Israelcunaca malcanta cutipäcunanpämi nin
31
Tayta Diosmi nin:
“Chay timpućhu lluy Israel ayllucunäpä yaꞌami Tayta Diosnin caśhä;
paycunañatacmi malcá capäcunꞌa.
2 Yaꞌa Tayta Diosmi ní:
“Ispädawan wañunanpi ayi Israelmi
chunyäcäćhu llaquipaycuśha cala.
Jamaycuyta ashïmá Israel liyalcan.
3 Unayñamari Israelman Tayta Dios licalilcul nila:
‘Wiña-wiñaypä cuyacuywanmi cuyac.
Chaymi cuyaśhämannu llaquipaywan licaycuc’ nil.
4 Umricta manalä lisï Israel,
caśhanmi śhalcachishayqui.
Awari,
śhalcachisham canqui.
Caśhanmi pandirïtacta tucaśhtin
cushicuywan tuśhuśhtin yalunqui.
5 Samariap ulꞌuncunaćhu
übacunactapis caśhanmi talpunqui.
Übacta lantäcunaca wayuyninta cushishamá pallapäcunꞌa.a
6 Täpäcunaca Efrainpa ulꞌuchancunaćhu
apalcaćhapäcunan timpu śhacayämunñamá:
‘Śhapämuy;
Sionman lishun.
Tayta Diosninchic
caśhanman lishun’ nil nipäcunan” nil.
7 Tayta Diosmari nin:
“Jacobpa
milaynincunapïta sumä cushicuywan taquipäcuy.
Sumä allinnin nasyunpïta cushicuypi bïbapäcuy.
Alawapäcuśhayquita uyalichipäcuy.
Nipäcuyꞌari:
‘Tayta Diosmi malcanta salbaycun.
Quïdä israelcunätamá salbaycun’ nil.
8 Paycunactamá nurti lädu nasyunpïta yaꞌa cutichimuśhä.
Jinantin allpäćhu cäcunäpïmá yaꞌa juntuycamuśhä.
Achca-achcamá cutipämunꞌa.
Paycunawanmi śhapämunꞌa:
aplacuna,
wishtucuna,
patayu walmicuna,
chayllalä ishyacüśha walmicunapis.
9 Paycuna waꞌaśhtinmi liculcäla.
Ñatac llaquipäcuywanmi yaꞌa cutiycachimuśhä.
Chuya allin mayumanmi puśhaycuśhä;
mana mitcacunanpä cä tuqui allin caminupam puśhaycuśhäpis.
Israelpa taytanmi yaꞌa cayá.
Efrainñatacmi wamä chulí.
10 “Yaꞌa Tayta Dios nishäta am nasyuncuna,
uyalipäcuy.
Lamar patanćhu cä calu malcacunäćhu willacalcämuy:
‘Israelta chiꞌichïcämi canan juntuycamun.
Uwish michïca uwishninta licaycücänümi
canan ñawillanćhu caycachinꞌa’ nil.
11 Yaꞌa Tayta Diosmari Jacobpa malcanta juluycuśhä;
sumä munayniyu nasyunpa maquinpïtamá libraycuśhä.b
12 Paycuna Sionpa ulꞌuncunaman cushishamá taquishtin śhapämunꞌa.
Yaꞌa Tayta Dios allin uycuśhäcunapi
tantanpi,
bïnunpi,
asaytinpi,
chaynütac uwishnincunapi,
wäcancunapïmari cushiculcanꞌa.
Paycunap cawsaynin tuqui
allin rïgaśha wirtanümá caycälinꞌa.
Manañamá imaypis ñacapäcunꞌachu.c
13 Chaymi cushicuypi lasaccunaca,
müsucunaca,
awquishcunäpis tuśhupäcunꞌa.
Yaꞌamá cunsuylaycuśhä.
Llaquicuynintamá cushicuyman muyuycachishä;
nanaynintamá sumä cushicuyman ticlaycachishä.
14 Sasirdüticunäman achca-achca micuycunactam uycuśhä;
nunäcunamanpis allincunäwanmi juntaycachishä.
Yaꞌa Tayta Diosmari niyá” nil.
15 Tayta Diosmi nin:
“Rama malcaćhümi llaquicuyta
waꞌacuyta,
awćhuyta uyalí.
Raquelmá wawincunapïta mamay-taytayta awćhuyan.d
Wawincuna wañucuptinmá cunsuylaycuśha
cayta manaña munanchu” nil.e
16 Tayta Diosmi nin:
“Raquel,
amaña waꞌaychu.
Wiꞌiniquita amaña jićhaychu.
Lulayniquipi uycuśhamari caycunqui.
Ćhïnicüniqui nasyuncäpi
wawiquicuna cutipämunꞌamá.
Yaꞌa Tayta Diosmari niyá.
17 Śhamü timpućhu allincämi alcaycuyäśhunqui;
malcayquimanmá wawiquicuna cutipämunꞌa.
Yaꞌa Tayta Diosmari niyá.
18 Efrain waꞌacuśhanta,
quijacuśhanta uyalilämá:
‘Chucaru malta wäcactanümá asutiycamälanqui,
lawćhaycamälanqui.
Anman cutiycachillämay;
amlla Tayta Diosní captiquimá
amllaman cuticamuśhä.
19 Ampïta japächacülämi;
ñatac cananꞌa wanacülüñamá.
Mana allinta lulaśhäpi tantiaculcul
maquïtapis tällalcul-tällalculmi llaquiculá.
Müsu caśhäpi mana allin lulaynïcunapïtamá
pinꞌacüśha,
uyshuläśha cayällá’ nil nishanta.
20 “Efrain,
¿am manachun cuyay chulí canqui imamá?
¿Manachun ama-pacha nishá walaśhaní canqui imamá?
Ampïta limal cuyaywanmi niycú.
Ampïta śhunꞌüpis alalaycunmá.
Amta sumämi llaquipaycuc.
Yaꞌa Tayta Diosmari niyá.
21 “Umricta manalä lisï cuyaśhá Israel,
cuticamuy.
Lishayqui caminunllanpa malcayquiman cuticamuy.
Caminu lishayquiman śhaywaycuyꞌari.
Mayninpa lishayquicunactapis siñalacuycuy.
Mayannin caminu caśhantapis sumätari licacuycuy.
22 Cullu linli walmi,
¿imaycamañamá pantäśha pulinqui?
Cay allpäćhu yaꞌa Tayta Diosmá muśhüta camaycachí:
Walmica wayapantam aśhcapanꞌa” nil.f
Śhamu timpućhu israelcunaca allin caycälinanpämi willacun
23 Israelpa sumä munayniyu Tayta Diosninmi nin:
“Puntacta yaćhapäcuśhanmanmi Juda läducunäta prïsu caśhanpi cutichimuśhä.
Chay malcanćhu caśhan cayalcalñam nipäcunꞌa:
‘Allin tincüninman lulaycuylla cä chuya ulꞌucta,
allin caycunanpä Tayta Dios niycuchun’ nil.
24 Chayćhümi caśhan cusca yaćhapäcunꞌa Juda lädu nunacunaca,
malcacunäćhu yaćhäcunaca,
ćhaclaćhu luläcunaca,
uwishniyücunäpis.
25 Pishipäśha cäcunäta yaꞌami upyaycachishä.
Pasaypi cäcunäta yaꞌami maćhaycachishä” nil.
26 Chaynu niyäta uyalïlulmi lichcapacülú.
Tuquishllactamá suyñucüñä cá.
27 Tayta Diosmi nin:
“Israel lädućhu,
Juda lädućhu nunacunactapis,
uywacunactapis milachiná timpu śhayämunmi.
28 Paycunacta maynümi wicapälá,
camacaycülá,
pampaman muyüchilá,
cućhpachilá,
llaquimanpis ćhulayculá,
chay jinaśhänümá paycunacta śhalcachinäpäpis lantaycunäpäpis caycuśhä.
Yaꞌa Tayta Diosmari niyá.
29 “Chay timpucunaćhu manañamá yapa nipäcunꞌachu:
“ ‘Puchucü übacta taytancuna micäläliptinmá
chulincunap quiluncuna lluy śhallälälin’ nil.g
30 “Aśhwanpa puchucü übacta micücäpa quiluncuna śhallanꞌamá.
Lluymi quiquinpa mana allinninmannu-cama wañupäcunꞌa” nil.h
Mushü limalicuyta limalicunanpämi nin
31 Tayta Diosmi nin:
“Israelcunäman,
Judäcunäman juc muśhü limalicuyta limalicuná muyun śhayämunmi.i
32 Chay limalicuyní manamá Egiptopi awquilluncunacta maquillapi julamuśhäćhu limalicuśhänüchu canꞌa.
Masqui paycunapä wayapannu caycuptïpis,
paycunañatacmi limalicuśhäta jalutacälälin.
Yaꞌa Tayta Diosmari niyá.
33 “Chay muyunćhu Israel malcaman limalicunäca caymi:
Camachicuynïta umanmanmi ćhulaycuśhä;
śhunꞌunmanpis isquirbiycuśhämi.j
Yaꞌami Tayta Diosnin caycuśhä;
paycunañatacmi malcá capäcunꞌa.
34 Manañam malca-masinta,
nuna-masincunactapis yaćhachinan canꞌañachu:
‘Tayta Diosninchicta lisilpuy’ nil.
Uchuchäcunällapi aśhta jatućhäcamañamari lluy-lluy lisipämanꞌa.
Yaꞌami juchancunacta pampachaycul manaña imaypis yalpalcuśhäñachu.k
Yaꞌa Tayta Diosmari niyá” nil.
35 Tayta Diosmi intïta lulaycun muyuncäta acchinanpä,
uyllurcunätawan quillätañatac tutäta acchinanpä,
lamarcätañatac mächicachin yacucta apalichinanpä.
Paypa śhutin sumä munayniyu Tayta Diosmá.
36 Tayta Diosmi nin:
“Cay camachishäcunaca
mana chincaśhannümi Israelpa milaynincunapis
manaña chincanꞌañachu.l
Yaꞌa Tayta Diosmari niyá.
37 Sïlüta tupuyta atipaptinchicꞌa,
cay allpäpa
simintun imanuy caśhantapis
yaćhaycuptinchicꞌa Israelpa milaynincunacta
manañam licayta munämanchu sumä
mana allincunacta lulaśhanpïta.
Yaꞌa Tayta Diosmari niyá” nil.
38 Tayta Diosmi nin:
“Tayta Diospa malcan caśhan śhalcachisha canan timpu śhayämunñamá;
Hananeel türripïta aśhta Isquina Puncu nishancamamá śhalcachiśha canꞌa.
39 Malcap lindïruncunacta tupunaca dirichullam linꞌa Gareb ulꞌuchacama;
chaypïta Goa lädupam muyumunꞌa.
40 Chaynütac ayacunacta,
ućhpacunacta wicapana pampa,
jinaman lluy ćhaclacuna aśhta Cedron mayücama,
chaynütac inti yalamunan lädućhu Cawallup Puncun nishancamam Tayta Diosllapä japächaycuśha chuya caycälinꞌa.
Chay malca manañamá imaypis apaśhañachu canꞌa,
nï pampaman muyuchishañachu canꞌa” nil.