4 Chaypïtam alawana wasip chimpan nurti lädućhu cä puncuman puśhäman.

Chayćhu licalcunäpämi Tayta Diospa sumä caynin alawana wasiman juntäña.

Chaymi cäräpis pampäman tupanancama lawacacülú.

5 Chayćhümi Tayta Dios niman:

“Wañucülla nuna,

sumäta uyalimay.

Alawana wasipi imaymana camachicuy nishäcunacta tuquicta uyaliycuy.

Ñawiquita quićhaycul sumäta licaycuy alawana wasïman mayancuna yaycapäcunanpä ütac pï mana yaycapäcunanpäpis.

6 Chay cullu linli Israel malcäta niycuy:

Tayta Diosmi nin:

‘Israel malca,

millachicuy lulayniquicunapi sumä amïshañam cayá.

7 Amcuna ćhacla micuycunacta,

wilacunacta,

yawarcunacta uycapäcuśhayquicama,

mana Israel läducunäta,

aychanćhu śhunꞌunćhu mana siñalachicüśha nunacunätamari alawana wasïman yaycayalcächinqui,

millachicuyman licalichipäcunanpä.

Chaynu yaycachishayquicunawanmari limalicuynïta jalutacuyalcanqui.

8 Amcuna,

chuya cänïcunacta licaycälinayquitá aśhwanpalämi alawana wasïta licaycälinanpäpis,

mana Israel caśhtacunacta ćhulaycälälinqui’ nil.

9 “Chaymi yaꞌa Tayta Dios ní:

Alawana wasïman manam yaycapäcunꞌachu aychanćhu śhunꞌunćhu mana siñalachicüśha cä juc caśhtacunaca,

nï israelcunäćhu yaćhä juc caśhtacunällapis yaycapäcunꞌachu.

10 “Chaynütacmi Israel läducunaca taytachacunaman muyucalcäliptin Levi ayllucunäpis yaꞌapi japächacalälila.

Chaynu ipanchapämäśhanpïtamá mućhuchicuyninta apapäcunꞌa.

11 Paycuna alawana wasip puncuncunacta täpayllaćhüñamá sirbilpis sirbipäcunꞌa.

Chaynütac malcaca cañaywan uycälinanpä apapämuśhancunäta wañuchïllaña capäcunꞌa.

Jinaman imacunaćhüpis nunacunäta yanapänanpä listum cayalcanꞌa.

12 Chaynu captinpis millachicuy taytachacunacta alawayninwan Israel läducunäta juchapacachishanpïtamá mućhuchicuyta apapäcunanpä maquïta pallalcul sumä limalicú.

Yaꞌa Tayta Diosmari niyá.

13 “Paycuna sasirdütinu sirbipämänanpä manañamá aśhuycapämunꞌañachu.

Manatacmá chuya cänïcunaman,

nï sumä chuya cänïcunamanpis aśhuycuyllapis aśhuycapämunꞌañachu.

Millachicuy lulaśhancunapïtamari pinꞌayman ćhulaśha capäcunꞌa.

14 Awari,

alawana wasicta täpaycunallanpäñam ćhulaycuśha capäcunꞌa;

jinaman chayćhu ima lulay cäcunätapis lulaycunallanpäñamari ćhulaycuśha capäcunꞌa.

15 “Masqui Israel läducunaca ipanchalcamal taytachacunacta alawapäcuptinpis Levi ayllupi Sadocpa milaynin sasirdüticunämi ichá chalapacuywan manchacuywan sirbiycapämäla.

Chaymi paycuna ñawpänïćhu sirbipämal uywap wilancunacta,

yawarnincunacta uycapämanꞌa.

Yaꞌa Tayta Diosmari niyá.

16 Paycunallamá chuya alawana wasïman yaycapämunꞌa;

uycuna patacmanpis uycapämä aśhuycapämunꞌa.

Nishallämannümari paycuna lulaycälinꞌa.

17 “Luli patyup puncunpa yaycapäculꞌa lïnupi müdanallawanmi ćhulaculcanꞌa.

Chay luli patyup puncunćhu ütac alawana wasićhu lulayal amam millwapi müdanawanꞌa müdaculcanꞌachu.

18 Umanćhüpis lïnupi cä uma watacuntam ćhulaculcanꞌa.

Calsunsilluncunapis lïnupïmi canꞌa.

Südachicü müdanawanꞌa amam ćhulaculcanꞌachu.

19 Waśha patyućhu cä nunacunäman manaläpis yalulmi alawana wasićhu sirbinanpä lïnupi cä müdanancunacta juluculcanꞌa.

Chay julucuśhancunätam ćhulanapä cä cuartuman ćhulaycapäcunꞌa.

Chaynüpam waśha lädućhu cäcunäwan mana jucllachaculcanꞌachu.

20 “Sasirdüticunaca ächancunacta amam siplay-siplaytá lutuculcanꞌachu.

Amatacmi jatu-jatuntá wiñachiculcanꞌatacchu.

Aśhwanpa yanꞌascallactam lutuchiculcanꞌa.

21 Sasirdütica luli patyuman yaycunan captinꞌa manamá bïnucta upyapäcunanchu.

22 Manatacmi japanyäśha ütac laquinacüśha walmiwanꞌa casaracunmanchu.

Sinuꞌa Israel lädu umricta manalä lisï wamlallawanmi ütac wañü sasirdütip japanyäśha walmillanwanmi cuscanman.

23 Chayurá sasirdüticunaca malcäta yaćhachipäcunanmi mayannin japächäśha ütac mana japächäśha caśhantapis,

mayannin chuya ütac mayannin mana chuya caśhantapis.

24 “Sasirdüticunämi ima quijanacuyćhüpis camachicuy nishanmannu licaycüca capäcunꞌa.

Paycunatacmi yaćhachishäcunacta,

lluy fistacunapä camachishäcunactapis lulaycapäcunꞌa.

Jamana muyuntapis paycunamá japächaycälichinꞌa.

25 “Chaynütacmi anlapä licaśha mana cananpä ima ayamanpis nï aśhuycälinanchu.

Aśhuyculꞌa aśhuycapäcunman ayaca quiquinpa taytan,

maman,

ütac walaśh wamla chulin,

ütac wawꞌi-caśhan ütac japallan cä panin callaptinmá.

26 Chaynu aśhuycülulꞌa chuyanchaculculmi anćhish muyunlä lulayninman cutiycunanpä alcanan.

27 Lulayninta allaycunanpä luli patyuman caśhan uycunanpä yaycuyculmi juchanpïlä cañaywan uycunan.

Yaꞌa Tayta Diosmari niyá.

28 “Sasirdüticunäpa jinantin Israelćhu manamá ima tücällanpis canꞌachu.

Yaꞌamari tücänin cayá.

Manamá ima ćhaclallactapis Israelćhu partiycälinꞌachu.

Yaꞌamari cänin cayá.

29 Paycuna micapäcunꞌa ćhacla micuy uycapäcuśhancunapi,

mana allin lulaśhanpi uycapäcuśhancunapi,

juchanpi uycapäcuśhancunapïtamá.

Chaynütac yaꞌapä lluy apapämuśhancunämá paycunapä caycunꞌa.

30 Chaynütac talpuynincunapi wamä allinnin cusichan apapämuśhancunäpis,

lluy uycälishancunäpis paycunapämá caycunꞌa.

Chaynütacmi tantacta lulanapä cä wamä arinayquicunactapis sasirdüticunäman uycälinqui.

Chaynu lulaycäliptiquimá allinpä licaycuśha wasintin capäcunqui.

31 Ñatac sasirdüticunaca manam micapäcunmanchu pälï pishucuna ütac uywacuna quiquillanpi wañüśha cäcunäta,

nï munti uywap wañüchisha cäcunätapis.