Jeremiastam wañuchiyta munapäcun
26
Josiaspa chulin Joacim,a
Juda lädućhu mandacuyta allaycuyaptinmi Jeremiasta Tayta Dios nin:
2 “Tayta Diospa alawana wasinpa patyunćhu śhäcuy.
Chay alawana wasiman Juda lädućhu cä lluy malcacunäpi śhamücunämanmi lluy willaycuśhäcunacta niycunqui.
Jucllayllactapis mana caćhayculmi lluy-lluyta niycunqui.
3 Ichaläpis uyaliculcal chay mana allin lulaynincunapïta wanaculcanman.
Chayurá chay mana allin lulaynincunapi manañam yaꞌapis lawćhaycuśhächu.
4 “Yaꞌa Tayta Dios nishacta niycamuy:
‘Yaćhachishacta amcuna mana uyaliculcaptiquiꞌa,
cäsuculcaptiquiꞌa,
5 chaynütac willapäcuśhunayquipä yapalcul-yapalcul caćhamuśhá willacünïcunactapis mana cäsuculcaptiquiꞌa,
6 Silo malcactab camacaycuśhänümá cay alawana wasïwanpis lulaycuśhä.
Jinamanꞌa cay Jerusalen malcäpis jinantin allpäćhu cä nasyuncunäpä jamuyäculcänan,
palaculcänallanmá canꞌa’ ” nil.
7 Niptinmi Jeremias alawana wasićhu sasirdüticunäta,
willacücunäta,
jinantin malcäta willacula.
8 Chaynu Tayta Dios nishancunäta willacuyta camacäluptinmi sasirdüticunaca,
willacücunaca,
jinantin malcaca chalalcälil:
“Canan wañunquim.
9 Cärayqui cañächun Tayta Diospa śhutinćhülä willacuyänayquipä:
‘Silo malcanümi cay alawana wasipis muyüchisha canꞌa.
Cay Jerusalenpis mana nunayüñamá pulumanꞌa’ nil” nicuyalcan.
Chaynu nilmi alawana wasićhu cä lluy nunacunaca Jeremiasman shipucälälin.
10 Chaynu pasaśhanta Juda lädup puydïnincuna uyalïlälilmi mandacücäpa dispächunpïta lipäcula Tayta Diospa alawana wasinman.
Chay Muśhü Puncu nishan yaycunancäćhümi cäraycälinanpä taycacaycälila.
11 Chayćhümi chay puydïcunäman,
jinantin malcäman sasirdüticunaca,
willacücunaca nicuyalcan:
“Amcuna uyaliyalcanquimá cay malca pampaman muyuchisha cananpä willacuśhanta.
Chayurá cay nuna wañunanmi” nil.
12 Jeremiasñatacmi puydïcunätawan jinantin malcacta nin:
“Tayta Diosmi caćhamäla cay alawana wasip,
Jerusalen malcap cuntran willacunäpä.
Chaytamari canan uyaliyalcanqui.
13 Chayurá cawsayniquicunacta,
lulayniquicunacta allichaculcal Tayta Diosninchicta cäsuculcay.
Chayćha mućhuchishunayquipä willacachishancunäta Tayta Dios manalcunꞌa.
14 Yaꞌañatacmi ichá amcunap maquiquićhu cayá.
Chayurá munaśhayquita yaꞌawan imactapis lulaycuy.
15 Ñatac caytam yaćhapäcunayqui:
Yaꞌacta wañülächimalꞌa mana juchayu nunactam wañülächinqui;
chayurá cay malcawan,
jinantin nunacunäwanmi juchayu capäcunqui.
Rasunpa,
yaꞌacta Tayta Diosmi amcunaman caćhamäla cay uyalishayquicunäta willaycälinacpä” nil.
16 Niptinmi sasirdüticunätawan willacücunäta puydïcunaca,
jinantin malcaca nipäcun:
“Cay nuna Tayta Diospa willacuyllantamá willaycayämanchic;
manamá wañuchisha canmanchu” nil.
17 Chayćhu waquin yaśhacunäñatacmi śhalcuculcul jinantin juntulä malcäta nin:
18 “Juda läducta Ezequias mandacuśhan timpu,
Moreset malcayu willacü Miqueasmi,
sumä munayniyu Tayta Dios willacachiptin nin:
“ ‘Äräśha ćhaclanümi Sion licalinꞌa;
pampaman muyüchishamá Jerusalen canꞌa.
Ulꞌućhu cä alawana wasipis munticunap
juntäśhamá canꞌa’ nil.c
19 “Chaynu niptin mandacü Ezequiaswan Juda lädu lluy nunacunaca ¿Miqueasta wañülächilachun imamá?
Aśhwanpa mandacü Ezequias Tayta Diosta manchaculmi llaquipaycälinanpä mañacula.
Chaymi willacachimuśhan mućhuchicuywan Tayta Dios manaña lawćhayculachu.
Chaychun canan,
¿cunca cuchuyninchicta yaꞌanchic ashicuyachwan imamá?”
nil.
20 Juc timpućhümi Quiriat-jearim lädupi cä Semaiaspa chulin Uriaspis Tayta Diospa willacünin cala.
Paypis Jeremiasnümi cay nasyunpa,
cay malcap cuntran willacula.
21 Chay willacuśhanta mandacü Joacim,
puydïnincuna,
yanapänincuna uyalipäculam.
Chaymi mandacüca wañüchiyta munala.
Ñatac Uriasꞌa chayta yaćhälulmi manchacul Egiptocta ayicula.
22 Jinaptinmi mandacü Joacim Egiptoman caćhala Acborpa chulin Elnatanta juc wayapacunactawan cuscacta.
23 Paycunam Egiptopïta Uriasta julalcälimul mandacü Joacimman cutichipämula.
Payñatacmi Uriasta ispädawan wañulcachil,
wacchacuna pampacunan ućhcuman wicapalpächila.
24 Chaynu captinpis Safanpa chulin Ahicanmari Jeremiasman śhalcula.
Chaymi wañuchinanpä manaña nunacunäpa maquinman ćhulaycapäculañachu.