Camacay timpu ćhämunanpämi willacun
12
“Chay timpućhümi munayniyu anjil Miguel śhalcamunꞌa.
Paymá malcayquip sumä licaycünin puydïca.
Chay timpu sumä llaquicuy timpumá cacunꞌa.a
Malcacuna allaycuśhanpi imaypis mana caśhannümá cacunꞌa.
Ñatac chay muyunmi librućhu śhutin isquirbïsha cä malca-masiquicuna salbaycuśha capäcunꞌa.
2 Allpaćhu achca-achca puñücunämi śhalcapämunꞌa.
Waquinnincunam wiña-wiñayćhu cananpä,
juccunañatacmi pinꞌayćhu,
manchacuyćhu pasa-pasaypipa cananpä śhalcapämunꞌa.b
3 Tantiayniyu nunacunaca sïlu llipyäcänümá llipipicyapäcunꞌa.
Allin tincüllanman lulaycuyta yaćhachïcunaca,
uyllurcunänümá wiña-wiñaypä achichipyapäcunꞌa.
4 “Am Danielñatacmi cay willaycuśhäcunacta śhunꞌullayquićhu uywaycunqui.
Chay libru isquirbishayquitá camacay timpucama sïllaycul wićhaycüluy.c
Lluy nunacunamá wicta-cayta pasal cürricaćhapäcunꞌa;
yaćhaycäpis mastamá milanꞌa” nil.
5 Chaypïtam yaꞌa Daniel ishcay nuna śhäcuyalcäta licälú;
jucnin cay lädu mayup patanćhu,
juccäñatac wic lädu chimpa patanćhu cayäta.
6 Chayćhu jucninmi tapuycun lïnupi müdanawan yacu jananćhu śhäcuyä nunacta:
“¿Cay äśhalayllaman camanapä cäcunaca,
imaytan lulacacunꞌa?”
nil.
7 Chay mayup jananćhu lïnupi müdanawan müdacuśha nunaca,
sïlümanmi maquinta chacchalcuña.
Jinalculmi wiña-wiñaypä cawsä Tayta Diospa śhutinćhu limalicuña:
“Quimsa wata ćhawpinmid lulacacunꞌa.
Chuya malcaca pasaypi camacaycüśha cayaptinmari lluy chaycuna lulacacüśhaña canꞌa” nil.
8 Chaynu nishanta uyaliyalpis yaꞌa manamá tantialächu.
Chaymi tapulá:
“Taytay,
¿imanuytan canꞌa caycuna lluy camacäluptin?”
nil.
9 Niptïmi niman:
“Daniel,
amꞌa puntaman liy jinalla.
Caycuna camacay timpucamam pacäśha,
sïlläśha canꞌa.
10 Achca nunacunam ñacaycunäwan chuyanchaycuśha,
allinman muyuycachisha capäcunꞌa.
Mana allin luläcunacá jinallam mana allin lulayninćhu capäcunꞌa.
Paycuna manamá imactapis tantiapäcunꞌachu.
Yaćhayniyücunäñatacmi ichá lluyta tantiapäcunꞌa.
11 “Tayta Diosman muyun-muyun uycunacta manalcachishanpïta,
jinaman alawana wasiman millachicuy anlacta ćhulaśhanpïta,
walanga ishcay paćhac isun ćhunca (1,290) muyunlämi pasanꞌa.e
12 Maynu cushisham canꞌa walanga quimsa paćhac quimsa ćhunca pichayu (1,335) muyuncama mana jucmanyällal alcäcunaca.
13 “Am Daniel,
camacaycäcama masïsu tacyaycuy;
chaypi jamapaycuy.
Camacay timpućhüñatacmi lulaśhayquimannu allin tücäniquita ćhasquinayquipä śhalcamunqui” nil.