Timpuyä mancamanmi tincuchin
24
Chaypïtam isun watap ćhunca quillanćhu,
ćhunca muyunninćhu Tayta Dios niman:
2 “Wañucülla nuna,
canan,
canan muyun,
canan-pacha ima muyun caśhantapis ćhulaycuy.
Canan muyunmari Babiloniap mandacünin Jerusalenta cunćhälun.
3 Chay cullu linli malcacta tincuchiypari niycuy.
Tayta Diosmi caynu nin:
“Nina walayäcäman mancacta ćhulaycuy.
Jinalcul mancaman yacucta jillpuycuy.
4 Chayman allinnin aychacta jitalpuycuy:
caćhpancunactawan cucutincunacta,
chaynütac allinnin tulluncunactapis.
5 Chay aychactawan tulluncunacta mancaman
jitalpunayquipä wirannin uwishtam wañuchinqui.
Jinalcul lulïninman yamtacta tawaycuy
tulluncunapis tuquicta ćhaśhalpunanpä.
6 “Chaymi yaꞌa Tayta Dios niyá:
“¡Ay,
imanuylä cay nuna wañuchï malcaca canꞌa!
¡Imanuylä cay pasaypi ucsidäśha mancanu cäca canꞌa,
lulinćhu anlan mana yalücäli cäca!
Jucllap-jucllap cuchüśha aychancunacta,
mana aclallal lluy lluyta juluy.
7 Chayćhu yawarcunallamá cayan.
Licapaśh wancaman jićhaycüśhamá cayan;
allpawan mana pampaycuśha cananpämá
pampäman nï jićhayculachu.
8 Chayurá allpawan mana pampaycuśha cananpämá,
licapaśh wancaman chay yawarninta yaꞌapis caćhaycuśhä.
Chayćha piñacuyní sumä-sumä latäluptin,
tincüninman cutichicüśhä.
9 Yaꞌa Tayta Diosmari caynu niyá:
¡Ay,
imanuylä wañuchicü malca canqui!
Yaꞌapis achca-achca yamtactamá tawapaycüśhayqui.
10 Yamtacta tawaycuptí ninacta walaycächichun.
Jinalcul ricäducta jitalpuycul aychaca ćhaśhananpä,
aśhta yacunpis chaquinanpä,
tulluncunapis pasaypi läwananpä yanuchun.
11 Chaypïta jinanllan cä mancacta śhanśhaman ćhulaycuchun;
śhanśhay-śhanśhay cayaptin
lluy anlancuna chullunanpä,
ucsidäśhancuna chincananpä.
12 “¡Cay lulayca mayñaćhá!
Chay sumä anlancuna manamá yalucälinchu.
Chayurá ninämanñari jitaycüluy.
13 Am,
anla lulayniquicunapïtam,
juchayquicunapïtamari ñacanqui.
Chuyanchaycuyta yaꞌa munaptïpis am manamá chuyanchacuyta munalanquichu.
Chayurá chay anlayquićhümari quïdapäcunqui piñacuyní amćhu camacänancama.
14 Yaꞌa Tayta Diosmá niyá;
üraca ćhämunñamá,
manamá manalcuśhächu,
chaynümá lulaycuśha canꞌa.
Manamá jinallacta caćhaycuśhayquichu nï llaquipaculcuśhayquichu.
Sinuꞌa imam lulaśhayquimannu,
mana allin cawsaśhayquimannümá cäraycuśhayqui.
Yaꞌa Tayta Diosmari niyá” nil.
Ezequielpa walminmi juclla wañucun
15 Chaypi Tayta Diosmi niman:
16 “Wañucülla nuna,
sumä cuyaywan licaśhayquita jucllam quitäśhayqui.
Amam apalcaćhanquichu,
waꞌanquichu nï wiꞌillayquipis śhutuycunꞌachu.
17 Śhunꞌullayquićhu waꞌacuy.
Wañucücäpi amatac lutucuypischu.
Amatac cala umallá,
cala ćhaquillá puliyaychu.
Cärayquitapis ama śhucupacuychu;
wañüśhaćhu micuna micuycunactapis ama micuychu” nil.
18 Chaypïta chay walantin wälalla malcäwanmi limalá;
tardinpañatacmi walmí juclla wañucun.
Chay walantinñatacmi nimäśhantanu lulayculá.
19 Chaymi malcaca niman:
“¿Cay lulaśhayquiwan ima ninantam niyalcämanqui?
¿Imapïmi caycunacta lulayanqui?”
nil.
20 Nipämaptinmi Tayta Dios nimäśhanta niyculá:
21 “Israel malca,
Tayta Diosniquim nin:
sumä cuyaśhayqui,
allinpä licaśhayqui,
altuman juluycuśhayqui alawana wasïtam millachicuyman licalïchishä.
Chay caćhaycuśhayqui walaśh wamla chuliquicunañatacmi ispädawan camacaycüśha capäcunꞌa.
22 Chaymi Ezequiel lulaśhannu amcunapis lulapäcunqui:
Wañupacüśhanu cärayquicunacta amam śhucupaculcanquichu,
nï wañuśhaćhu micuna micuycunactapis micapäcunquichu.
23 Amatacmi cala umalla,
cala ćhaquilla puliyalcanquichu.
Amam apalcaćhapäcunquichu nï waꞌapäcunquichu.
Mana allin lulaśhayquicunapïmá mana callpayüña licalipäcunqui,
quiquiqui-pulamá śhunꞌullayquićhu llaquiculcanqui.
24 Amcunapämi Ezequiel tantiaycachïniqui caycunꞌa.
Pay lulaśhannüllamá amcunapis lulaycapäcunqui.
Caycuna pasäluptinmá amcuna yaćhapäcunqui yaꞌa Tayta Dios caśhäta” nil.
25 Chayćhu Tayta Dios nimantacmi:
“Am wañucülla nuna,
sumä sigüru murällan,
sumä cuyaśhan,
allinpä licaśhan,
altuman juluycuśhan alawana wasïta quitäluptïmá,
jinaman walaśh wamla chuliquicunactapis quitäluptïmá,
26 jucnin cawsayniyu quïdä nunaca willaycuśhunayquipä śhamunꞌa.
27 Chay muyun shimiqui quićhacäluptinmi ayimü nunäwanpis libriña limanquiman.
Manañamari shimiqui wićhäśhanu canꞌañachu.
Chaynüpamá licachipä paycunapä am caycunqui.
Jinaman paycuna yaćhapäcunꞌa yaꞌa Tayta Dios caśhätamá” nil.