Miqueas
Willacü Miqueas Isquirbishan
1
Moreset malcayu Miqueastam Tayta Dios suyñuyninćhünu licaycachin,
Samaria,
Jerusalen malcacunacta ima pasanantapis.
Chaynu licaycachila Juda lädućhu Jotam,a
Acaz,b
Ezequiasc mandacuśhan timpućhümari.
Samaria lädu mućhuycachisha cananpämi willacun
2 Miqueasmi nin:
“Lluy malcacuna uyalipämay.
Jinantin pacha,
lluy cänintin,
sumäta uyalipämay.
Jucha lulaśhayquicunapïta quiquin Tayta Diosninchicmá
chuya wasinpïta cuntrayqui niycälishunqui.
3 Licayꞌari,
yaćhaśhancäpi Tayta Dios yalayämunñamá.
Jiꞌalpaycamulmari altunnin ulꞌucunäćhu pulinꞌa.
4 Jinaptinmi ninaman sïracta ćhulaycuptin
chulluśhancänu,d
ulꞌucunaca chullupäcunꞌa.
Pampacunäpis sumä-sumä yacu liyaptin
quićhacacuśhancänümá quićhacacüśha quïdanꞌa.
5 Chaynu caycunꞌa Jacob cullu linli capäcuśhanpïtam,
Israel lädu juchaculcäśhanpïtamari.
¿Mayanmá Jacob mana allin lulaśhanpi juchayüca?
Samaria puydï malcanmari.
¿Mayćhümá taytachacunacta Juda läducuna alawapäcun?
Jerusalen puydï malcanćhümari” nil.
6 Chaymari Tayta Dios nin:
“Samariacta pasaypi pampamanmi muyüchishä;
üba talpuna ćhaclamanmi licalïchishä.
Lumincunacta pampacunämanmi cućhpaycüśhä;
simintuncunacta camalayätamá caćhaycüśhä.
7 Lluy taytachancuna pasaypi tamshäśhamá licalipäcunꞌa;
walmicuna waticacuyninwan gänapacuśhancuna cañaycüśhamá canꞌa.
Lluy taytachancunactamá camacaycüśhä.
Waticacuyninwan ćhasquishanca,
caśhanmi waticap illayninman muyuchisha canꞌa” nil.
8 Chaymi yaꞌa nilá:
“Sumä-sumämi waꞌaśhä,
apalcaćhaśhä;
cala ćhaquilla,
mana müdanayu calanllanmi pulishä.
Munti allꞌunümi awćhucuśhä;
tucunümi waꞌacuśhä.
9 Awari,
Samariap dañädun jampiyta mana atipanañamá cacuyan;
Juda läducamañamá milälun.
Malcá yaćhapäcuśhan quiquin Jerusalenpa
puncuncamañamá ćhälun.
10 Chayta amari ćhïnicüninchic Gat malcaman willaycuychu;
amari uchuyllapis waꞌapäcuychu.
Ñatac llaquicuyniquipi Bet-le-afrae nishanćhu upälla anćhaycaćhapäcuy.
11 Safirf lädućhu yaćhäcuna,
pinꞌacüśha calanllan ayipäcuy.
Zaananćhug yaćhäcunaca yalamuyta manamá atipapäcunchu.
Beteselćhuh cäcunaca waꞌapäcuptinpis
manamá mayan yanapaycünin canchu.
12 Marot lädućhu yaćhäcunämi mayanpis
yanapaycunanpä sumä-sumäta wañupacuyalcan.
Mana allincäta quiquin Jerusalenpa puncuncama
Tayta Diosmari ćhaycachin.
13 “Laquisi lädućhu yaćhäcuna,
päliyä cawalluyquicunaman carritayquita watapäcuy.
Amcunamá tuquish Sionpa jucha lulaynincunacta allaycapäculanqui.
Amcunamá Israel lädup juchancunacta atichipäculanqui.
14 Chayurá ćhïnicünincunap maquinmanña palpunanpä cacuyaptinmá
Moreset-gattaj ‘jamallá’ nil rigälucunacta uycunqui.
Aczibk malcap wasincuna juc trampanümá
Israel lädu mandacücunäpä cayalcan” nil.
15 Maresal lädućhu yaćhäcuna,
amcunamanmi
ćhïnicüniquicunacta caćhamuśhä duyñuchacaycälälishunayquipä.
Chaymi Israelpa sumä allinnincunapis
Adulam maćhayman ayipäcunꞌa.
16 Jerusalenćhu yaćhäcuna,
sumä cuyapäcuśhayqui
chuliquicunactamá calu-calu nasyunman puśhaculcanꞌa.
Chayurá śhaplayquicunacta cuchuculcay;
wisculnu siplay-siplay canayquipä ächayquicunactapis lutuculcay.