Hanameelpa ćhaclantam Jeremias lantin
32
Juda läducta mandacü Sedequiasa ćhunca wataña mandacuyaptinmi Jeremiasta Tayta Dios nila.
Awari,
chay timpu Nabucodonosor ćhunca pusäniyu (18) watañam mandacü cayäla.
2 Chay timputacmi Babiloniap mandacüninpa pilyänincuna Jerusalenpa muyülïninćhu lluy cunćhalayalcäla.
Willacü Jeremiasñatacmi Juda lädu mandacücäpa palasyunpa patyunćhu cä carsilninćhu prïsu wićhalayäla.
3 Juda lädup mandacünin Sedequiasmari wićhächila cay nil:
“Imapïtá Tayta Diospa willacünintuculcul niyanqui:
‘Tayta Diosmi nin:
“Cay malcacta Babiloniap mandacüninpa munayninmanmi ćhulaycuśhä maquinćhu cananpä.
4 Juda lädu mandacünin Sedequias manamá Caldeo läducunäpi ayiyta atipanꞌachu.
Aśhwanpam Babiloniap mandacüninpa maquinman ćhulaycuśha cayal cära-cära licanaculcanꞌa.
5 Chayćhümi Babiloniaman Sedequiasta puśhacunꞌa.
Chayćhümi yalpanäcama camunꞌa.
Masqui Caldeo läducunäwan pilyapäculpis manañamá llalliyta atipapäcunquichu.
Yaꞌa Tayta Diosmari niyá” ’ ” nil.
6 Jeremiasñatacmi nin:
“Tayta Diosmi caynu nimäla:
7 ‘Tiyuyqui Salumpa chulin Hanameelmi anman śhamunꞌa Anatot partićhu ćhaclanta lanticuśhunayquipä.
Paypa lijitimu ayllun caśhayquipam julucunayqui’ nil.
8 Chay Tayta Dios nishannümi prïmú Hanameel śhamuña patyućhu wićhaläśhäcäpa puncunman.
Chayćhümi nimäla:
‘Benjamin lädućhu cä Anatot malcaćhu ćhacläta lanticüśhayqui.
Am lijitimu ayllú caśhayquipam julucunayqui,
lantinayqui’ nil.
Chaynüpamá Tayta Diospa willacuynin caśhanta tantialá.
9 “Chaymi prïmú Hanameelpi ishcay paćhacb (200) grämu illaywan lantïlá.
Paymi Anatot lädućhu cayäla.
10 Chay lantishäpi papilta lulanacuyculmi tistïgucunap ñawpäninćhu wićhayculá;
illaycätapis tupuyculmi uyculá.
11 Chaynu lulanaculcäśhá papilcäta tuqui wićhäshactam ćhasquiyculá;
cupyantañatacmi ichá mana wićhäśhallacta ćhasquiyculá.
12 Jinalculmi Neriaspa chulin Barucman uyculá.
Paymi Maasiaspa willcan cala.
Chay papiltamari prïmú Hanameelpa ñawpäninćhu lulanaculcäśhäta firmapäcuśhan tistïgucunap ñawpäninćhu,
carsilpa patyunćhu cä Juda lädu nunacunap ñawpäninćhu Barucman uyculá.
13 “Paycunap ñawpäninćhümari Baructa nilá:
14 ‘Israelpa sumä munayniyu Tayta Diosninmi nin:
Chay lulanacuśhá papilcunäta chalay,
cay wićhäśha cä papilcätawan mana wićhäśha cä papilcäta.
Jinalcul achca timpu cananpä wacuyman winäluy.
15 Chaynu lulaycunqui cay nasyunćhu ćhaclacunacta,
wasicunacta,
üba ćhaclacunacta yapa lantinayqui captinmi.
Israelpa sumä munayniyu yaꞌa Tayta Diosninmari niyá’ ” nil.
Tayta Diostam Jeremias mañacun
16 Chaynu Neriaspa chulin Barucman papilcunäta uyculmi Tayta Diosta mañaculá:
17 “Tayta Diosllay,
anmi sumä munayniquiwan lulayculanqui cay allpätapis,
sïlütapis.
Ampá manamá imapis sasa caycunmanchu.
18 Achca-achca nunacunämanmi cuyacuyniquita camalaycachinqui.
Chaynütacmi taytanpa mamanpa juchancunapïta milaynincunacta mućhuycachinquitac.
Jatun pudirniyu Tayta Dios,
śhutiqui Sumä Munayniyu Tayta Diosmá.
19 Tantiayniqui sumä allinmá.
Lulayniquipis sumä-sumämá.
Lluy nunacuna lulapäcuśhancunacta licayanquimá,
imam lulaśhanmannu-cama tincüninmannu-cama uycunayquipä.
20 Egiptopi israelcunäta julamulmi sumä imaymana milagrucunacta lulayculanqui.
Chaynüllam canancamapis israelcunäćhu jinantin allpäćhüpis lulaycuyanqui.
Chaynüpamá lluy-lluy nunacunäwan lisichiculanqui.
21 Israel malcayquita Egiptopïta julamulanqui imaymana milagrucunawan,
sumä munaywan manchachicuyta camalachishtinmari.
22 Awquilluncunaman limalicuśhayqui tuqui-tuquicta wayuycachï allpactamá Israelman uyculanquipis.
23 Chay allpaman yaycapäcul duyñuchacuyculñatacmi ichá nishayquita mana uyaliculcälachu;
camachishayquitapis mana cäsuculcälachu.
Lulapäcunanpä nishayquitapis manamá lulaycälilachu.
Chaymá chaynu imaymana mana allincunacta caćhaycamulanqui.c
24 Má licay,
Babilonia lädumá maquinćhu cachinanpä murällap muyülïninman allpacunacta juntülälin.
Chay ispädawan,
micuy wanaywan,
ishyaywanmá Babilonia läducunap maquinman palpupäcunꞌa.
Am nishayquinümá lluy lulacacuyan.
Canan ñawiquiwanmari licayanqui.
25 Caynu cayaptinpis Tayta Diosllay,
cay malca Babilonia läducunap maquinman palpunanpäña cayaptin,
¿imanuypamá niyämanquiman tistïgucunap ñawpäninćhu cay allpacta lantilcul pägaycunäpälä canpis?”
nil.
26 Niptinmi Jeremiasta Tayta Dios nin:
27 “Lluy cawsäcunäpa Tayta Diosninmari yaꞌa cayá.
¿Yaꞌapá imallá sasa canmantá?d
28 Chaymi yaꞌa Tayta Dios ní:
Cay malcacta Babilonia lädup mandacünin Nabucodonosorpa maquinmanmi jitaycüśhä.e
29 Cay malcaman Babilonia läducunaca yaycuyculmari cañaycälälinꞌa.
Yaꞌacta piñachimayninwan wasicunap altuśhnincunaćhu taytacha Baalman insinsiucta lupachipäcuśhancunactapis cañaycälälinꞌamá.
Jinaman juc taytachacunaman jićhaywan uycuśhan wasicunactapis cañaycälälinꞌamá.
30 Müsu caśhanpïmá Israel läduwan Juda lädu mana allincunällacta ñawpänïćhu lulapäcun.
Israelpa milaynincuna taytachacunacta lulapäcuśhanwanmá piñayalcächiman.
Yaꞌa Tayta Diosmi niyá.
31 “Cay malca śhalcachisha caśhan muyunpïtamá piñayalcächiman,
rabyayalcächiman.
Chaymi ñawpänïpïta chincächishä.
32 Piñachipämänanpä imaymana mana allincunacta lulapäcuśhanpïmá Israelpa,
Judapa milaynincunacta,
mandacünintinta,
puydïnintinta,
sasirdütintinta,
willacünintinta,
jinaman Juda lädućhu,
Jerusalen malcaćhu lluy cäcunätapis chincächishä.
33 Masqui cutipalcul-cutipalcul yaćhachiptïpis uyalicuyta,
allichacuyta manamá munapäculachu.
Paycuna ipanchälälimälam;
manañamá cuticalcämulañachu.
34 Aśhwanpam alawana wasïman millachicuy taytachancunacta ćhulaycälil anlaman muyülächin.f
35 Chaynütacmi Hinomg nishan pampaćhu taytacha Baalpa uycunancunacta śhalcachipäcula.
Chayćhümi Moloc taytachanmanh uycuyninwan walaśh-wamla chulincunactapis cañaycapäcula.
Chaynu millachicuy lulaycunacta lulapäcunanpä yaꞌa manamá nilächu,
nï pinsayllapis pinsalculächu.
Chaynüpamari Juda läducunäta juchacta lulachipäcula.
Śhamu timpucunaćhu Tayta Dios yanapänanpämi willacun
36 “Chaymi Israelpa yaꞌa Tayta Diosnin ní:
Am willacuyanqui:
‘Cay malca ispädawan,
micuy wanaywan,
ishyaywanmi Babiloniap mandacüninpa maquinman palpupäcunꞌa’ nil.
37 Chaynu cayaptinpis sumä piñacuynïćhu,
rabyacuynïćhu jinantin nasyuncunäman chiꞌichishäpïmi cutiycachimuśhä.
Cayman cutichimuptïmá jawca sigüru cawsaycälinꞌa.
38 Paycunam malcá canꞌa;
yaꞌañatacmi Tayta Diosnin caśhä.
39 Yaꞌallacta wiña-wiñaypä manchacalcämänanpämari allin tantiaytawan allin cawsayta uycuśhä.
Chaymi quiquincunapäpis milaynincunapäpis allinninpä caycunꞌa.
40 Paycunamanmi wiña-wiñaypä limalicuśhä;
imaypis paycunactamá yanapaycuśhä;
yaꞌapi mana japächaculcänanpämá śhuꞌunman manchacuyta ćhulaycuśhä.i
41 Allin cawsapäcunanpä yanapäśhäpïta cushicümá.j
Llapan śhunꞌüwan cuyalmi lantäśhactanu cay allpäćhu cawsaycachishä.
42 “Yaꞌa Tayta Diosmi ní:
Cay malcaman maynümi sumä ñacaycäta apamulá,
chaynüllatacmá lluy allincätapis apaycamuśhä.
43 Masqui cay malcapi caynu niyalcaptinpis:
‘Caldeo lädup maquinman palpulmi mana nunayüña,
uywayüña chunyanꞌa’ nil,
chaynu niyalcaptinpis amcuna cay malcaćhu ćhaclacunacta caśhanmá lanticanaculcanqui.
44 Benjamin ayllup allpancunaćhu,
Jerusalenpa muyülïnincunaćhu caśhanmi ćhaclacunacta illaywan lantipäcunqui.
Papilta lulanacaycälilmi tistïgucunap ñawpäninćhu wićhapäcunqui.
Chaynümi Juda lädu malcacunäćhu,
pampacunäćhu,
Sefela,
Neguev läducunaćhüpis lantipäcunqui.
Yaꞌamari Babilonia lädupi prïsu puśhaśha cäcunäta cutichimuśhä.
Yaꞌa Tayta Diosmari niyá” nil.