Prïsu puśhaśha quïdäcuna cutipämunanpïtam willacun
23
Tayta Diosmi nin:
“Imanuylä capäcunqui mana allin uwish michïcänu cä puydïcuna.
Amcuna licaycälinayquitá chiꞌilcachilmá camacaycälälinqui” nil.a
2 Chaymi malcäpa michïnincunacta Israelpa Tayta Diosnin nin:
“Amcunam uwishnïcunacta chiꞌichipäcunqui;
ñawillayquićhu mana caycachilmá alapacälälinqui.
Chaymi chay mana allin lulayniquipi canan mućhuycachishayqui.
Yaꞌa Tayta Diosmari niyá.
3 Parti uwishnïcunacta yaꞌa quiquïmá cutichimuśhä.
Jinantin nasyuncunaman chiꞌichishäpi cay pastuncunaman cutichimuptïmi wiñapäcunꞌa,
milapäcunꞌa.
4 Ñatac paycunacta ñawillanćhu caycachil michiycunanpämi juc michïcunacta ćhulaycuśhä.
Chaymi manaña manchaculcänan,
buryapäcunan canꞌañachu,
nïtac jucllanpis chincaycunꞌañachu.b
Yaꞌa Tayta Diosmari niyá.
5 “Śhayämunmi timpu
Davidpa milayninpi mandacü cananpä.
Paymi cällanman,
tincüllanman allincällacta
lulaśhtin cay allpäćhu mandacunꞌa.
6 Pay mandacuyaptinmi Juda lädu salbaycuśha canꞌa;
Israel lädupis jawcallam cawsaycunꞌa.
Chay mandacücämi lisisha canꞌa:
‘Tayta Diosmi tincüllanman
licaycamäninchic’ nishan śhutiwanlä canpis” nil.c
7 Tayta Diosmi nin:
“Chay ‘Egiptopi Israelcunäta julaycamü Tayta Diosta tistïgupä ćhulayculmi limalicú’ nil manaña limaliculcänan muyun śhayämunñam.
8 Aśhwanpa limaliculcanꞌa cay nilmi:
‘Nurti lädupi israelcunäta julaycamü,
jinantin nasyunman chiꞌichishanpi quiquinpa allpanman cutiycachimü Tayta Diosta śhaycaycachilmi limalicú’ nil.d
Chaynu juntuycamuptïmi quiquinpa allpanćhüña yaćhapäcunꞌa” nil.
Tayta Diospa willacüninpa pasachicücunätam anyapane
9 Tayta Diospa willacünintucul pasachicücunätam nin:
Śhunꞌümi nanaypa-nanaycaman.
Jinantin tullümi chucchuypa-chucchuyällan.
Sumä shincäśhanümi,
bïnuwan
lluy apachicüśhanümi cayá.
Tayta Dios nishanta uyalilmari
chaynu pasaypi cayá.
10 Jinantin allpaca mansibädu nunacunap juntam cayan.
Chay mana allincä-laycum allpäpis pasaypi chaqui cayan.
Chunyäcäćhu pastucunäpis lluymi chaquïlun.
Willacücunaca mana allincällamanmi atipacuyalcan;
munayniyu caśhanpis mana allincäta lulanallanpämá cayan.
11 Tayta Diosmi nin:
“Chay willacücunäwan sasirdüticunaca
pasaypi mana allincällacta lulä-camamá cayalcan.
Aśhta alawana wasïćhüpis mana allincällacta lulayätamá talí.
12 Chaynu capäcuśhanpïtamá paycunap
caminuncunapis lluchcallaña canꞌa;
tutapaycäman palpupäcunanpämá tanꞌaycuśhapis capäcunꞌa.
Mućhuycachisha canan timpu ćhämuptin
paycunaman mućhuchicuyta yaꞌami ćhaycachishä.
Yaꞌa Tayta Diosmari niyá.
13 “Samaria malcap willacünincunaćhu
pasaypi millachicuycunactamá licälú:
Taytacha Baalpa śhutinćhümá willacuyalcan;
Israel malcätamá pantälälichin.
14 Jinamanꞌa Jerusalenpa willacünincunaćhüpis
millachicuy lulaycunallactamá licälú;
mansibacuycunaćhu,
articuycunallaćhümá cawsayalcan.
Mana allin luläcunäpa lulaynintam mastá yanapapäcun.
Mana allin lulayninta mayanllanpis
manamá caćhaycapäcunchu.
Yaꞌapá paycuna Sodoma nunacunänümá cayalcan;
chayćhu yaćhäcunaca Gomorraf malcayücunänümá cayalcan” nil.
15 Chaymi chay willacücunäpïta sumä munayniyu Tayta Dios nin:
“Jerusalenćhu willacücunäpïmari jinantin
allpäman millachicuy anlacuna yalülun.
Chaymari ajinjucta micächishä;
bininuyu yacuctam upyächishä” nil.g
16 Sumä munayniyu Tayta Diosmi malcanta nin:
“Willacücunäpa willaculcäśhanta ama cäsucuyalcaychu.
Yanꞌal articunallactamá willacuyalcan.
Śhunꞌunpi yalamuśhancunallactamá nipäcun.
Yaꞌa nishätachu manamá willaculcan.
17 Chay jalutacamäcunätam paycuna nipäcun:
‘Jawca capäcunayquipämi Tayta Dios niyan’ nil.
Lumi śhunꞌun munaśhanta luläcunätam paycuna nipäcun:
‘Ima mana allinpis manamá pasapäcuśhunquichu’ nil.
18 “¿Mayan willacütucüllá Tayta Diospa pacacuynincunacta lisinmá?
¿Mayanllá payta licalatan?
¿Mayanllá yaćhachishanta uyalilatan?
¿Mayanllá sumäta uyaliycul cäsuculatan?
19 ¡Licapäcuy!
Tayta Diospa piñacuyninta;
sumä-sumä walaynin yalämunmá;
sumä-sumä puca waywanümá yalämun.
Mana allin luläcunäpa jananćhümá licalinꞌa.
20 Tayta Diospa piñacuynin manamá
śhaycunꞌachu lluy lulanancäta camacänancama,
śhunꞌunćhu munaśhancunäta lulanancama.
Chaycuna lluy pasäluptinlämá tuquicta tantiapäcunqui.h
21 “Chay willacücunäta mana caćhayaptïpis
quiquillanpïmá willacü cürripäcula.
Imaypis mana limapayaptí
quiquillanpïmá willaculcäla.
22 Sïchuśh yaꞌa caśhäćhu capäcunman cala,
malcäman willacuynïta willaculcanmanćha cala.
Chayćha mana allin puliyninpi,
lulaynincunapi cuticalcämunman cala.
23 “Yaꞌa Tayta Dios ¿sircaćhu
cäcunällapächun cayá imatá?
¿Calućhu cäcunäpäpis manachun
Tayta Diosnin cayá imamá?
24 Mayman pacacuptinpis
¿yaꞌa manachun licayá imamá?
¿Manachun yaꞌa quiquí
jinantin sïlüćhüpis
allpäćhüpis junta cayá imamá?i
Yaꞌa Tayta Diosmari niyá.
25 “Chay willacünu pasachicücunäta yaꞌapa śhutïćhülä:
‘Suyñuynïćhümi nimäla;
suyñuynïćhümi nimäla’ nil articulcäśhanta uyalïlämá.
26 ¿Imaycamamá chay willacücunaca śhunꞌunćhu cä articunallacta willacuyalcanꞌa?
¿Imaycamamá quiquinpa tantiayllancunapi niyalcanꞌa?
27 Chay suyñuśhallancunacta willacuśhanwan ¿malcá yaꞌacta unꞌälälinantachun ashiyan imatá?
¿Awquilluncuna taytacha Baalman muyucalcälil yaꞌacta unꞌälälimäśhantanüchun cananpis unꞌachiyta munayan imatá?
28 “Mayan willacüpis suyñucuśhanta willaycunan captinꞌa willacuchun.
Ñatac yaꞌapa willacuynïta ćhasquiycücá imam rasun cäcällacta willaycuchun.
Awari,
¿päśhawan trïguca chay-niläcamallachun cayan imamá?
Yaꞌa Tayta Diosmari niyá.
29 ¿Yaꞌa Tayta Diospa willacuyniꞌa
manachun ninanu cayan imamá?
¿Yaꞌapa willacuyniꞌa manachun wancactapis
ñutuchï martillunu cayan imamá?
30 “Chaymari willacütucücunäpa cuntran cayá.
Paycunamá Tayta Diospa willacünincunap willacuynincunacta suwacalcälil willacütuculcan.
Yaꞌa Tayta Diosmari niyá.
31 Quiquillanpi mishqui-mishquicta ‘Tayta Diosmi nimäla’ nil willacücunäpa cuntranmi yaꞌa cayá.
32 Chay artish suyñuśhancunallacta willacücunäpa cuntranmi yaꞌa Tayta Dios cayá.
Yanꞌal casquincunawan mana cäcunacta willacuśhancunam malcäta pantachin.
Yaꞌa Tayta Dios manamari imaypis willacunanpä caćhaculächu nïtac niläpischu.
¿Malcäta ima allintamá lulaycälin?
33 “Sïchuśh malcapi waquinnin ütac jucnin willacü ütac jucnin sasirdüti tapucuśhunquiman:
‘¿Imactamá Tayta Dios incargaśhulanqui?’
nil.
Nishuptiquim am ninqui:
‘Amcunam ipinü carga cayalcanqui.
Tayta Diosmi amcunacta alülälishunqui’ nil.
34 Sïchuśh jucnin willacü,
sasirdüti ütac malcapi jucnin ninꞌa:
‘Caymá Tayta Diospa incargun’ nil.
Chaynu willacücäta lluy wasintintam yaꞌa Tayta Dios mućhuycachishä.
35 Amcunañatacmi wawꞌi-caśhayquicunawan,
apanaculcäśhayquicunawan:
‘¿Imanilam Tayta Dios?
¿Imanilmi cuntistamälanchic?’
nil ninaculcanqui.
36 Ñatac llasä ipictanü amañam Tayta Diospa willacuyninta limapäcunquiñachu;
rasunpa llasä ipinü amcunap limayniquicunamari;
manamá yaꞌapa limaynïchu;
amcunamari iwilcälil pursipäla yapaycälinquipis.
37 “Chay willacücätam ninqui:
‘¿Tayta Dios ima nintan?
¿Ima nilmi cuntistämun?’
nil.
38 Niptiquim:
‘Tayta Diospa incargamäśhan llasä ipinümi’ nishuptiquiꞌa yaꞌa Tayta Dios nishätam ninqui:
‘Chaynüta amaña limapäcunquichu’ nil niyalcaptïpis jinallam amcuna limayalcanqui.
39 Chaymi amcunacta wicapälälishayqui.
Amta,
awquilluyquicunacta,
jinaman uycuśhá malcantintam ñawïpïta chincälächishayqui.
40 Amcunacta wiña-wiñaypämi pinꞌayman ćhulaycälishayqui;
imaypis mana unꞌaycuśha cananpämi uyshulächipäcuśhayqui” nil.