3 “Yaꞌa quiquin Tayta Diosmi limalicú,

cay limayta jinantin Israel lädućhu manaña limapäcunanpä.

4 Mayan nunapis yaꞌapamá cayan;

taytapis chulipis yaꞌapamari.

Mayanpis juchacta luläcämi ichá wañunꞌa.

5 “Má,

juc allin nunaca tincüllanman,

cällanmanmá lulaycun.

6 Ulꞌucunäćhu taytachacunaman uycunapä cäcunäćhu,

pay manamá cayanchu.

Israel lädućhu taytacha cäcunämanpis manamá chalapacuyanchu.

Jucpa walminta manamá firsayanmanchu,

nïtac walminwanpis ishyacuyninćhu lulanancäta lulayanmanchu.

7 Payꞌa mayantapis manamá usuchinchu,

suwapanchu,

mänu caśhanpi chalachishantapis chalacuycunchu.

Payꞌa cutiycachinmá,

micuypi cäcäta uycunmá,

mana müdanayücätapis müdaycachinmá.^b

8 Illaynintapis mana milayniyüllactamá mañaycun,

milayninta uycunanpïlächu manamá wañupacuyan.

Mayantapis manamá mana allinta lulaycunchu;

ishcay pilyayalcaptinpis mayanninmanpis mana śhalcullalmá cäraycun.

9 Camachicuynïmannümi cawsaycun;

yaćhachishämannüllam lulaycun.

Chay nunamá allin nuna;

chay nuna cawsaycunꞌamá.^c

Yaꞌa Tayta Diosmari niyá.

10 “Ñatac má,

chay nunap chulin suwa nuna wañuchicü canmanmi.

11 Taytan mana lulaśhancunacta lulalmi chay chulin ulꞌucunäćhu,

taytachacunaman uycuśhancunäćhu cayan,

nuna-masinpa walmincunactamá firsayan,

12 mana pïllanpis cäniyücunäta usuchinmá,

wacchacunäta suwälunmá,

mänu caśhanpi chalachishancunäta apacunmá,

taytachacunaman chalapacuyanmá,

millachicuy lulaycunactapis lulayanmá.

13 Jinaman milaynintinta unanpämi illaytapis mañayan,

milayninta uycunanpïmá wañupacuyan.

“Chaynu chuli,

¿cawsananchun?

¡Manamá!

Chaynu millachicuy juchacunacta lulaśhanpïmá wañuchisha canꞌa.

Chay wañuyninpi quiquinmá juchayu canꞌa.

14 “Ñatac caynu canmanmi;

chay mana allin nunap chulin,

taytanpa lluy mana allin lulaynincunacta licayalpis manamá atichinchu.

15 Chaymari taytachacunaman uycunapä cäcunäćhu mana cayanchu,

Israel lädućhu cä taytachacunaman manamá chalapacuyanchu,

nuna-masinpa walminta manamá firsayanchu.

16 Manatacmi mayantapis usuchinchu,

nï suwapayanchu;

mänutacüśha cäcunäpa chalachishantapis cutiycachinmá,

micuypi cäcunätapis micaycachinmá,

mana müdanayücunätapis müdaycachinmá.

17 Chaynütacmi mana allincäpïpis japächacun,

illaytapis mana milayniyüllactam mañaycun,

camachishäta lulaycunmi,

yaćhachishämannümi cawsaycunpis.

“Caynu chulica taytanpa juchanpïta manamá wañunꞌachu.

Payꞌa cawsanꞌamá.

18 Taytanñatacmi ichá juccunacta usuchishanpi,

suwacuśhanpi,

malca-masincunaćhu mana allincällacta lulaśhanpi,

quiquinpa juchancunapïta wañunꞌa.

19 “Ichapis amcuna nipäcunqui:

‘¿Imapïtatá taytanpa juchanpïta chulica mana mućhuycachishachu?’

nil.

Chay chulica aśhwanpa cawsanꞌa tincüllanman,

allincällacta lulaycuśhanpa,

camachishätapis yaćhachishätapis lulaycuśhanpïtamari.

Chaymi pay cawsaycunꞌa.

20 Mayanpis juchacücällamá wañunꞌa.

Chulica manamá taytanpa juchanpïta mućhuycachisha canmanchu,

nï taytapis chulinpa juchanpïta.^d

Allin nunaca allin lulaśhanmannümari licaycuśha canꞌa.

Ñatac mana allin nunäpis mana allin lulaśhanmannümi licaycuśha canꞌa.

21 “Sïchuśh juchasapa nunaca lluy mana allinninpïta wanaculcul yaćhachishäta cäsucuptinꞌa,

jinaman allincämannu cällanman lulayculꞌa manamá wañunꞌachu;

cawsanꞌam.

22 Lluy mana allin lulaśhancuna manañamá yalpalcuśhachu canꞌa;

allin tincüllanman lulaycuśhanpamá cawsanꞌa.

23 ¿Juchasapaca wañunantachun yaꞌa munayá imamá?

Aśhwanpa chay mana allinninpi japächaculcul cawsanantamá munayá.^e

Yaꞌa Tayta Diosmari niyá.

24 “Ñatac allin nunaca allincäta caćhaycul juchasapa nunacunänu imaymana millachicuy lulaycunacta lulayal ¿cawsanꞌachun?

Manamá.

Lluy allin lulaycuśhancunaca manañamá yalpalcuśhachu canꞌa.

Chaynu ipanchalcul mana allincunacta lulaśhanpïmari wañunꞌa.

25 “Ichapis nipäcunqui:

‘Tayta Diospa lulaśhan manamá allinchu’ nil.

Má,

Israel läducuna sumäta uyalimay:

¿Rasunpachun lulayní mana allin cayan?

¿Icha amcunap lulayniquichun aśhwanpa mana allin cayan?

26 Allincäta lulaycü nunaca allincäpïta japächaculcul millachicuy lulaycunacta lulayalꞌa,

chay juchacta lulaśhanpïmi wañunꞌa.

27 Ñatac juchasapa nunaca mana allin lulayninpi japächaculcul allincämannu cällanman cawsayculꞌa cawsayninta salbaycunꞌamá.

28 Chay mana allin lulaynincunapi tantiaculcul wanaculmari mana wañunꞌachu;

aśhwanpa cawsanꞌam.

29 Ichapis Israel malcaca yapa ninꞌa:

‘Tayta Diospa lulaśhan manamá allinchu’ nil.

Aśhwanpa amcunap lulayniquimá mana allinćhu cayan.

30 “Chaymi Israel malca,

tincüniquiman-cama manyallapi imanuy cawsapäcuśhayquimannu cäraycälishayqui.^f

Chayurá yaꞌaman cuticalcämul millachicuy lulayniquicunapi japächaculcay,

juchayquicuna cunca cuchuyniqui manaña cayänanpä.

31 Israel malca,

¿imapïmá wañuycäta quiquillayqui ashiyalcanqui?

Mana allin lulayniquicunacta wicapalculñari allin śhunꞌuyüña,

muśhü ispirituyüña cayta ashiycäliy.^g

32 Jucllayquipis wañupäcunayquita yaꞌa manamari munächu.

Chayurá yaꞌaman cuticalcämul cawsapäcunquim.

Yaꞌa Tayta Diosmari niyá” nil.^h