Ezequiel
Willacü Ezequiel Isquirbishan
Tayta Diosmi sumä cayninta licachin
1
1-3 Yaꞌa cayá Buzipa chulin sasirdüti Ezequielmi.
Mandacü Joaquinta Babiloniaman puśhaśhan nunacunäwan cuscam Quebar mayup patanćhu yaꞌa cayälá.
Chayćhu picha watañam cayalcälá.b
Chay wata cala quimsa ćhuncaa (30) wata,
tawa quilla picha muyunninmi.
Chayćhu cayaptïmari sïluca juclla quićhacacüluptinc Tayta Dios suyñuynïćhünu licachimäla.
4 Licalcunäpämi nurti läducta sumä puca waywa śhacayämuña;
pucutayćhu nina waclishtin sumä chipyaśhtinmari śhacayämuña.
Chay ninap ćhawpinćhümi chipyayä jïrrunu sumä chipyayäña.
5 Chay pucutaypa ćhawpinćhümi nunacunanu tawa cawsäcuna cayalcäña.d
6 Paycuna tawa cärayu,
tawa laplayü-camam capäcuña.
7 Ćhaquincunam dirichu-camalla caña;
ćhaqui paltancunañatacmi malta wäcap shillunnu-cama caña.
Chay ćhaquincunam chipyayä brunsinülä sumä-sumä chipyayalcäña.
8 Paycuna tawa cärayu,
tawa laplayü-cama cayalcalpis tawan lädunćhütacmi nunap maquinnu maquiyü-cama capäcuña.
Chay maquincuna laplanpa lulïninćhümi cayalcäña.
9 Jucnin laplanmi jucca laplanwan tupanaculcäña.
Pulipäcuptinꞌa wicman-cayman mana muyuycaćhallalmi puntaman lipäcuña.
10 Cärancunañatacmi caynu caña:
Punta lädu cäranmi nunap cärannu,
allï lädu cäranñatac liyunpa cärannu,
ichü lädu cäranꞌa wäcap cärannu,
ipa cäranñatac ancap cärannu caña.e
11 Chaynümari paycunap cärancuna capäcuña.
Laplancunañatacmi wichayman quićhacälälisha-cama caña.
Chay laplancunamari wätanćhu cä laplanwan tupanacuña.
Ishcay quïdäcäñatacmi aychanta pacaläña.
12 Chay tawan cawsäcunämi wicman-cayman mana muyuycaćhallal puntaman lipäcuña.
Ispirituca apaśhanmanmá lipäcuña.
13 Chay cawsäcunämi walayä śhanśhanu,
ütac sumbaypa sumbä ninanüf wicman-cayman cuyuśhtin cayalcäña.
Chay nina walayäca sumä-sumämi chipyaculläña.
Chaypïmá waclicuna yalamuña.
14 Chay tawan cawsäcunaca räyunümi wicman-cayman juclla paćhcaycaćhapäcuña.
15 Chay tawan cärayü-cama cawsäcunäta licayäśhäćhümi licälú pampaćhu juc ruyda lädunćhu-cama cayalcäta.
16 Chay ruydacunaca sumä aläja lumi crisolito nishannümi chipyayalcäña.
Lluy ruydacunaca chaynilä-camalla,
jucninpa lulïninćhu-camanümi cayalcäña.
17 Chay ruydawanmi tawan lädumanpis lipäcuña;
ruydanꞌa manamá muyuñächu.
18 Chay ruydacunaca altu-cama manchanaśhmi cacuña.
Ruydacunap muyülïninćhümi ñawicunalla cacuña.g
19 Chay tawan cawsäcunaca puliliptin ruydacunäpis paycunawanmi cuyuliña.
Päliptinpis ruydacunäpis pälipäcuñämi.
20 Chay cawsäcunaca Ispiritu maytapis puśhaśhanmanmi lipäcuña,
pälipäcuñäpis.
Ruydacunäćhu Ispiritu cayaptinmari päliptinpis ruydapis päliña.
21 Chaynümari lipäcuptinꞌa ruydapis liña,
śhaycuptinꞌa ruydapis śhaycuña.
Pallaculcuptinꞌa ruydapis pallaculcuñämi.
Chaynu caña ruydacunäćhu Ispirituca cayaptinmari.h
22 Chay cawsäcunap umanpa jananćhüñatacmi maśhtäśhanu jatun quishtal cayäña.
Chaymi sumä tuqui-tuqui llipyayä cacuña.i
23 Chay quishtalcäpa lulinćhümi laplancuna dirichu-camalla quićhalayalcäña.
Juccäpa laplanwan lapla-pula tupanaculcäñämi.
Chay ishcay juc laplancunañatacmi aychanta täpalayalcäña.
24 Cuyuliptinꞌa laplancuna achca-achca yacup suynayninnu,j
Sumä Munayniyücäpa limayninnümi suynaculläña,
ütac achca-achca pilyäcunap lüyayninnümi cacuña.
Śhaycuptinñatacmi laplancunapis bäjaña.
25 Chaynu laplanta bäjäśha śhäcuyalcaptinñatacmi quishtalcäpa jananpi limalpamuña.
26 Chay quishtalcäpa jananćhüñatacmi zafiro nishan aläja lumipi täcuna caña.
Chay täcunanćhümi nunanu cayäña.k
27 Wiyawninpi jananmanñatacmi sumä-sumä chipyayä brunsinu cacuña;
lulinpawan janäninpañatac nina walayänu cacuña.l
Chay wiyawninpi ulapaymanñatacmi nina walayänu jinantin muyülïninćhu chipyayäña.
28 Chay chipyayca tamyamuptin tulumanya yalamücänümi cacuña.
Chaynütamá Tayta Diospa sumä cayninta licälá.
Chayta licälul-pacham pampäman juclla lawacacälú.
Chayćhümari limapämäśhanta uyalïlú.