Pitwïshaćhu isquirbïshactam alawana wasićhu Baruc lïgin
36
Juda lädućhu Josiaspa chulin Joacima tawa wataña mandacuyaptinmi Jeremiasta Tayta Dios nin:
2 “Josias mandacü caśhanpïta canancama Juda lädup,
Israelpa,
lluy nasyuncunap cuntran willaśhätari isquirbinapä cä pitwiläcäman isquirbiycuy.
3 Ichaläpis caynu imaymana mućhuchicuyta caćhanäpä caśhanta,
Juda läducunaca tantiacalcälil mana allin cawsaynincunacta caćhaycapäcunman.
Chaynu lulaycäliptinꞌa mana allin lulaynincunacta,
juchancunacta pampachaycuśhämá” nil.
4 Niptinmi Neriaspa chulin Baructa Jeremias ayalcul Tayta Dios lluy willaśhancunacta Barucman niycula,
isquirbinapä cä pitwiläcäman isquirbinanpä.
5 Chaypïtam Baructa Jeremias nin:
“Tayta Diospa alawana wasinman yaycunäpä manam awnishachu cayá.
6 Chaymi ayunapäcunan muyun canancäćhu alawana wasiman yaycuycul pitwinamanb ishquirbichishacta lïgiycunqui.
Chayćha Juda lädu malcacunäpi śhamücunaca Tayta Dios nimäśhanta uyalipäcunꞌa.
7 Ichapis chaynüpa mana allin lulaynincunacta caćhaycul Tayta Diosta mañaculcanman.
Awari,
piñacuyninćhu Tayta Dios paycunacta sumä-sumä mućhuycachinanpämari niyan” nil.
8 Chaynu willacü Jeremias nishantanüllamari Neriaspa chulin Baruc lulaycula.
Chay pitwïsha cä papilćhu Tayta Diospa nishancuna isquirbïshactamari alawana wasićhu lïgiycula.
9 Má,
Josiaspa chulin Joacim picha wata,
isun quillaña Juda lädup mandacünin cayalmi,
Juda lädućhu Jerusalenćhu cäcunaca Tayta Diospa puntanćhu ayunapäcunanpä camachila.
Jinaptinmi lluy malcacunäpïta Jerusalenman juntunacalcämula.
10 Chayćhu lluy nunacunaca uyalinanpämi Jeremias isquirbichishancäta Baruc lïgila.
Payꞌa isquirbï Safanpac chulin Gemariaspa cuartunpïtamari lïgiycula.
Chay cuartu cala janay lädu patyućhu cä Tayta Diospa alawana wasinman yaycuna muśhü puncućhümá.
11 Chay camachicuyćhu Tayta Dios lluy nishancunacta Micaias uyaliyculamari.
Payꞌa Safanpa willcan,
Gemariaspa chulinmi cala.
12 Chaynu uyaliyculmi mandacücäpa palasyunćhu isquirbïnincäpa caśhanman pasacula.
Chayćhümi lluy puydïcunaca cayalcäña:
Isquirbïnin Elisama,
Semaiaspa chulin Delaia,
Acborpa chulin Elnatan,
Safanpa chulin Gemarias,
Ananiaspa chulin Sedequias,
jinaman juc puydïcunäpis.
13 Paycunamanmi lluy nunacunäpa puntanćhu isquirbïsha cäcäpïta Baruc lïgishanta Micaias willaycula.
14 Chaymi chay puydïcunaca Barucman Jehuditacta caćhälälin.
Paymi Cusip waśhapaqui willcan,
Selemiaspa willcan,
Netaniaspa chulin cala.
Chayćhu Jehudimi Baructa nin:
“Malcap ñawpäninćhu pitwiläśha cäcäćhu lïgishayquita apacalcamul śhamuy” nil.
Niptinmi pitwiläśhancäta apaculcul paycunaman Neriaspa chulin Baruc lila.
15 Chay puydïcunäñatacmi nipäcula:
“Cayllaman taycucuycul canan yaꞌacunacta lïgipaycälimay” nil.
Nipäcuptinmi Baruc lïgipaycula.
16 Chaynu uyaliyta camacälälil manchapacälälisha-cama licanacuyllaman camälälisham Baructa nicuyalcan:
“Lluy caycunacta mandacücämanmi willaycunanchic” nil.
17 Chaypïtam Baructa tapupäcula:
“Má niycälimay,
¿imanuypatan chaycunacta isquirbilanqui?
¿Jeremias willapäśhullaptiquichun lulalanqui?”
nil.
18 Niptinmi Baruc:
“Aw,
Jeremias willapämaptinmi isquirbinapä cä pitwiläcäman tintawan yaꞌa isquirbiyculá” nin.
19 Niptinmi Baructa chay puydïcunaca nin:
“Amwan Jeremias pacacalcämü wayra liculcay.
Mayćhu capäcuśhayquita amari mayanpis yaćhachunchu” nil.
Pitwïshaćhu isquirbïshactam mandacüca cañan
20 Chaypïtam pitwïshaćhu isquirbïshacta isquirbïnin Elisamap cuartunman ćhulaycälil,
puydïcunaca pasaculcäla patyućhu caśhan mandacücäman.
Chayćhümi mandacücäta willaycälila.
21 Willaycäliptinmi pitwïshaćhu isquirbïshacta apamunanpä mandacüca Jehuditacta caćhälun.
Chaymi Elisamap cuartunpïta Jehudi apalcamul mandacücäpa,
chaynütac chayćhu lluy puydïcuna caśhancäpa ñawpäninćhu lïgiycula.
22 Ñatac isun quillaćhüña cayalmi alaläcü timpupä lulachishan cuartunćhu mandacüca unupacuyäla unupacuna śhanśhap puntanćhu.
23 Jehudi chaynu quimsa ütac tawa particta lïgiycüluptinꞌa mandacüca cuchilluwan cuchulcul-cuchulculmi śhanśha walaśhancäman wicapaycülü cala.
Chaynüpamari pitwïshaćhu isquirbïshacta camacänancama lluy cañaycüla.
24 Chay willacuyta mandacüca,
puydïcunaca uyaliyalcalpis manamá manchaculcälachu;
nï müdanancunactapis llaquicuypi laćhyapäculachu.
25 Masqui pitwïshaćhu isquirbïshacta mandacüca mana cañananpä Elnatan,
Delaia,
Gemarias maynu-maynu mañacuptinpis manamá uyalïtuculachu.
26 Aśhwanpam mandacüca Hamelecpa chulin Jerameelta,
Azrielpa chulin Sereiasta,
Abdeelpa chulin Selemiasta caćhälun,
isquirbí Baructawan willacü Jeremiasta prïsu puśhapämunanpä.
Ñatac paycunactá Tayta Diosmi pacaycula.
Isquirbinapä pitwïshaćhu Jeremias yapam isquirbichin
27 Chaypi Jeremias willapaptin isquirbinapä cä pitwïshaman Baruc isquirbishantam mandacüca lluy cañaycülun.
Jinaptinmi Jeremiasta Tayta Dios yapañatac nin:
28 “Juda lädup mandacünin Joacim cañaycuśhanćhu lluy nishancunacta yapa isquirbichiy isquirbinapä cä juc pitwïshaman.
29 Yaꞌa Tayta Dios nishätamá Juda lädup mandacünin Joacimta niycunqui:
Anmá cay pitwïshaćhu isquirbïshacta cañälanqui:
‘¿Imapïmá isquirbilanqui cay allpacta Babiloniap mandacünin camacaycülunꞌa,
nunacunapis uywacunapis pasaypi chincanancama niyta?’
nil.
30 Chaynu lulaśhayquipïmi yaꞌa Tayta Dios niycuc:
Ampa milayniqui manamá Davidpa pudirnin mandacü caycunꞌachu.
Am wañuśhayquićhümi muyunpa jitalanqui lupaycäwan yanüśha,
tutanpa asawan iscarchäśha.
31 Mana cäsucamal juchacunacta lulaśhayquipïtamá amta,
milayniquicunacta,
sirbïniquicunactapis mućhuycachishayqui.
Chaynütacmi Jerusalenćhu,
Juda lädućhu lluy cäcunämanpis willacachimuśhá ñacaycunacta ćhaycachimuśhä” nil.d
32 Niptinmi isquirbinapä cä pitwïshacta Neriaspa chulin Barucman,
Jeremias uycula isquirbinanpä.
Chaymi Jeremias willapäśhantanülla chayman Baruc isquirbila.
Chay Juda lädup mandacünin Joacim cañachishantanüllamari caśhan isquirbiycula.
Jinaman juc willacuycunactapis yapayculalämi canpis.