Prïsu quïdä cäcunäta caśhan cutichimunanpämi willacun
30
Tayta Diosmi Jeremiasta nin:
2 “Israelpa yaꞌa Tayta Diosnin willacunayquipä lluy nishäcunacta juc libruman isquirbiycuy.
3 Cay Israel,
Juda läducta prïsu puśhaśha capäcuśhanpïta cutichimuná muyun jiꞌacaycayämunñamá.
Yaꞌa Tayta Dios awquilluncunaman uycuśhá allpaman cutichimuptí paycuna duyñuchacaycälinꞌamá” nil.
4 Cay Israel,
Juda läducunäpïmari Tayta Dios caynüta nin:
5 Yaꞌa Tayta Diosmi ní:
Sumä manchanaśh ayaycaćhayllactamá uyalinchic.
Manamá jawca caycuy canchu.
6 Má,
¿juc wayapa waćhacunmanchun imatá?
Chayurá ¿imapïmá lluy wayapacunaca
waćhacü walmip nanayninwan cayänu
wiyawninman maquinta ćhulacälälisha intiycaćhayalcan?
¿Imapïmá pasaypi alma cärälälisha cayalcan?
7 Ay,
sumä llaqui muyunmá jiꞌacaycayämun.
Chay muyuncänuꞌa manamá juc canꞌachu.
Jacobpa milaynincunapä ñacay timpumá śhacayämun.
Ñatac chaypi libraycuśhamá capäcunꞌa.
8 “Sumä munayniyu Tayta Diosmi ní:
Chay muyunmi malcäta chalaläśhan
yügucta paquïshä;
latiguctapis laćhüśhämá.
Juc lädu nasyuncunap uywaynin manañamá capäcunꞌañachu.
9 Aśhwanpa yaꞌa Tayta Diosllactawan
mandacüniquipä ćhulaycuśhá Davidllactañamá sirbiycälimanqui.
10 “Yaꞌa Tayta Diosmi ní:
Sirbïní Jacob,
ama manchaculcaychu.
Israel malca,
ama chucchupäcuychu.
Amtawan milayniquita chay calu nasyunćhu prïsu capäcuśhayquipïmia libraycälishayqui.
Am Jacob,
chaypi cutipämulmi jawca
allinllaña caśhan cawsaycälinqui.
Mayanpis manañamá manchachipäcuśhunquiñachu.
11 Salbaycunacpä yaꞌa Tayta Diosmi amwan cayá.
Amta puśhachishá nasyuncunätamá camacaycüśhä.
Amtañatacmi ichá nï camacaycüśhayquichu,
sinuꞌa tincüllayquimanmi mućhuycachishayqui.
Manamá mana mućhuycachishactá
caćhaycucmanchu.
12 “Yaꞌa Tayta Diosmi ní:
Däñacuśhayquica
jampiyta mana atipanañamá cayan.
Mana allinniqui allinyachiyta mana atipanañamá cayan.
13 Limalcüniqui manañamá mayanpis canñachu.
Allinyachishunayquipä manañamá ima jampipis canñachu.
14 Lluy waynayquicunapis unꞌälälishunquiñamá.
Paycunacta imapis manañamá ucunchu.
Achca juchayquicunapïmá,
achca mana allin lulayniquicunapïmá
ćhïnicünïtanu sumä-sumäta camacaycülac,
juyu nunacta mućhuycachishänu mućhuycachilac.
15 ¿Imapïmá nanayniquicunapi quijacunqui?
Nanayniquiꞌa mana jampiycunañamá cayan.
Achca juchayquicunapïmá,
achca mana allin
lulayniquicunapïmá chaynu lulayculac.b
16 “Ñatac lluy lacsaśhüniquicuna
lacsaśhamá capäcunꞌa.
Lluy ćhïnicüniquicuna prïsu puśhaśhamá capäcunꞌa.
Jalutacuśhüniquicuna jalutacüśhamá capäcunꞌa.
Waycaśhüniquicuna waycaśhamá capäcunꞌa.
17 Masqui ‘jamuyäśha’ nipäcuśhuptiquipis
ütac ‘cay jitäśha Sionmá’ nipäcuśhuptiquipis
yaꞌami allinyaycachishayqui;
dañäduyquitapis jampiycuśhayquim.c
Yaꞌa Tayta Diosmari niyá” nil.
18 Tayta Diosmi nin:
“Jacobpa milaynin
apaśha cäcunäta caśhanmi cutichimuśhä.
Paycunacta llaquipaycuptïmi,
pampaman muyuchisha cä Jerusalen malca,
caśhan śhalcachisha canꞌa;
palasyunpis caśhan śhalcachishamá canꞌa.
19 Chaycunap ćhawpinpïmi sulpäta ucuśhtin taquicuna,
sumä cushicuypi apaliycuna yalamunꞌa.
Milaynincunacta milaycachishämari;
manamá mirmaycunꞌachu.
Altumanmá juluycuśhä;
manamá jamuyäśhachu capäcunꞌa.
20 Puntanümi milaynincuna capäcunꞌa.
Yaꞌapa ñawpänïćhümi malcan tacyaycachisha caycunꞌa.
Ñatac lluy ñacachïnincunacta mućhuycachishämá.
21 Quiquincunapïmá mandacünin yalamunꞌa;
quiquincunapïmá puydïnin yalamunꞌa.
Yaꞌaman aśhuycamunanpä quiquïmá niycuśhä;
chaymi pay aśhuycapämunꞌa.
Yaꞌa mana niycuptí ¿mayanmá yaꞌaman aśhuycamunman?
Yaꞌa Tayta Diosmari niyá.
22 Amcunam malcá capäcunqui;
yaꞌañatacmi Diosniqui caśhä” nil.
23 Tayta Diospa piñacuynin
sumä-sumä lücu tamyanümá yalayämun;
mana allin nunacunäta nisyu-nisyu
lücu waywanümá camacaycülunꞌa.
24 Tayta Diospa walayä sumä piñacuynin
manamá chaśhnulpunꞌachu,
śhunꞌunćhu lulayta munaśhanca lulacänancama.
Ñatac caycunacta tantiapäcunqui
lluy lulacacunan timpu ćhämuptinñamá.d