Śhamü watacunaćhu alawana wasipïmi nin
40
Má,
Babiloniaman prïsu puśhaśha capäcuśhäpïta ishcay ćhunca pichayu (25) watap,
punta quillap ćhunca muyunninćhümi Tayta Dios munayninwan Israelman puśhäman.
Awari,
ćhunca tawayu (14) wataña Jerusalenta pampaman muyüchisha cayaptinmari puśhäman.
2 Chaynu suyñuynïćhünu cayaptïmi Israel malcaman Tayta Dios ćhaycachimal altunnin ulꞌup puntanman ćhulaycäman.
Chay ulꞌup sur lädunman licalcuśhäćhümi jatućha wasicuna jatun malcanu cayäta licälú.
3 Chayman ćhaycachimaptinñatacmi malcap sawanninćhu brunsipïnu cä wayapa śhäcuyäta licälú.
Maquinćhümi lïnupi curdilta,
tupunapä cä śhuꞌuśhta aptilayäña.
4 Chay nunam niman:
“Wañucülla nuna,
cay licachishacta sumäta,
tuquicta licaycuy.
Caynu licachinacpämari cayman puśhamulac.
Lluy licaśhayquitamá Israel malcäman willaycunqui” nil.
5 Chayćhümari alawana wasip muyülïninćhu murällan muyumuśhanta licälú.
Chay nuna tupunapä aptiläśhan śhuꞌuśhcämi quimsa mitru caña.
Chaywan murällacta tupuptinmi anchunman quimsa mitru caña;
altunmanpis quimsa mitrutac caña.
6 Chaypïtam inti ishpimunan lädu sawanman pasacun.
Chayćhu cä grädanpa ishpiyculmi sawanpa altunninta tupuycuptin anchunman quimsa mitru caña.
7 Chay yaycuna sawanpa wicninćhu-cayninćhu täpanapä quimsa cuartu-camam caña.
Chaycunap anchunpis,
largunpis quimsa mitru-camam capäcuña.
Cuartu-pulactañatacmi ishcay mitru ćhawpin laquiña.
Chay cuartup puncunpa altunninmanñatacmi quimsa mitru caña.
8 Chay sawanpa yaycuna luli lädunpis quimsa mitrutacmi caña.
9 Chay luli puncućhu yaycuna curridurpa anchunmi tawa mitru caña.
Alawana wasi läduman yaluna ishcay lädunćhu paradïruncunañatacmi anchunman juc mitru caña.
Chay yaluna luli puncu alawana wasi lädumanmi licalayäña.
10 Chay inti yalamunan lädu sawanćhu quimsa cuartucunamari chaynilä-camalla capäcuña.
Chaypa manyanćhu-cama cä paradïrucunapis quimsa mitruyü-camatacmi capäcuña.
11 Chaypïta waśha patyup yaluna puncup anchunta tupuptinmi picha mitru caña,
altunmanñatac süta mitru ćhawpin.
12 Cuartucunap puntanćhu cä tacsha pilacunämi ćhawpi mitru-cama capäcuña.
Cuartucunäñatacmi anchunmanpis,
largunmanpis quimsa mitru-cama capäcuña.
13 Chaypïta chay cuartup puntanpïta chimpan cuartup puntancama tupuptinmi ćhunca ishcayniyu ćhawpi (12.5) mitru caña.
14 Chaypïta patyuman yaycuna pasadïsucta tupuptinmi quimsa ćhunca (30) mitru caña.
15 Jinaman curridurpa manyanpïta aśhta luli yaluna puncucama ishcay ćhunca pichayu (25) mitrum caña.
16 Chay tacsha cuartucuna rïjaśhniyu-cama,
bintanayü-camam capäcuña.
Curridurninpis bintanayü-camam capäcuña.
Chay laquï paradïrunćhu-camañatacmi palmïra jaćha luläśha caña.
Waśha lädu patyu
17 Chaypïtam chay nunaca waśha lädu patyuman puśhäman.
Chay patyup muyülïninćhu cäcunämi läja lumiwan ćhuläśha cayalcäña.
Chayćhümi quimsa ćhunca (30) cuartucuna cayäña,
waśha lädu patyuman licalayalcä.
18 Chay yaycunaćhu cä jatun wasicunap lulïnincunaćhüpis läja lumiwan ćhuläśha cäcänüllam cayalcäña.
Lluy anchunmanpis chaynüllam cacuña.
19 Jinaman chay waśha lädu patyuctam tupuña,
luliman yaycuna puncup manyanpi aśhta chinpanćhu cä juc puncucama.
Chaynu tupuptinmi picha ćhunca (50) mitruyu caña,
inti yalamunan lädumanpis,
inti jiꞌalpunan lädumanpis.
Nurti lädup yaycunapä
20 Chaypïta nurti lädućhu cä,
waśha lädu patyuman yalunan puncuntam tupuña,
anchuntapis larguntapis.
21 Chay puncup cay lädunćhu,
wic lädunćhu quimsa cuartu-camam caña.
Chaypa paradïruncuna,
yaycunancuna juc luli puncunćhu cäcunänüllam capäcuña:
largunman ishcay ćhunca pichayu (25) mitru;
anchunmanñatac ćhunca ishcayniyu ćhawpi mitru (12.5).
22 Chay bintanancuna,
curridurnincuna,
palmïra lanta liträtuncunapis inti ishpimunan lädu puncućhu caśhancänüllam capäcuña.
Chayman yaycunapä anćhish grädam caña.
Chay yaycunanćhu curridurniyümi caña.
23 Chay inti ishpimunan lädu puncućhu cayäcänümi waśha patyunman yaycunapä nurti lädu puncupis caña.
Chay luliman yaycuna puncupi aśhta juc jatun wasip puncuncama tupuptinmi picha ćhunca (50) mitru caña.
Sur lädup yaycunapä
24 Chaypïtam chay nunaca sur lädu sawanman puśhäman.
Chaypa paradïruncuna,
yaycunancuna juc puncućhu tupuśhancänüllam chaypis capäcuña.
25 Cuartuncunap curridurninpa bintanancunapis juccunäpanüllam caña:
lluy largunman ishcay ćhunca pichayu (25) mitru,
anchunmanñatac ćhunca ishcayniyu ćhawpi (12.5) mitru.
26 Puncuman ishpinancäñatacmi anćhish grädayu caña;
chay yaycunanćhu curridurniyümi caña.
Chay paradïruncunaćhüñatacmi palmïra lanta luläśha cayäña.
27 Waśha patyunman yaycunapä sur lädućhüpis juc puncu cañämi.
Chay luliman yaycuna puncupi aśhta juc jatun wasip puncuncama tupuptinmi picha ćhunca (50) mitru caña.
Luli cä patyunman yaycunapä
28 Chaypïta sur lädu luli patyuman yaycü puncumanmi puśhäman.
Chay puncucta tupuptinmi juccunänülla chaypis caña.
29 Chay cuartuncuna,
paradïruncuna,
curridurninpis chay juccunäpanüllam tupuña.
Cuartucunäpa,
curridurcäpa bintanancunapis juccunäpanümi caña.
Juccunäpänüllatacmi lluy largunninmanpis ishcay ćhunca pichayu (25) mitru caña,
anchunmanpis ćhunca ishcayniyu ćhawpi (12.5) mitru caña.
30 Chay yaycunanćhu cä curridurnincuna,
largunman ćhunca ishcayniyu ćhawpi (12.5) mitrum caña;
anchunmanñatacmi ishcay mitru ćhawpi caña.
31 Chay yaycunaćhu cä curridurmi waśha lädu patyuman licalayäña;
chayćhu ishpinancäñatacmi pusä grädayu caña.
Chay paradïruncunaćhüñatacmi palmïra lanta luläśha cayäña.
32 Chaypïta inti ishpimunan lädućhu cä luli patyumanmi puśhäman.
Chayćhu puncucta tupuptinmi juccunänülla chaypis caña.
33 Chay cuartuncuna,
paradïruncuna,
curridurninpis bintanayü-cama juccunäpanüllam tupuña.
Lluy largunmanpis juccunäpänüllatacmi ishcay ćhunca pichayu (25) mitru caña;
anchunmanñatac ćhunca ishcayniyu ćhawpi (12.5) mitru caña.
34 Chay yaycunaćhu cä curridurmi waśha lädu patyuman licalayäña;
chayćhu ishpinancäñatacmi pusä grädayu caña.
Chay paradïruncunaćhüñatacmi palmïra lanta luläśha cayäña.
35 Chaypïta nurti lädućhu cä luli patyup puncunmanmi puśhäman.
Chayćhu puncucta tupuptinmi juccunänüllatac chaypis caña.
36 Chay cuartuncuna,
paradïruncuna,
curridurninpis bintanayü-cama juccunäpanüllatacmi tupuña.
Lluy largunmanpis juccunäpänüllatacmi ishcay ćhunca pichayu (25) mitru caña;
anchunmanñatac ćhunca ishcayniyu ćhawpi (12.5) mitru caña.
37 Chay yaycunaćhu cä curridurmi waśha lädu patyuman licalayäña;
chayćhu ishpinancäñatacmi pusä grädayu caña.
Chay paradïruncunaćhüñatacmi palmïra lanta luläśha cayäña.
38 Chay jucnin cuartup puncunmi yaycuna curridur läduman puncuyu caña.
Chay cuartućhümi cañaywan uycuna uywacunacta paꞌapäcuña.
39 Chay yaycuna pasadïsup wic lädunćhu,
cay lädunćhu ishcay mïsa-camam capäcuña.
Chaypa jananćhümi cañaywan uycuna uywacunacta ćhipipäcuña;
chaynütac juchan-laycu,
mana allin lulaśhan-laycu uycunanpä uywacunactapis ćhipipäcuña.
40 Nurti lädu yaycuna puncup waśha lädunćhüpis ishcay mïsa-camam wic lädunćhu cay lädunćhu caña.
41 Chayurá luli lädunćhu tawa mïsa,
waśha lädunćhüpis tawa mïsatacmari caña.
Lluy mïsacuna pusämi capäcuña,
chaypa jananćhu uycunan uywacunacta ćhipipäcunanpä.
42 Chay cañaywan uycunapä cä uywacunacta ćhipinanpä tawa mïsacunaca lumipi labräśham capäcuña.
Largunmanpis anchunmanpis anćhish ćhunca pichayu (75) cintimitrum caña;
altunmanñatac picha ćhunca (50) cintimitru.
Chay mïsacunämanmi ćhulapäcuña cañaywan uycuna uywap aychancunacta,
chaynütac cuchilluncunactapis.
43 Chay yaycuna pasadïsućhu cä mïsacunap jananćhüpis uycunanpä cä uywacunap aychancunam ćhulalayalcäña.
Muyülïninćhüñatacmi sumä tacyächisha puntash-cama chalachicucuna cayalcäña,
ishcay ćhunca picha (25) cintimitruyü-cama.
44 Luli patyućhümi ishcay cuartucuna caña.
Jucnin cuartum nurti lädu puncup lädunćhu caña.
Chay cuartum sur läduman licalayäña.
Juccä cuartuñatacmi sur lädu puncup lädunćhu caña.
Chay cuartuñatacmi nurti läduman licalayäña.
45 Chayćhümi tupuyä nunaca niman:
“Cay sur läduman licalayä cuartuca alawana wasićhu lulayä sasirdüticunäpämi cayan.
46 Cay nurti läduman licalayä cuartuñatacmi uycuna patacćhu sirbï sasirdüti Sadocpa milaynincunäpä cayalcan.
Awari,
paycunallam lluy Levi ayllupi Tayta Diosta sirbinanpä cayalcan” nil.
47 Chaypïtam chay luli patyucta tupüluptin picha ćhunca (50) mitru largunman caña;
anchunmanpis picha ćhunca (50) mitrutacmi caña.
Uycuna pataccäñatacmi alawana wasip puncunpa ñawpällanćhu cayäña.
48 Chaypïtam alawana wasip curridurninman puśhäman.
Chaypa paradïruncunacta tupuptinmi ishcay mitru ćhawpin-cama titanman caña.
Curridurpa anchunñatacmi anćhish mitru caña;
wic lädu,
cay lädu pilancunañatacmi juc mitru ćhawpin caña.
49 Chay curridurpa largunꞌa ćhunca (10) mitrum caña;
anchunñatacmi süta mitru.
Chayman ćhunca grädapam ishpiña.
Chay yaycunaćhu cä paradïruncunap cay lädu,
wic lädunćhu juc paradïrucunam caña.