ulꞌuncunäćhu Basan wira wäcanu cä walmicuna,

wacchacunäta ñacachïcuna,

pishipacuyćhu cäcunäta usuchïcuna,

wayapayquicunacta ‘upyapäcunäpa apamuy’ nïcunäpis.

2 Chuya cä Tayta Diosmari limalicú:

‘Amcunapä sumä ñacay timpucunamá śhacayämun.

Challwap chalacuwannümá puśhaculcäśhunqui;

milayniquicunactapis challwa chalacü canaśhtawannümá apaculcanꞌa.

3 Murällap ućhcuncunapamá jucllap-jucllap yalupäcunqui.

Sumä sigüru cayniquipïmá Hermon läduman wicapäśha capäcunqui.

Yaꞌa Tayta Diosmari niyá’ nil.

Gilgalman^b lilcul juchacunacta jinalla lulapämuyꞌari.

Wälanpa muyun-muyun uycunayquicunacta apaycäliyꞌari.

Quimsa muyuncäćhu-camañatac cusichayquicunapi ćhuncapïta-cama jucta apaycäliyꞌari.

5 Sulpäta uycuyniquiwan mana libadürayu tantacta cusaycäliyꞌari.

Śhunꞌuyquipi yalamuśhan uycuśhayquicunacta willapaculcayꞌari.

Israelcuna,

chaynu lulaypïmá amcuna wañupaculcanqui.

Yaꞌa Tayta Diosmari niyá.

6 “Yaꞌami micuy wanayta malcayquicunaćhu pasachipäculac.

Lluy malcayquicunaćhu micuy manañamá taliculachu.

Chaynu captinpis manamá yaꞌaman cuticalcämulanquichu.

Yaꞌa Tayta Diosmari niyá.

7 “Quimsa quilla cusichapä faltayaptinmá

tamyactapis manalcächilá.

Waquin malcamanmi tamyachimulá,

parti malcacunamanñatacmi mana.

Partiman tamyayämuptinpis

mana tamyaśhancäñatacmi ichá pasaypi chaquïla.

8 Ishcay quimsa malcacunapïtamá

jucllay malcallaman yacu ashï śhapämula.

Ñatac yacunayninta manamá pasachipäculachu.

Chaycunawanpis manamá yaꞌaman cuticalcämulanquichu.

Yaꞌa Tayta Diosmari niyá.

9 “Inti yalamunan lädu waywawan,

jinaman puyu culucunawanmá lawćhaycapäculac.

Paćhcaśhcunämá wirtayquicunacta,

talpuyniquicunacta,

üba,

ulïbus,

ïgus lantayquicunacta camacaycüla.

Chaynu captinpis manamá yaꞌaman cuticalcämulanquichu.^c

Yaꞌa Tayta Diosmari niyá.

10 “Egipto läduman imaymana mućhuchicuycunacta

ćhächishänümá amcunaman ćhaycachimulá.^d

Allinnin müsuyquicunactamá ispädawan wañüchilá.

Cawalluncunapis prïsu chaläśhamá capäcula.

Cachacuyquicunap ismuśhanpa aśhnaynintapis sintichipäculacmá.

Chaycunawanpis manamá yaꞌaman cuticalcämulanquichu.

Yaꞌa Tayta Diosmari niyá.

11 “Sodoma Gomorra^e malcacta camacaycuśhänümá camacaycälälilac.

Nina walayäcäpi śhanśha juluśha cayäcänümá cayalcälanqui.

Chaycunawanpis manamá yaꞌaman cuticalcämulanquichu.

Yaꞌa Tayta Diosmari niyá.

12 “Chaymi Israel malca,

tincüniquiman mućhuycachishayqui.

Chaynu lulaycuná cayaptinmi allichacunayqui

Tayta Diosniquiwan tincuycunayquipä” nil.

13 Paymari ulꞌucunäta camäca,

waywacunäta luläca,

lulay munaśhanta tantiaycachïca,

tutayäcäta acchiman muyuycachïca,

cay pachäpa puntancunaćhu pulïca.

Payꞌa sumä munayniyu Tayta Diosmari.