5 “ ‘Chaynütacshi chay malcapi mujucta pallalcul allin allpaman talpüña.

Achca yacu caśhanpa manyanmanshi lamlaśh lantactanülä talpüña.

6 Chay muju ishpïmulshi masqui tacshalla cayalpis pallaysapa üba lantaman muyüña.

Pallaynincunash anca läduman licapayäña;

sapincunañatacshi mas lulimanlä sapichacüña.

Chaynüpashari sumä jundu-jundu allin pallaysapa üba lantaman licalïña.

7-8 “ ‘Masqui yacup manyanman,

allin allpaman talpüśha cayalpis,

allin pallayniyü,

allin wayuyniyü,

chayćhu sumä-cama üba cayalpis,

juc jatun anca jatućha laplayü,

pülaśh-sapa licalimücämanñash üba lantäpa sapin muyuculcuña.

Chaypa yacunta ćhasquinanpäshari muyuculcuña’ nil.

9 “Yaꞌa Tayta Dios nishätari niycuy:

‘¿Chay üba lantaca allinchun canꞌa imatá?

¿Cay ancaca manachun sapipi julülunꞌa imamá?

¿Wayuyninta camacaycüluptin manachun awïlunꞌa imatá?

Awari,

juc ishcay nunallamá chutälunꞌa;

mana callpayüllamá sapipi ulälunꞌa.

Chaymi llullu chillquimücunaca chaquïlunꞌa.

10 Masqui ¿juc läduman aśhulcachil lantaptinpis allinchun canꞌa imamá?

¿Inti yalamunan lädupi śhamü waywaca manachun awïchinꞌa imamá?

Awari,

chay quiquin wiñamuśhancällaćhümá chaquïlunꞌa’ ” nil.

11 Chaypïta Tayta Diosmi niman:

12 “Chay cullu linli nunacunäta tapuycuy ‘¿Tincuchiypa nishäcäta manalächun tantiapäcunqui?’

nil.

Caynuꞌari tantiaycachiy:

‘Babilonia nasyunpa mandacünin cay Jerusalenman śhalcamulmi mandacüniquita,

lluy puydïniquicunactapis Babiloniaman prïsu puśhaculcäla.

13 Chaynütacmi mandacücäpa jucnin puydï ayllunta chalalcul limalicachila lluyta lulaycunanpä.

Chaynüpamari malcap sumä allinnincunacta puśhacula.

14 Chaynüpam Babiloniap maquinćhüña licalïla,

manaña cutipacuytapis atipapäcul.

Chay limalicuymannu lulaycullalñamari cawsaycälila.

15 Ñatac chaynu limalicuśhanta juc läduman jitayculmá nunancunacta Egiptoman caćhälun achca cawallucunacta,

pilyäcunacta mañamunanpä.

Má,

chaynu luläca,

¿allinchun canꞌa imamá?

¿Chay lulaśhancunapi salbacunꞌachun imamá?

¿Limalicuśhanta jalutacüca cawsayniyüchun caycunꞌa imatá?

16 “ ‘Manamá salbacunꞌachu.

Yaꞌa Tayta Diosmi limalicú,

Babilonia lädućhu chay ćhulänin mandacüca caśhanćhu wañunanpä.

Chay limalicuśhanta mana cäpa ćhulaycul mana lulaycuśhanpïtamá Babiloniaćhu wañunꞌa.

17 Awari,

Babiloniap mandacüninmá achca-achca nunacta camacaycünanpä Jerusalenman yaycunꞌa.

Chay murälla ipanman allpacunacta muntunaptin,

türricunacta śhalcachiptinpis Egiptop mandacünin manamá yanapanꞌachu pilyänincunawanpis nï achca cachacuncunawanpis.

18 Chay Jerusalenćhu mandacüca limalicuśhanta mana cäpa ćhulayculmari jalutacüla.

Chaynu lulaycunanpä limalicuyalpis mana cäsucuśhanpïmá nï salbacunꞌachu.

19 “ ‘Chaymi yaꞌa Tayta Dios ní:

Rasunpa,

yaꞌapa limalicuynïta mana cäpa licaśhanpïtamá,

limalicuynïta jalutacuśhanpïtamá quiquinta mućhuycachinäpä yaꞌa limalicú.

20 Payman trampäcunacta maśhtaycuptïmi chayman palpapämunꞌa.

Ipanchamäśhanpïtamá Babiloniaman puśhalcul chayćhu tincüninman cäraycuśhä.^a

21 Achca allinnin pilyänincunamari ispädawan wañupäcunꞌa.

Quïdäcunäpis wicman-cayman chiꞌichishamá capäcunꞌa.

Chaynüpamari yaꞌa Tayta Dios caśhäta amcuna yaćhapäcunqui’ nil.

22 “Yaꞌa Tayta Diosmi ní:

‘Yaꞌa quiquí,

Cedro ilup altunnin pallayninta cuchulculmá lantaycuśhä.

Sumä pallayninpa chillquimuśhanta paquilculmá altu ulꞌuman lantaycuśhä.

23 Awari,

Israelpa altu ulꞌunmanmá lantäśhä.

Sumä pallaysapa calmi sumäta wayunꞌapis.

Chaynüpamá sumä cedro lantaman muyuycunꞌa.

Pallaynincunap lulincunaćhu,

llantuynincunaćhüpis imaymana pälï pishucunamá ishñachaculcanꞌa.

24 Chaynüpamá lluy lantacunaca yaćhapäcunꞌa yaꞌa Tayta Dios altunnin lantacta cućhpachishäta,

mas tacshanllan lantactapis wiñachishäta.

Chaynütacmi tuqui birdi lantacta chaquichishäta,

chaqui lantacta waytachishätapis yaćhapäcunꞌa.

Yaꞌa Tayta Diosmari niyá;

yaꞌatacmi lulaycuśhäpis’ ” nil.