Judamari ipanchälun;
Israelćhu,
Jerusalenćhüpis millachicuytamá lulälälin.
Juda läducunaca juc lädu malcacunap taytachanta alawä wamlacunawan casaracälälishanwanmari,
Tayta Dios ama-pacha nishan alawana wasinta anlaman muyülälichin.
12 Chaynu luläcunäta Jacob ayllupïtari Tayta Dios wicapächun;
masqui mayan cacuptinpis ütac sumä munayniyu Tayta Diosman uycunancäta uycuyaptinpis wicapächunꞌari.
13 Jinaman amcuna Tayta Diospa uycuna patacninman uycunayquicunacta uycäliptiquipis,
pay manañamá licalcunchu nï ćhasquipäcuśhunquichu.
Jinaptinmi llaqui-llaquicta waꞌayalcanqui wiꞌiniquicuna uycuna patacman ućhalänancama.
14 Chayćhu nipäcunquilämi canpis:
“¿Imapïñamá mana ćhasquimanchu?”
nil.
Müsu cayniquićhu casaracuśhayqui walmiquita ipanchaśhayquitamari Tayta Dios licayan.
Payllawan cawsanayquipä limalicuyalpis,
masqui chalapacuna masanniqui,
rasun walmiqui cayaptinpis ipanchälunquimá.
15 ¿Manachun ishcaynin juc aychayünülla,
juc ispirituyülla cananpä Tayta Dios lulaycula imamá?
¿Imapïmi chaynüta lulaycula?
Tayta Diosllapäña lluy milaynincuna cananpämari.
Chayurá śhunꞌuyquita licacuyculꞌari,
müsu cayniquićhu cuscaśhayqui walmiquita ama ipanchayaychu.
16 Israelpa sumä munayniyu Tayta Diosninmi nin:
“Masanniquipi laquinacuśhayquica millachicuy jucha captinmi yaꞌa ćhïnicú.
Chayurá śhunꞌuyquita licacuyculꞌari,
ama ipanchayaychu” nil.f
17 Má,
amcuna limay-limay cayalcalmá Tayta Diosta amïlälichinquiña.
Jinaman nipäcunquilämi canpis:
“¿Imapïmi uyaliyta pishipälun?”
nil.
Awari,
pishipälächinqui caynu niyalcäśhayquiwanmá:
“Mana allin luläcunaca Tayta Diospa śhunꞌunpänümá cayalcan;
paycunapi pay cushicunmi” nil.
Jinaman jamuyapäcunquilämi canpis:
“¿Mayćhütan tincüllanman licaycü Tayta Dios cayan?”
nil.g