Anćhish ćhunca wata ñacaypïmi willacun
25
Juda läducta Josiaspa chulin Joacima mandacuyaptinmi,
chaynütac Babiloniacta mandacü Nabucodonosor wamä wataćhu mandacuyaptinmi yaꞌa Jeremiasman cay willacuyta Tayta Dios niycamäla.
2 Chaymi Juda läductawan Jerusalenćhu lluy yaćhäcunäta yaꞌa willacü Jeremias nilá:
3 “Amonpa chulin Josias ćhunca quimsayu (13) wata Juda läducta mandacü caśhanpïtañamá canancama Tayta Dios amcunaman willaycunacpä nimäśhanta willapayalcac.
Chaynu ishcay ćhunca quimsayu (23) wataña willay-willay cayalcaptïpis amcuna manamá uyaliculcanquichu.
4 “Jinaman yapalcul-yapalculmi willacünincunacta Tayta Dios amcunaman caćhamula.
Amcunañatacmi ichá mana uyaliculcälanquichu nï cäsuculcälanquichu.
5 Willacücunämari nipäcuśhulanqui:
‘Mana allin cawsayniquicunacta,
lulayniquicunacta caćhaycapäcuyña.
Chayćha awquilluyquicunaman,
amcunaman Tayta Dios uycuśhuśhayqui allpaćhu wiña-wiñaypä cawsapäcunqui.
6 Chay taytachacunaman amaña cürriyalcaychu,
sirbiyalcaychu nï alawayalcaypischu.
Chaynu lulapäcuśhayquiwan Tayta Diosta amaña piñayalcächiyñachu.
Chayćha manaña mućhuchipäcuśhunquiñachu’ nil.
7 “Ñatac Tayta Diosninchic willacachimuśhancunäta amcuna manamá uyaliculcälanquichu.
Aśhwanpa taytacha lulaśhayquicunäwanmá piñachipäculanqui quiquiquicunap mana allinniquipä.
8 “Chaymi sumä munayniyu Tayta Dios nin:
‘Willacuynïta amcuna mana cäsuculcäśhayquipïmi,
9 nurti lädupi lluy malcacunäta,
Babiloniap mandacünin sirbïní Nabucodonosortapis juntumuśhä.
Cay nasyunpa,
cay nunancunap jinaman muyülïninćhu cä malcacunäpa cuntranmari lluyta puśhachimuśhä.
Paycunacta camacayculmá pasaypi pampaman muyüchishä,
manchacuyllaćhu cachishä;
jinaman jamuyäśham capäcunꞌapis.
10 Paycunapïta cushicuycunacta,
asicuycunacta,
casaracuy fistacunactapis chincächishämá.b
Malaynincunap suynayninpis manañamá canꞌachu;
acchincunapis manañamá latanꞌachu.
11 Chay jinantin nasyunmi pasaypi pampaman muyüchisha canꞌa.
Chay nasyuncunam Babiloniap mandacünin Nabucodonosorta anćhish ćhunca (70) watac sirbipäcunꞌa.
12 “ ‘Chay anćhish ćhunca (70) wata camacäluptinñatacmi Babiloniap mandacüninta,
Caldeo lädu nunacunätapis mana allin lulaynincunapïta mućhuycachishä.
Wiña-wiñaypä pasaypi pulumäśhamanmá muyüchishä.
Yaꞌa Tayta Diosmari niyá.
13 Chay Caldeo lädup cuntran lluy willacachishämannümá lulaycuśha canꞌa.
Chaynütac cay librućhu isquirbïsha caśhanmannu lluy nasyuncunap cuntran Jeremias willacuśhanmannümá lulaycuśha canꞌa.
14 Paycunapis jatun nasyuncunap munayninćhümá capäcunꞌa;
sumä munayniyu mandacücunap maquinćhümari capäcunꞌa.
Lluy mana allin lulaynincunaman tincütamá uycuśhä’ ” nil.
Lluy nasyuncunacta mućhuycachinanpämi willacun
15 Israelpa Tayta Diosninmi niman:
“Cüpaćhu cä piñacuynïta cay maquïpïta chalay.d
Cay cüpacta caćhaśhá lluy nasyuncunämanmi upyachimunqui.
16 Paycuna upyapäcul chucchupäcunꞌam;
lücuyaytamá allacaycälinꞌa;
paycunaćhu gïrra cananpä caćhamuptïmari chaynu capäcunꞌa” nil.
17 Nimaptinmi Tayta Diospa maquinpïta piñacuynin cä cüpacta aptilcul pay caćhamäśhan lluy nasyuncunäman upyächilá.
18 Chaynu Jerusalenta,
Juda lädu malcacunäta,
mandänincunacta,
puydïnincunacta upyächilá pasaypi chunyä chaqui allpaman licalïchinäpämi.
Chaynu manchacuyllaćhu,
mana allinllaćhu,
jamuyäśha canancama caśhannu capäcunanpämari upyächilá.
19 Chaynütacmi upyächilá:
Egiptop mandacünin Faraoncäta,
yanapänincunacta,
puydïnincunacta,
jinantin malcäta,
20 chay nasyunćhu juc caśhta yaćhäcunäta,
Uz nasyunćhu mandacücunäta,
Filisteo lädućhu cä Ascalonpa,
Gazapa,
Ecronpa mandacünincunactapis,
jinaman Asdodćhu puchücunätapis.
21 Chaynütacmi upyächilá:
Edom,
Moab nasyunćhu cäcunäta,
Amonpa milaynincunacta,
22 Tirop,
Sidonpa mandacünincunacta,
lamarpa patanćhu cäcunäpa mandänincunacta,
23 chaynütac Dedan,
Tema,
Buz,
ächanta siplay-siplayta lutucü malcacunätapis.
24 Chaynütacmi upyächilá:
Arabia lädup mandacünincunacta,
chunyäcäćhu lluy yaćhäcunäpa mandacünincunacta,
25 jinaman Zimrip,
Elampa,
Mediap mandacünincunacta,
26 nurti lädućhu lluy mandacücunäta masqui sircaćhu ütac calućhu cäcunäman;
chaynütac jinantin allpäćhu cä mandacücunämanpis piñacuyninta upyächilämi.
Chaypïtalämi Babiloniap mandacünin upyanꞌa.
27 Israelpa sumä munayniyu Tayta Diosninmi paycunaman willacunäpä niman:
“Shincanancama,
cutichicunancama,
śhalcuyta manaña atipänancama piñacuynïta upyapäcuchun.
Chaynu capäcunꞌa paycunaćhu gïrra cananpä camachiptïmari.
28 Chay cüpa uycuśhayquita mana ćhasquiyta nï upyayta munaptinꞌa ninquim:
‘Sumä munayniyu Tayta Diosmi nin:
Munalpis mana munalpis upyapäcunayquim.
29 Aclacuśhá malcäpïtam mućhuchiyta allaycuśhä.
¿Amcuna libraculcanquichun imatá?
Jinantin allpäćhu cäcunämanmá gïrracta śhalcachishä.
Yaꞌa sumä munayniyu Tayta Diosmari niyá’ nil.
30 “Paycunap cuntranmi am willacunqui cay nil:
“ ‘Janaypïmi Tayta Dios sumä-sumä limalpämun.e
Chuya yaćhaśhancäpïmi Tayta Dios ayalpämun.
Lluy malcanpa cuntranmi apalcaćhayämun;
übas jalücunänümi apaliyämun;
cay allpäćhu yaćhäcunäpa cuntranmi ayalpämun.
31 Tayta Diospa sumä-sumä
limalpamuśhanca jinantin allpäpa
tunänincamam uyalisha canꞌa.
Tayta Diosmi lluy nasyuncunäta cäraycunꞌa.
Pay jinantin nunacunäpä cäraycüninmá cayan.
Chaymi mana allin nunacunäta ispädawan camacaycülunꞌa’ nil.
32 “Sumä munayniyu Tayta Diosmi nin:
‘Sumä ñacaycunaca nasyunnin-nasyunninmi ćhanꞌa.
Jinantin allpäpïmi sumä-sumä
lücu waywanu śhalcämunꞌa’ ” nil.
33 Chay muyunćhu Tayta Dios wañuchishancunaca allpäpa juc lädu manyanćhümi maśhtalapäcunꞌa.
Manam mayanpis waꞌapäcunꞌachu nï pallalcapäcunꞌachu nï pampaycälinꞌapischu.
Pampäćhümari ismaynu jitalapäcunꞌa.f
34 Am,
uwish michïnu cä puydïcuna,
apalcaćhapäcuy,
waꞌapäcuy.
Am puśhäcuna allpäćhu cućhpaycaćhapäcuy.
Muꞌuśha,
chiꞌisha canayqui üra jiꞌacaycayämunñamá.
Sumä ćhaniyu wacuycänümá amshüśha capäcunqui.
35 Am,
uwish michïcuna manañamá ayiyta atipapäcunquiñachu;
puydï puśhäcuna manañamá salbacuyta atipapäcunquiñachu.
36 Pastuncunacta Tayta Dios
camacaycüluptinmi michïcunaca apalcaćhayalcan;
puydï puśhäcunaca llaqui-llaquicta awćhuyalcan.
37 Tayta Diospa sumä piñacuyninwanmá
sumä tuqui-cama pastucunäpis camacaycüśha capäcunꞌa.
38 Juc malta liyun maćhayninta caćhaycücänümá
malcanta pay caćhaycülun.
Tayta Diospa piñacuyninwan ćhïnicüninpa
ispädanmi jinantin allpäta pampaman muyüchishacta caćhaycülun.