Amós
Willacü Amos Isquirbishan
Muyülïnin nasyuncunaca camacaycüśha cananpämi nin
1
Juda lädup mandacünin Uzias cayaptin,a
Joaspa chulin Jeroboamb Israel lädup mandacünin cayaptin,
jinaman ishcay watalä pacha cuyuy pasananpä cayaptinmari Tecoa lädu uwish michï Amos willacula Israel lädupi cay nil:
2 “Sionpïtam Tayta Dios apalimunꞌa;
Jerusalenpïtam ayalpamunꞌa.c
Uwish michïcunäpa pastuncuna pasaypimá awïlunꞌa;
Carmelo ulꞌup chupquinćhüpisd lluymá chaquïlunꞌa” nil.
Siria läducta cäraycunanpämi nin
3 Caytanümi Tayta Dios nin:
“Damasco malcap mana allin lulaynincuna ancha-anchapñamá cayan.e
Chaymi mućhuycachiyta nï manalcuśhächu.
Paycuna ïraćhu trïgucta wipyäcänu
Galaad läducta camacaycüśhanpïmari mućhuycachishä.f
4 Chay Hazaelpa wasinman ninacta lataycächiptïmá
Ben-adadpa sigüru cä murällanta lluy camacaycülunꞌa.
5 Damasco malcap sawannincunacta paquïshämá.
Aven pampaćhu yaćhäcunätawan
Bet-edenćhu mandacücäta camacaycüśhämá.
Siria lädu nunacunaca Kir lädumanmi prïsu puśhaśha capäcunꞌa.
Yaꞌa Tayta Diosmari niyá” nil.g
Filisteo läducta cäraycunanpämi nin
6 Chaynütacmi Tayta Dios nin:
“Gaza malcapa,
mana allin lulaynincuna ancha-anchapñamá cayan.
Chaymi mućhuycachiyta nï manalcuśhächu.
Paycunamari jinantin malcantinta prïsu puśhaculcan
Edom lädup maquinman ćhulaycapäcunanpä.
7 Chay Gaza malcaman ninacta lataycächiptïmá
sumä sigüru cä murällancunacta camacaycülunꞌa.
8 Asdod lädućhu yaćhäcunätawan Ascalon lädup
mandacüninta camacaycüśhämá.
Ecron malcaćhu yaćhäcunämanmá maquïta ćhulaycuśhä.
Chaynüpam quïdä Filisteo läducunacah lluy wañupäcunꞌa.
Yaꞌa Tayta Diosmari niyá” nil.
Tiro malcacta cäraycunanpämi nin
9 Chaynütacmi Tayta Dios nin:
“Tiro malcap mana allin lulaynincuna ancha-anchapñamá cayan.i
Chaymi mućhuycachiyta mana manalcuśhächu.
Paycunamari wawꞌi-caśha-pula limalinaculcäśhantapis
unꞌaycul jinantin malcantinta prïsu puśhalcul
Edom läduman lanticälälin.
10 Chay Tirop malcamanmá ninacta lataycächishä.
Chaymi sumä sigüru cayninta lluy camacaycülunꞌa” nil.
Edom malcacta cäraycunanpämi nin
11 Chaynütacmi Tayta Dios nin:
“Edom malcap mana allin lulaynincuna ancha-anchapñamá cayan.j
Chaymi mućhuycachiyta mana manalcuśhächu.
Paycunamá Israel wawꞌi-caśhancunacta
mana llaquipaycul ispädawan aticaćhapäcula.
Piñacuyninwanmari apachicälälila;
ćhïnipayta manamá caćhaycapäculachu.
12 Chay Teman malcamanmá ninacta lataycächishä.
Chaymi Bosra malcap sumä sigüru cayninta lluy camacaycülunꞌa” nil.
Amon läducta cäraycunanpämi nin
13 Chaynütacmi Tayta Dios nin:
“Amon lädup mana allin lulaynincuna ancha-anchapñamá cayan.k
Chaymi mućhuycachiyta mana manalcuśhächu.
Paycunamari allpancunacta jatunyachipäcunanpä
Galaad lädu patayu walmicunäpa patantapis cuchuypa pawälälila.
14 Chay Raba malcap murällancunamanmá ninacta lataycächishä.
Chaymi sigüru cänincunacta lluy camacaycülunꞌa.
Lücu waywaćhünu,
gïrraćhu sumä apalcaćhayćhünümá camacaycüśha canꞌa.
15 Mandacüninmi lluy puydïnincunawan
prïsu puśhaśha canꞌa.
Yaꞌa Tayta Diosmari niyá” nil.