alawana wasin caśhan ulꞌuca,

mas altunninman ćhulaycuśha canꞌa.

Altunnin ulꞌucunäpïpis mas altunninmanlämari juluycuśha canꞌa.

Chaymanmá may nasyunpïñapis alawä lipäcunꞌa.

2 May nasyunpïñapis śhapämulmari nipäcunꞌa:

“Acuchun,

Tayta Diospa ulꞌunman;

Jacobpa Tayta Diosninpa wasinman lishun.

Chayćhu caminuncunacta pay lisiycachimaptinchicmá

caminunćhu puliycuśhun” nil.

Awari,

Sionpïmi yaćhachicuyca yalaycamun;

Jerusalenpïmá Tayta Diospa limapäcuynin śhaycamun.^a

3 Quiquin Tayta Diosmá lluy nasyuncunacta tincüninman cäraycunꞌa.

Paymi calucunaćhu cä munayniyü-cama nasyuncunäpa ćhïninacuynincunactapis allichaycunꞌa.

Jinaptinmi ispädancunactapis arädup rïjanmanña muyülälichinꞌa;

lansancunactapis cüśhamanña muyülälichinꞌa.^b

Nasyun-pulapis manañamá pilyapäcunꞌañachu;

nïtac gïrrapäpis yaćhapaculcanꞌañachu.

4 Chaynu manaña manchacuy captinmá ïgus,

üba lantancunap llantuynincunaćhu jawcallaña jamapäcunꞌa.^c

Chaynu cananpä sumä munayniyu Tayta Diosmari niyan.

5 Masqui juc nasyuncunaca

taytachancunacta cäsuculcaptinpis,

yaꞌanchicꞌa quiquin Tayta Diosninchictamá

wiña-wiñaypä cäsucuśhun.

“Chay timpućhümi wishtüśha,

pintïsha uwishcunäta,

jinaman ñacachishá uwishcunätapis cutiycachimuśhä.

7 Wishtucunäwanmi quïdä malcäta śhalcachishä;

pintïshacunäwanmi sumä munayniyu

malcaman muyuycachishä.

Jinalculmi Sion ulꞌupi yaꞌa Tayta Dios

wiña-wiñaypä mandacünin caycuśhä.^d

8 Canan am,

uwishcunäta licanapä türrinu cä Jerusalen,

Pacacunapä sumä śhalcachisha cä am Sion,

punta caśhayquinümá munayniyu canqui;

mandacuyca am tuquish Jerusalenmanmi caśhan cutimunꞌa.

9 “Canan má,

Jerusalen ¿imapïtá apalcaćhayanqui?

¿Mana mandacüniyüñachun cayanqui imamá?

¿Mana limapäniyüñachun cayanqui imatá?

¿Imapïñamá waćhacü walmip dulurnintanu apayanqui?

10 Sionćhu yaćhäcuna,

nanaywan wiꞌwintaycaćhapäcuy;

waćhacuyä walminu apalcaćhapäcuy.

Jerusalen malcapïta yalulmari

ćhaclacunäćhüña yaćhapämunqui.

Babilonia calu nasyunman apaśha capäculpis

chaypi libraycuśhamari capäcunqui.

Chay ćhïnicüniquicunap maquinpïta

yaꞌa Tayta Diosmari julaycälishayqui” nil.

11 Cananꞌa ampa cuntrayqui achca-achca

nasyuncuna jucllachanacaycälilmi

ninaculcan:

“Sion pasaypi jalutacüśha caśhanta

cushishamari licapäśhun” nil.

12 Ñatac paycuna Tayta Dios ima pinsaśhantapis

manamá yaćhapäcunchu;

nï imacta lulay munaśhantapis musyapäcunchu.

Manatacmá ïraman trïgucta juntuycul wipyaśhannu camacaycünanpä caśhantapis tantiapäcunchu.

13 Tayta Diosmi nin:

“Am Sion ulꞌu,

śhalcuculcul

ïraćhu jalücänu chay nasyuncunäta jaluypa pawäluyꞌari.

Achca-achca nasyuncunacta camacaycünayquipä,

jïrru wälactawan brunsi shilluctamá uycuśhayqui.

Jinalculmi mana allin lulaywan talishan

cänincunacta waycämunqui.

Chay cänincunacta jinantin pachäpa

duyñun cä yaꞌa Tayta Diosllaman uycamänayquipä” nil.