Recabpa milaynincuna uyalicü-camam
35
Juda läducta Josiaspa chulin Joacima mandacuyaptinmi Jeremiasta Tayta Dios nin:
2 “Recabpa milaynincunaman lilcul paycunawan limamuy.
Chay Tayta Diospa alawana wasinpa jucnin cuartunman puśhayculꞌari bïnucta cumbidaycamuy” nil.
3 Nimaptinmi Jaazaniasta,
wawꞌi-panincunacta,
chulincunacta,
Recabpa lluy aylluncunacta ashï liculá.
Jaazanias cala Habasiniaspa willcan,
chay jucca Jeremiaspa chulinmari.
4 Paycunactam alawana wasiman puśhalcul Igdaliaspa chulin Hananpa cuartunman yaycaycachilá.
Hananꞌa Tayta Diospa nunanmari cala.
Chay cuartu,
alawana wasip puydïnincunap cuartunpa lädunćhümi cala;
jinaman Salumpa chulin Maasiaspa cuartunpa jananćhümi.
Maasiasꞌa alawana wasip puncunta täpäcämari cala.
5 Chayćhümi bäsu junta,
järra junta bïnucta Recab ayllucunäpa ćhulaycapulá.
Jinalculmi:
“Bïnucta upyapäcuy” nilá.
6 Paycunañatacmi nipäman:
“Yaꞌacuna manam upyapäcüchu.
Recabpab chulin unay awquillú Jonadabmi nipämäla:
‘Amcunapis,
milayniquicunapis bïnucta amam upyapäcunquichu.
7 Wasicunactapis amam lulapäcunquichu,
amam talpupäcunquichu,
übäcunactapis amam lantapäcunquichu.
Chayurá jamapacünülla yaćhaśhayqui allpaćhu achca wata allin cawsapäcunayquipämari carpacunallaćhu yaćhapäcunqui’ nil.
8 Chaynu Recabpa chulin unay awquillú Jonadab lluy nipämäśhanta cäsuculmari yaꞌacunapis,
walmïcunapis,
chulïcunapis bïnucta mana upyapäcüchu.
9 Manatacmi wasïcunactapis lulapäcüchu,
nïtac üba lantäcunapis,
ćhacläcunapis canchu;
nï ima talpuynïpis canchu.
10 Carpacunallaćhümi yaćhapäcüpis.
Awquillú Jonadab lluy nipämäśhantanüllamá lulaycuyalcäpis.
11 Ñatac Babiloniap mandacünin Nabucodonosor cay nasyunman yaycälälimuptinmá cay Jerusalenman ayicalcämulá.
Babilonia lädu,
Siria lädu pilyäcunäpïmari ayicalcämulá.
Chaynüpamari cay Jerusalenćhüña cayalcá” nil.
12 Chaynu niptinmi Jeremiasta Tayta Dios nin:
13 “Israelpa sumä munayniyu Tayta Diosninmi ní:
Juda lädućhu,
Jerusalen malcaćhu cä lluy nunacunäta nimuy:
‘Amcuna,
¿manañachun cäsucamayta yaćhapäcunqui imatá?
14 Recabpa chulin unay awquillun Jonadab nishancunacta cäsuculcalmi milaynincuna canancamapis bïnucta mana upyapäcunchu.
Amcunañatacmi ichá yapalcul-yapalcul niyalcaptïpis mana cäsucalcämanquichu.
15 Chaynütac sirbïnïcuna,
willacünïcuna willaycälishunayquipä jucta-jucta caćhamulá caynu nipäcuśhunayquipä:
“Mana allin lulayniquicunacta-cama caćhaycul allichaculcayña.
Taytachayquicunaman amaña atipacuyalcaychu nï sirbiyalcayñapischu.
Chaynu lulapäculmá amcunaman awquilluyquicunaman uycuśhá allpaćhu cawsapäcunqui” nil.
Amcunañatacmi ichá mana uyalicalcämälanquichu,
nï cäsucalcämälanquichu.
16 Recabpa chulin unay awquillun Jonadab nishancunacta milaynincuna cäsuculcälamá.
Cay malcäñatacmi ichá mana cäsucalcämanchu.
17 Chaymi Israelpa sumä munayniyu yaꞌa Tayta Diosnin ní:
Juda lädućhu,
Jerusalen malcaćhu yaćhäcunämanmi mućhuchinäpä niycuśhá lluy ñacaycunacta caćhamuśhä.
Limapaptïpis manamá cäsucalcämälachu;
ayaptïpis manamá uyalïtucalcämälachu’ ” nil.
18 Niptinmi Recabpa milaynincunacta Jeremias nin:
“Israelpa sumä munayniyu Tayta Diosninmi caynu nin:
‘Awquilluyqui Jonadab nishuśhayquicunactamá amcuna cäsuculcälanqui;
lluy nishuśhayquicunactamari lulaycälilanqui.
19 Chaymi Israelpa sumä munayniyu Tayta Diosnin ní:
Recabpa chulin Jonadabpa milayninpïtam sirbïnïcuna imaypis caycunꞌa’ ” nil.