5
Jerusalen malca,
muyülïniquiman
pilyäniquicunactari ćhulaycuy.
Muyülïniquićhüñamá cunćhaläcayalcämun.
Israelpa puydïnintamari cäraćhu sumä ćhächinꞌa.
Mandacücäta Israelman caćhamunanpämi nin
2 Ñatac am Efrata nishan Belen,a
Judapa malcancunaćhu uchuyllanmá canqui.
Chaynu captiquipis ampïtamá
Israelpa puydïnin yalamunꞌa.
Payꞌa una-unaypïñamá cayan.
3 Ñatac patayu walmica waćhacunancamalämi
Israelta ćhïnicüninpa maquinman Tayta Dios caćhaycülunꞌa.
Ishyacüluptinñam chiꞌisha cä israelcunaca
malcanman cutipämunꞌa.
4 Chay iñachäñatacmi Tayta Diospa sumä cayninwan,
munayninwan śhalcul caminaycunꞌa.
Jinantin pachäćhu payllaña Tayta
captinmari jawcallaña cawsapäcunꞌa.
5 Paymari jawcayayta apaycamunꞌa.
Malcanchicman Asiria lädu yaycamuptin,
palasyunchiccunacta jalutacuptin,
anćhish michïcunactawan
pusä alli-cama puydïcunactamari caćhaśhun.
6 Paycunamá ispädanwan Asiria läducunäta maquinćhu cachinꞌa,
awari,
Nimrodpab malcantamari.
Malcanchicman Asiria lädu yaycaycamul
allpanchicta chalacuycuyta munaptinꞌa
chay jawcayayta apaycamücämi libraycamäśhun.
7 Chayurá Jacobpa milaynincunapïta puchücunaca
jinantin malcacunäćhümi capäcunꞌa.
Awari,
Tayta Dios śhullicta ulaman śhullipächimuśhancänu
ütac tamyacta tamyachimuśhancänümari paycuna caycälinꞌa.
Paycuna manañamari nunacunällapïchu capäcunꞌa,
sinuꞌa Tayta Diospïñamá.
8 Jacobpa milaynin quïdäcunämi
jinantin nasyuncunäćhu munti uywacunap
ćhawpinćhu cä liyunnülä capäcunꞌa;
uwishcunap ćhawpinćhu liyuncänülämari capäcunꞌa.
Chalälulꞌa ticshiy pawälunꞌamá;
paypïta manamá imapis ayinꞌachu.
9 Israel lluy ćhïnicünincunactamá camacaycülunꞌa;
lluy cuntran cäcunämá pampaman muyüchisha canꞌa.
10 Ñatac Tayta Diosmi nin:
“Chay prïsu puśhaśhuśhayqui muyunćhümi
lluy cawalluyquicunacta camacaycüśhä;
gïrrapä carritayquicunactapis pampamanmi muyüchishä.
11 Malcayquicunacta camacaycüśhämá;
sumä murällayquicunactapis mana caśhanmanmá muyüchishä.
12 Lluy rüjayquicunactapis chincächishämá;
manañamá licacüniquicunapis canꞌañachu.
13 Lluy taytachayquicunacta,
alawanayquipä cä
śhaywa lumiquicunactapis pampamanmá muyüchishä.
Jinaptïmari lulacuśhayqui taytachayquicunacta
imaypis manaña alawapäcunquiñachu.
14 Mamachayqui Aseractamá amcunapïta wicapäśhä;
malcayquicunacta pampaman muyüchishactamá caćhaycüśhä.
15 Mana cäsucamäní nasyuncunäta,
sumä piñacuywanmá cutichicüśhä” nil.