2 Tayta Diosmi nin:

“Amcunacta ama-pacha nipäcucmi.

“Niptïmi amcuna:

‘¿Imaytá ama-pacha nipämalanqui?’

nipäcunquilä canpis.

“Chaymi yaꞌa Tayta Dios ní:

¿Manachun awquilluyqui Jacobpa wawꞌi-caśhan Esau cala imamá?

Chaynu captinpis Jacobtam cuyalá.

3 Esautañatacmi^a ichá ćhïnilá.

Chaymari Esaupa ulꞌuncunacta mana cäman muyüchilá;

tücänincunactapis munti uywacuna yaćhananmanña licalïchilá” nil.

4 Jinaptinmi Esaupa milaynin Edom^b läducunaca nipäcun:

“Pasaypi mana cäman muyüchimaptinchicpis caśhanmá śhalcachishun” nil.

Chaynu nipäcuptinpis sumä munayniyu Tayta Diosmi nin:

“Caśhan śhalcachipäcuptinpis yaꞌañatacmi pampaman yapa muyüchishä.

Chaymi ‘Mana allin nunacunap malcan’ nisha canꞌa;

jinaman ‘Tayta Diospa piñacuyninćhu imaypis cayá malca’ nishamari canꞌapis.^c

5 Chayta am israelcunaca ñawiquiwan licapäculmi nipäcunqui:

‘Tayta Diosꞌa altuman juluycuśham cayan,

culindanchicpïtapis mas calucunaćhülä’ ” nil.

6 Sumä munayniyu Tayta Diosmi am sasirdüticunäta nishunqui:

“Chulincuna taytanta altumanmi juluycälin.

Uyway nunacunäpis patrunninta manchacunmi.

Chayurá yaꞌa Taytayqui cayaptí,

¿imapïmi altuman mana julaycapämanquichu?

Yaꞌa duyñuyqui cayaptí,

¿imapïmi mana cäsucalcämanquichu?

Amcuna jalutacayalcämalpis nipäcunquilämi canpis:

‘¿Imaćhütá jalutacuyalcac?’

nil.

7 Amcuna uycuna patacnïman anla micuycunacta apayalcämulpis:^d

‘¿Imaćhütan millachicuyman muyuyalcächí?’

nipäcunquilämi canpis.

Yaꞌapa uycuna patacnïta pasaypi mana bälïpä licapäcuśhayquiwanmari.

8 Chaynu aplannin uywacta uycamäśhayquica,

¿manachun mana allin imamá?

Wishtu,

ishyayä^e uywacta uycamäśhayquica,

¿allinchun imatá?

Má,

chaynüta ¿imapïtá puydïniquiman mana uycunquichu?

Payꞌa ¿cushishachun ćhasquiycuśhunqui imatá?

Sumä munayniyu yaꞌa Tayta Diosmari niyá.

9 “Chaynu lulayalcäśhayquiwanꞌa,

¿imanuypamá śhunꞌunpänu caycälinquiman?

Canan,

llaquipaycälinacpä yaꞌa Tayta Diostari mañacalcämay.

Sumä munayniyu yaꞌa Tayta Diosmi niyá.

10 ¡Maynu allinlä canman alawana wasïpa puncunta pillapis wićhäluptin!

Chayćha uycuna patacnïćhu yanꞌal manaña latayalcächinmanchu.

Amcuna manañamari śhunꞌüpächu capäcunqui;

ima apapämuśhayquicunactapis manañamá ćhasquiycälishayquiñachu.

Sumä munayniyu yaꞌa Tayta Diosmari niyá.^f

11 Lluy nasyuncunäćhümari intica yalamuśhanpi aśhta jiꞌalpunancama śhutïta altuman julaycäliman.

Mayćhüñapis insinsiuctawan chuya micuycunactamá uycäliman.

Jinantin nasyuncunäćhümari śhutïta altuman julaycäliman.

Sumä munayniyu yaꞌa Tayta Diosmari niyá.

12 “Amcunañatacmi ichá jalutacuyalcanqui:

‘Tayta Diospa uycuna patacnin anlam;

micuyninpis millachicuymi’ nil licapäcuśhayquiwan.

13 Chaynütacmi jalutacayalcämanqui:

‘Caycuna may lulacuyñaćh’ nil licapäcuśhayquiwan.

Chay ¿uycapämänayquipä suwäśha,

wishtu,

ishyayä cä apapämuśhayquita,

yaꞌa ćhasquiycälishayquichun imatá?

Sumä munayniyu yaꞌa Tayta Diosmari niyá.

14 “Mayanpis allin ulu uwishninta uycunanpä limalicuyalpis,

mana bälïninta yaꞌa Tayta Diosman cañaywan uycamäcätá,

yaꞌapis mana bälïpämi licaśhä.

Sumä mandacücämari yaꞌa cayá.

Jinantin nasyuncunäćhüpis yaꞌapa śhutí manchaymi cayan.

Sumä munayniyu yaꞌa Tayta Diosmari niyá.