Allin mana allin ïgusmanmi tincuchin
24
Babiloniap mandacünin Nabucodonosormi nasyunninman prïsu puśhacula Joacimpa chulin Juda lädup mandacünin Jeconiastawan puydïnintinta.
Chaynütac Jerusalenćhu ima labrayta yaćhäcunäta,
jïrru tacäcunätapisa puśhaculamari.
Chaynu puśhacuptinñam alawana wasip puntanćhu ishcay canaśhtaćhu ïgus cayalcäta Tayta Dios licächiman.
2 Chay jucnin canaśhtaćhümi wamä puꞌuśha ïguscuna cayalcäña;
juc canaśhtaćhüñatacmi micunapäpis mana bälï ïguscuna cayäña.
3 Chayćhümi Tayta Dios niman:
“Jeremias,
¿imactam cayćhu licayanqui?”
nil.
Nimaptinmi:
“Licayá,
allin ïguscunaca allin-cama caśhantam;
mana allin ïguscunäñatac micunapäpis mana bälï caśhantam” nilá.
4 Chayćhümi Tayta Dios niman:
5 “Israelpa yaꞌa Tayta Diosninmi caynu ní:
Cay allin ïguscunätanümi allinpä licaycú Babilonia läduman prïsu puśhachishá Juda läducunäta.
6 Paycunacta ñawilläćhu licayculmi cay allpanman cutichimuśhä.
Śhalcachishämari;
manam pampaman muyuchishächu.
Tacyaycachishämari;
manam wicapäśhächu.
7 Yaꞌa Tayta Dios caśhäta lisimänanpämi tantiayta uycuśhä.
Chaynu llapan śhunꞌunwan yaꞌaman cuticalcämuptinꞌa paycuna malcämi canꞌa;
yaꞌañatacmi Tayta Diosnin caśhä.
8 “Ñatac micunapäpis mana bälï ïgustanümi licaycuśhä,
Juda lädup mandacünin Sedequiasta,
puydïnincunacta,
Jerusalenćhu quïdäcunäta,
cay nasyunćhu puchücunäta,
jinaman Egiptocta liculcal chayćhu yaćhäcunätapis.
9 Paycunacta mućhuycachishä jinantin nasyuncunaca manchacuyllaćhu capäcunanpämá.
Mayman aluśhäćhüpis nunacunaca jamuyapäcunꞌamá,
asipäculcanꞌamá;
mayman chiꞌichishäcäćhüpis mana allinpä licaśhamá capäcunꞌa.
10 Paycunamanmi gïrracunacta,
micuy wanaycunacta,
ishyaycunactapis caćhaycuśhä.
Chay awquilluncunaman,
paycunaman uycuśhá allpaćhümari pasaypi camacapäcunꞌa” nil.