amcunallactamá aclaycapäculac.^a

Chaymi lluy mana allin lulayniquicunapïta lawćhaycuśhayqui” nil.

3 ¿Mayanpis mana awninacul,

cusca puliyalcanmanchu imamá?

4 ¿Liyunca micunanpä mana cayaptin

muntićhu apalcaćhanmanchun imatá?

¿Uña liyunca micunanpä imallactapis mana chalayal

maćhayninćhu apalcaćhanmanchun imatá?

5 ¿Pälï pishuca trampaman palpunmanchun

imallactapis chayman mana ćhulayaptin imatá?

¿Imallactapis mana chalayal

trampaca wićhacacülunmanchun imatá?

6 ¿Malcaćhu curnitillacta tucaptinchic

manachun malcaca paćhcatityapämun imatá?

¿Tayta Dios mana ćhaycachimuptin

malcaćhu ima mana allinllapis pasaycunmanchun imatá?^b

7 Chayurá sirbïnin willacünincunaman imallactapis

mana yaćhaycachilꞌa Tayta Dios manamá lulaycunmanchu.^c

8 Liyunca apalcaćhaptin,

¿mayantá mana manchacunmanchu?

Tayta Dios limaycuptin,

¿mayantá mana willacunmanchu?^d

9 Chaynütac Asdod malcap palasyunćhu,

Egipto lädup palasyunćhu willacalcämuy caynu:

“Samaria lädup ulꞌuncunaćhu juntunaculcay.

Chay malcacta maynu ñacaycunacta,

sasachacuycunacta pasachishanta licaycapäcuyꞌari.

10 Allincäta manamá mayanllapis lulayta yaćhapäcunchu.

Palasyuncunaćhu suwacuśhancunallactamá pilwacuyalcan” nil.

11 Chaymi Samaria läducta Tayta Dios nin:

“Ćhïnicüniqui śhamulmi lluy allpayquicunacta pudiracuycunꞌa.

Paymi sumä munayniquita pampaman muyüchinꞌa;

sumä sigüru murälläśha malcayquitapis waycälunꞌamá” nil.

12 Tayta Diosmari nin:

“Liyuncäpa shiminpïta uwish michïca

uwishninta libraycul caćhpallantañam

ütac linlillantañamá libraycun.

Chaynümá israelcunaca juc ishcayllaña libraculcanꞌa;

Samaria läducunaca partin cämallantañam ütac partin täcunallantañamá libraycunꞌa” nil.

13 Sumä munayniyu Tayta Diosmari nin:

“Sumäta uyaliycul Jacob ayllup cuntran caynu niycuy:

14 ‘Israel lädup mana allin lulayninpïta lawćhaycuśhá muyuncäćhümi

Bet-elćhu cä uycuna pataccunätapis camacaycüśhä.^e

Chay uycuna patacpa isquinanćhu cä wälancunactapis

paquïluptinmá pampäćhu wicapäśha jitalanꞌa.

15 Tamya timpupä cä wasicunaca,

usya timpupä cä wasicunäpis pampamanmi muyüchisha canꞌa.

Marfilwan adurnäśha wasicunäpis camacaycüśhamá canꞌa.

Allin wasicunaca lluy-yupay mana cäman muyüchishañamá capäcunꞌa.

Yaꞌa Tayta Diosmari niyá’ ” nil.