Tayta Diospa ispädan camacaycunanpä listuñam cayan
21
Tayta Diosmi niman:
2 “Wañucülla nuna,
Jerusalen läduman licalcul Chuya Sityup cuntran,
Israel allpap cuntran willacamuy.
3 Caynu niy:
‘Tayta Diosmi caynu nin:
Amcunap cuntrayquim yaꞌa cayá.
Ispädäta jululculmi allin mana allin nunactapis lluy camacaycüśhä.
4 Awari,
ampa ćhawpiquipïtam allin mana allin nunactapis chincächishä.
Sur lädupi aśhta nurti läducama lluy nunacta camacaycümi ispädá yalunꞌa.
5 Chaynüpamá ispädäta yaꞌa Tayta Dios juluśhäta yaćhapäcunꞌa;
ćhulalänanman manamari cutiycachishächu’ nil.
6 “Am wañucülla nuna,
icchulcul-icchulcul waꞌay;
lluypa puntanćhu llaqui-llaquicta awćhuy.
7 Mayanpis:
‘¿Imapïmi waꞌanqui?’
nishuptiquiꞌa,
ninqui:
‘Lluy pasananpä cä willacuypïmi waꞌayá.
Chay willacuy ćhämuptinmi lluypa śhunꞌunpis chullunꞌa,
callpanpis chincacunꞌa,
muspayćhünu capäcunꞌa,
ishpapacuptinmi unꞌulnincunapis puśhtapäcunꞌa’ nil.
Chay lulacacunanpä janayquićhüñamá cacuyan.
Yaꞌa Tayta Diosmari niyá” nil.
“ ‘Ispädaca afiläśhañamá cayan;
ispädaca chipyayanñamá.
10 Muꞌunanpämá afiläśha cayan;
ćhächishanćhu-cama chipyananpämá llipyay-llipyay cayan.
Iju,
¿imanuypamá cushicuchwan?
Bäräta mana cäpämá licalanqui;
lawćhaycuśhäcäta jamuyälanquimá;a
11 Awari,
ispädaca chipyayan aptisha cananpämi.
Ispädaca afiläśha cayan,
wañuchicücäman uycuśha cananpämi.
12 “ ‘Chayurá wañucülla nuna,
apalcaćhay,
waꞌay.
Malcämanmá ispädaca ćhanꞌa;
Israelpa puydïnincunamanmá ispädaca ćhanꞌa.
Lluy paycuna camacaycüśhamari capäcunꞌa.
Chayurá maquiquita tällalcul-tällalcul waꞌacuy.
13 Chay pasananmá.
Awari,
ispädaca Juda läduman ñacaytamá apamunꞌa.
¿Imanuypatá chaynu mana canmanchu?
Yaꞌa Tayta Diosmari niyá.
14 “ ‘Chayurá am wañucülla nuna,
maquiquita
tällalcul-tällalcul willacamuy.
Ishcay quimsa cuticamamá ispädaca ćhämunꞌa.
Chay wañuchicü ispädamá lluy-lluyta
camacaycünanpä lluy-lluyćhu cacuyan.
15 Chaymi śhunꞌuncuna chullupäcunꞌa,
achca-achcam camacaycüśha capäcunꞌa.
Jinantin malcap puncuncunamanmá
manchachicuy ispädacta ćhulaycülú.
Llipyananpä listumá cayan;
muꞌunanpä listumá cacuyan.
16 Am ispäda,
allï läduman cuchuy,
ichü lädumanpis cuchüluy.
May lädu licaśhayquimanpis cuchüluyꞌari.
17 Yaꞌañatacmi ichá maquïta tällaśhä;
chaynüpamá maquïta jawcalpachishä.
Yaꞌa Tayta Diosmari niyá’ ” nil.
18 Chaypïta caśhanmi Tayta Dios niman:
19 “Am wañucülla nuna,
ishcay caminucta unanchaycuy;
chayninpa Babiloniap mandacüninpa ispädan śhamunanpä.
Chay ishcaynin caminum juc nasyunllapïta yalamunꞌa.
Ñatac ishcay caminucunap allaycamuyninćhümi may malcaman lishantapis unanchaycunqui.
20 Jucnin caminu Amon läducuna caśhan Raba malcaman ispädaca ćhänanpämi unanchaycunqui.
Juccätañatacmi Juda lädup sumä murälläśha Jerusalen malcaman ćhänanpä ćhulaycunqui.
21 Babiloniap mandacünin ishcay caminup allaycuyninćhümi,
laquinacuśhanćhümi śhaycülun.
Chayćhümi licacücunäman lin,
mayninpa linanpäpis flïchacunacta maśhtaywan,
taytachacunawanpis,
uywap ñatincunawanpis licaycunanpä.
22 Chaynu licaycuptinmi Jerusalen läduman allï lädup linanpä unanchaycun.
Chayćhümi mandacüca nin:
‘Pilyä,
camacaycü yaycuy,
apalishtin yaycuy,
murällap jananpa yaycunacta lulay,
muyülïninta curraläluy,
puncuncunacta amïluy’ nil.
23 Ñatac Jerusalen nunacunacá:
‘Babiloniap mandacüninwan limalinacüśha cayaptinchicꞌa chay nishanca yanꞌalćha’ nipäcunꞌa.
Mandacücäñatacmi yalpachinꞌa juchancunapi prïsu puśhaśha capäcunanta.
24 “Chaymi Tayta Dios niyäśhunqui:
Amcunam mana allin lulayniquicunacta yalpachipämanqui.
Ipanchapäcuśhayquiwan juchayquicuna camalaycachishañamá cayan.
Chaynu lulapäcuśhayquipïtamá mandacücäpa maquinman palpupäcunqui.
25 “Am mana allin lulä,
juyu lulä Israelpa puydïnin,
muyunniqui ćhämunñamá;
cunca cuchuyniqui ćhämunñamá.
26 Yaꞌa Tayta Diosmi ní:
umayquićhu watacuyquita julucuy,
mandacunayquipä cä curunayquita wicapay.
Manañamá puntanüñachu canꞌa.
Mana cäpa licaśha cäcunämi altuman juluycuśha canꞌa;
altuman juluycuśha cäcunäñatacmi mana cäpa licaśha canꞌa.
27 Pasaypi pampaćhümi,
pasaypi pampaćhümari canꞌa.
Curunan manamá caśhan śhalcachishachu canꞌa,
aśhta aclaycuśhá apaycüca ćhämunancama.
Paypa maquinmanñamari yaꞌa ćhulaycuśhä.
Amon läducunaca mućhuycachisha cananpämi niycun
28 “Canan má,
am wañucülla nuna,
Amon läducunäta palacuynincunapïta caynu willaycuy:
‘Tayta Diosmi nin:
Ispädam,
ispädam muꞌunanpä ćhulalänanpi julüśhaña cacuyan;
micuypa-micunanpämá llipyay-llipyayña ispädaca chipyayan.
29 Juyu Amonta,
malcacta ispädaca mutülunꞌamá.
Mućhuycachinan muyunca ćhämunñamá.
Juchancuna chaspuyaptinñamari mućhuycachinan üraña.
Ispädapi licacü nishancunaca yanꞌalmá cala.
Imapis pasananpä taytachancunacta tapuculcaptin yanꞌalcunactamá niycula.
30 “ ‘¿Ispädacta ćhulananman cutiycachishächun imatá?
Chay wiñaśhayquićhümá,
yaćhaśhayquićhümá yaꞌa cäraycuśhayqui.
31 Amćhümi piñacuynïta pasachicüśhä;
nina walayä rabyacuynïmi camacaycüśhunqui.
Camacaycunallanpä ishpisha cä sumä juyu wañuchicücunap maquinmanmá ćhulaycuśhayqui.
32 Ninamari camacaycüśhunqui,
jinantin allpämanmi yawarniqui paćhcanꞌa,
jinantin pachäćhu manaña yalpalcuśhañamá canquipis.
Yaꞌa Tayta Diosmari niyá’ ” nil.