Gog lluy pilyänincunawan llallisha capäcunanpämi nin
39
“Wañucülla nuna,
Gogpa cuntran willacamuy cay nil:
Tayta Diosmi niyäśhunqui:
‘Mesec,
Tubal läducunap am puydïnin Gogpa cuntrayquim cayá.
2 Amtamá cutichimuśhayqui,
alaśhćhamuśhayqui.
Nurti calu lädupi julaycamulmari Israelpa ulꞌuncunap cuntran puśhamuśhayqui.
3 Ñatac ichü maquiquićhu apaśhayqui flïcha ćhächicuyquicunacta paquïshämi.
Allï maquiquićhu apaśhayqui flïchayquicunacta wicapächishayquimá.
4 Israelpa ulꞌuncunaćhümá ampis,
pilyäniquicunapis,
lluy liwshïniquicunapis wañuchisha capäcunqui.
Chayćhu aycha micü imaymana pälï wisculcunäman,
munti uywacunämanmari,
jitaycüśhayqui micapäcuśhunayquipä.
5 Chunyäcäćhümi maśhtalapäcunqui.
Chaynu cananpä yaꞌa Tayta Diosmari niyá.
6 “ ‘Chaynütacmi Magog läduman,
lamarpa patanćhu jawca cä malcacunämanpis ninacta caćhaycämuśhä.
Chaylämi yaꞌa Tayta Dios caśhäta yaćhapäcunꞌa.
7 “ ‘Israel malcäćhümi chuya caśhäta lisichicuśhä.
Manamá chuya cayní jalutacüśha cananta munaśhächu.
Chaynüpam lluy nasyuncunaca yaćhapäcunꞌa Israelćhu Chuya Tayta Diosnin yaꞌa caśhäta.
8 Chaynu pasanan muyunca jiꞌacaycayämunñamá.
Chay muyuncäpïmari yaꞌa Tayta Dios niyá.
9 “ ‘Israel malcaćhu cäcunämari yalalcälimul cañaycälälinꞌa imaymana cä atajachicuncunacta,
flïchancunacta,
mäsuncunacta,
lansancunactapis.
Chaycuna anćhish watacama cañapäcunanpämá cacunꞌa.
10 Manañamá yamtacta ashï ulꞌucunäman lipäcunꞌañachu,
nï munticunäpïpis cuchupäcunan canꞌañachu.
Aśhwanpa chay armancunañamá yamtan canꞌa.
Jinaman suwapänincunacta suwapapäcunꞌam;
waycänincunacta waycapäcunꞌam.
Yaꞌa Tayta Diosmari niyá.
11 “ ‘Chay muyunca ćhämuptinmi Gogpa sipultüracta Israelćhu uycuśhä.
Chay inti ishpimunan lädućhu cä ućhap patanpa pulïcunäpa pasanancäćhümari uycuśhä.
Chaymanmá Gog,
lluy atïnincunawan pampaśha capäcunꞌa.
Chaymi chayninpa pulïcunaca pasayta mana atipapäcuśhanpi,
chay sityucta Achca-achca Gogcunäpa pampan nipäcunꞌa.
12 Israel malcaca chuya caycunanpä,
anćhish quillam wañücunäta pampayalcanꞌa.
13 Jinantin malcaca paycunacta pampawshiyalcalmi nipäcunꞌa:
“Cay muyun yalpaśham canꞌa,
sumä munayninta Tayta Dios camalaycachimäśhanchicpïta” nil.
Yaꞌa Tayta Diosmari niyá.
14 “ ‘Chay anćhish quillapïtam jinantin malcacta ashipämunanpä wayapacuna ćhulaśha capäcunꞌa.
Paycunam pampacunäćhu quïdä wañüśhap tulluncunacta pampayalcanꞌa.
Chaynüpamá malcäta chuyanchayalcanꞌa.
15 Chay nunacunaca muyuyalcämul wañüśhap tulluncunacta licalcul-licalcul,
chaypa lädunmanmi siñalaycunꞌa.
Chaynu lulaycunꞌa pampä nunacunaca “Achca-achca Gogcunäpa pampan” nishan pampaman pampapämunancamam.
16 Chaynüpamari nasyunta,
malcacta chuyanchapäcunꞌa.
Chayćhümi “achca-achca Gogcunäpa pampan” nisha malca canꞌa’ nil.
17 “Wañucülla nuna,
yaꞌa Tayta Dios nishäta caynu niycuy:
‘Imaymana pälïcuna,
munti uywacuna lluy-lluypi juntunacalcämuy.
Israelpa ulꞌuncunaćhu cumbiducta uycunäpä śhapämuy.
Chayćhümá aychacta micapäcunqui;
yawarta upyapäcunqui.
18 Pilyäcunap aychantamari micapäcunqui.
Cay pachäćhu puydïcunäpä yawarnintamá upyapäcunqui.
Paycunap aychancuna Basan lädućhu wirayäśha malta ulu,
ćhina,
wira uwishcunap,
ulu capishcunap,
wäcacunap aychannülämá capäcunꞌa.
19 Chay uycuśhäcäpa wilancunacta millachiculcänayqui-camamá micapäcunqui.
Yawarnintapis shincanayqui-camamá upyapäcunqui.
20 Chay cumbidüćhu maćhaycälinayquicamamá cawallucunap,
sillädancunap,
cachacucunap puydïnincunap,
jinaman lluy pilyäcunäpä aychanta micapäcunqui.
Yaꞌa Tayta Diosmari niyá’ nil.
21 “Jinantin nasyuncunämanmi sumä caynïta camalaycachishä.
Lluy nasyuncunämari paycunaman imanuypa maquïta ćhulaycuśhätapis licaycapäcunꞌa.
22 Chay muyunpïmi Israel läducunaca yaćhapäcunꞌa Tayta Diosnin yaꞌa caśhäta.
23 Chaynütacmi nasyuncunaca yaćhapäcunꞌa Israel läducunaca juchanpi prïsu puśhaśha capäcuśhanta.
Yaꞌapa cuntrá śhalcuśhanpïmá ipanchaycul ćhïnicünincunap maquinman ćhulaycülá.
Jinaptïmi ispädawan camacaycüśha capäcula.
24 Millachicuy lulaynincunamannu,
mana cäsucuśhancunamannümi paycunacta ipanchayculá.
25 “Chaymi yaꞌa Tayta Dios ní:
Cananꞌa prïsu puśhaśha caśhanpïtam Jacobta cutichimuśhä.
Israel läducunäta llaquipaycuśhä chuya caśhäta manchacuywan licapämänanpämari.
26 Allpanćhu mayanpapis manaña manchachisha,
manaña pinꞌacüśha jawcallañam cawsapäcunꞌa.
Chaynütac mana allin lulapäcuśhanta manaña yalpapäcul,
nï yaꞌapa cuntrá śhalcapäcul ipanchapämäśhantapis yalpapäculmari cayalcanꞌa.a
27 Nasyuncunäpïmi cutiycachimuśhä;
ćhïnicünin malcacunäpïmi juntuycamuśhä.
Chaynüpam achca nasyuncunap ñawpäninćhu chuya caśhäta lisichicuśhä.
28 Juc nasyuncunaman prïsu puśhachishäpïmá cananñatac jinantin allpäpi jucllactapis mana caćhaycul cutichimuśhä.
Jinaptïmi yaꞌa Tayta Diosnin caśhäta yaćhapäcunꞌa.
29 Israel malcämanmi Ispiritüta llüllaycachimuśhä.
Chaynu jinayculmi manaña ipanchaśhächu.
Yaꞌa Tayta Diosmari niyá” nil.