Alawana wasimanmi Tayta Diospa sumä caynin juntaycun
43
Chaypïta inti ishpimunan lädućhu cä sawanmanmi chay nunaca puśhäman.
2 Chayćhümi israelcunäpa Tayta Diosninpa sumä caynin inti yalamunan lädupi śhayämüta licälú.
Suynayninmi llüllap suynayninnu cacuña.
Chay sumä cayninwanmá cay pachäpis achichipyayäña.
3 Chay suyñuynïćhünu licachimäśhanca puntacta licachimäśhancunänümi caña.
Jerusalen malcacta camacaycünanpä śhayämüta licachimäśhancänümari caña,
Quebar mayup lädunćhu licachimäśhancänümá.
Chayćhümi cäräpis pampäman tupanancama lawacacülú.
4 Chay Tayta Diospa sumä cayninmi inti ishpimunan lädu puncup alawana wasiman yaycuña.
5 Chaypïta Ispiritum pallalcul luli patyuman puśhäman.
Chayćhu Tayta Diospa sumä caynin alawana wasiman juntäśhantamá licälú.
6 Chay tupü nunaca lädüćhu cayaptinmi alawana wasipi juc limapämäśhanta uyalïlú.
7 Caynümi niman:
“Wañucülla nuna,
cayćhümi dispächú cayan.
Cayćhu ćhaquïpa jaluycunan captinmi israelcunäwan wiña-wiñaypä cawsaycuśhä.
Cay Israel malcá mandacünintinpis manañamá ipanchaycamal mandacünincunap tulluncunacta,
ulꞌućhu uycunancunaman ćhulayculpis jalutacalcämanꞌañachu.
Manañamari chuya caynïta imaypis pinꞌayman ćhulapäcunꞌañachu.
8 Uycuna patacnïpä lädunmanmá paycuna taytachancunapä uycuna patacta ćhulälälin,
laquinanpä juc pilallacta śhaycaycachil.
Chay millachicuy waticacuy jucha lulaśhanwan chuya caynïta jalutacäläliptinmari sumä piñacuynïćhu camacaycülá.
9 Cananꞌa taytachancunacta,
mandacünincunap tulluncunacta alawayta caćhaycapäcuchunña.
Chaylämi paycunap ćhawpinćhu wiña-wiñaypä caycuśhä.
10 “Am wañucülla nuna,
cay alawana wasi sumä cällanman tupuśha cäcätawan imanuy caśhantari israelcunäman licaycachiy,
chay juchancunapi pinꞌaculcänanpä.
11 Pinꞌaculcaptinꞌa alawana wasi imanuypa luläśha caśhancunactam licaycachinqui:
puncuncunacta,
yalunancunacta,
lluy imancunactapis.
Chaynütacmi alawana wasipi yaćhachicuynincunacta,
camachicuynincunactapis lisiycachinqui.
Cay nishätanülla lulaycälinanpä,
cäsuculcänanpä imam caśhantanülla lluy lulaycuy.
12 Caymi alawana wasipi camachicuyca:
‘Ulꞌup puntanćhu cä alawana wasi caśhanca,
lluy muyülïnintinmi chuya caycunꞌa’ ” nil.
Uycuna patac imanuy cananpämi nin
13 Chayćhümi uycuna patacta tupuptin caynu caña:
Uycuna patacpa muyülïninćhu picha ćhunca (50) cintimitrum lulinman sanja caña,
anchunmanpis picha ćhunca (50) cintimitrutac.
Jinantin muyülïninñatacmi ishcay ćhunca picha (25) cintimitru caña.
Chay uycuna patacpa altunmanñatacmi caynu caña:
14 Pampapïta allaycul punta cä patacninmi altunman juc mitru caña,
anchunmanñatac picha ćhunca (50) cintimitru.
Chaypa jananćhu cä pataccäñatacmi ishcay mitru caña,
anchunmanñatac picha ćhunca (50) cintimitru.
15 Chay uycuna patacpa janäninćhu cäcäñatacmi altunninman ishcay mitru caña.
Chaypa tawan isquinanćhümi tawa wälacuna śhäcuyalcäña.
16 Chaypa tawan lädun chaynü-cama tupullam caña.
Largunmanpis,
anchunmanpis süta mitruyü-camam caña.
17 Chaypa täcunanpis tawan lädun anchunmanpis largunmanpis anćhish mitru-camam caña.
Muyülïninćhu patacninñatacmi ishcay ćhunca pichayu (25) cintimitru caña.
Täcunanñatacmi picha ćhunca (50) cintimitru caña.
Chay ishpinapä grädanñatacmi inti ishpimunan läduman licalayäña.
18 Chaypïtam chay nunaca niman:
“Wañucülla nuna,
Tayta Diosmi nin:
Uycuna patacćhu cañaycunanpä,
jinaman uywap yawarninta chächuycunapä ishpïchishaña cayaptin caynümi japächaycälinqui:
19 Levi ayllupi cä Sadocpa sirbï sasirdüticunämanmi malta wäcacta uycälinqui,
juchapi cañaywan uycapämänanpä.
Yaꞌa Tayta Diosmari niyá.
20 Chay wäcap parti yawarninwanmi uycuna patacpa tawan isquinanman,
wälacunäman,
jinantin muyülïninmanpis chächuycälinqui.
Chaynüpam chay uycuna patacta japächaycälinqui.
21 Chay juchacunapi uycuna malta wäcacta waśha läduman apalculmi cañaycunapä cäcäćhu cañaycälinqui.
22 “Ishcayyänan muyuncäćhüñatacmi juchacunapi juc tuqui allinnin ulu capishta cañaywan uycälinqui.
Chaypa yawarninwanpis wäcap yawarninwan lulaśhayquinümi uycuna patacta japächaycälinqui.
23 Japächayta camacälulñatacmi tuqui allinnin malta wäcactawan tuqui allinnin ulu uwishta,
24 yaꞌa Tayta Diosman ñawpänïćhu cañaywan uycälimanqui.
Chaycunacta sasirdüticunämari caćhiwan caćhichaycul cañaywan yaꞌacta uycälimanꞌa.
25 Juchancunapïtam walan-walan ulu capishta,
malta wäcacta,
tuqui allinnin ulu uwishtapis cañaywan uycapämanꞌa.
Chaynu uycapämanꞌa anćhish muyunmi.
26 Chaynu cañaywan uyculmari sasirdüticunaca uycuna patacta anćhish muyun chuyanchaycapäcunꞌa.
27 Chaynu lulalculmi pusä muyuncäpïta uycuna patacćhu sasirdüticunaca cañaywan uycälimänanta uycapämanꞌa;
jinaman allin cawsaśhanpïpis uycapämanꞌam.
Chaynu lulapäcuptinmi amcunacta cushicuywan ćhasquiycälishayqui.
Yaꞌa Tayta Diosmari niyá” nil.