8
Tayta Diosmi nin:
“Chay muyun ćhämuptin sipultürapïmi Juda lädup mandacünincunap,
puydïnincunap,
sasirdütincunap,
willacünincunap,
jinaman Jerusalenćhu lluy yaćhäcunäpa tulluncunactapis ćhïnicünincuna julapämunꞌa.
2 Chay tulluncuna chay intïta,
quilläta,
sïlüćhu lluy cäcunäta cuyapäcuśhanpa,
sirbipäcuśhanpa,
tapuculcäśhanpa,
alawapäcuśhanpa ñawquinmá jitalapäcunꞌa.
Paycunap tulluncuna manañamari pallalcuśhachu nï pampaśhachu capäcunꞌa.
Jinantin allpäćhüñamá ismaynu jitalapäcunꞌa.a
3 Mana allin juyu quïdä nunacunaca alapacüluptïmá mayćhu capäculpis cawsaycäta ashinanpïtá wañuycällactaña ashipäcunꞌa.
Yaꞌa sumä munayniyu Tayta Diosmari niyá.
Juchancunapïta mućhuycachinanpämi nin
4 “Jeremias,
yaꞌa Tayta Dios nishäta cay malcäman niycamuy:
“ ‘Mayanpis ¿cućhpälul manachun śhalcun imamá?
¿Caminucta pantälul manachun cutiycamun imamá?
5 Chayurá Jerusalen malca,
¿imapïmá mana allincäpa jinalla puliyalcanqui?
¿Imapïmá cutimuyta mana munapäcunquichu?
¿Imapïmá mana allincällaćhu śhaycapacaycälinqui?
6 Yaꞌa sumätam licayculá,
uyaliyculá;
ñatac mayanllapis tincüllanman limaycü manamá canchu.
Mana allin lulayninpi wanacü manamá pillapis canchu.
Manamá mayanllanpis:
“¿Imactamá lulällá?”
nïllapis canchu.
Lluy-lluymá uman chalaśhallanta lulapäcun;
mana jaquimayu cawallu gïrraman alacacayäcänümari cayalcan.
7 Aśhta liwlishcäpis
yaćhanmi ima timpućhu cutimunantapis.
Cullcupis,
wayanaypis,
chiwacupis
yaćhanmá juc läduman licunan timpuña caśhantapis.
Nunäcunañatacmi ichá yaꞌa Tayta Diosnin
camachishäcunacta nï lisipäcunchu.b
8 “ ‘Chaychun “¿yaćhayniyümi cayalcá.
Tayta Diospa yaćhachicuynintam
uywayalcá” niyalcanquimanlä canpis?
Awari,
artish isquirbïcunämá
yaćhachicuynïcunacta artiman muyülälichin.
9 Chay yaćhaysapacunaca pinꞌayman ćhuläśha,
ćhinaśhyächisha,
ćhänäśhamá quïdapäcunꞌa.
Paycuna Tayta Diospa yaćhachicuyninta
jalutacuyalcalꞌa,
¿ima yaćhayniyümá capäcunman?
10 Chaymari walmincunacta juc wayapacunaman uycüśhä;
ćhaclancunactapis juc lädu nunacunaman uycüśhä.
Paycuna uchuypis jatunpis mana allincäwan
lägacuycunallactamari ashiyalcan.
Willacücunäpis aśhta sasirdüticunäpis
ingañacuycällactañamá jicutayalcan.
11 Malcäpa dañäduncunacta janä-janällantamá jampicaćhaycälin.
Jawcayay manaña cayaptinpis:
“Allin jawcallam imapis cayan” niyalcanmá.c
12 ¿Chay pasaypi millachicuy lulaynincunapïta
pinꞌaculcanchun?
Manamari uchuyllapis pinꞌacuynin canchu;
pinꞌacuy imanuy caśhantapis manamá yaćhapäcunchu.
Chaymi lawćhaycunäcäćhu camacaycüśha capäcunꞌa;
mućhuycachiptí pampaman muyüchisha capäcunꞌa.d
Yaꞌa Tayta Diosmari niyá.
13 “ ‘Awari,
lluytamá pampaman muyüchishä;
jucllay üba lantallaćhüpis manañamá üban quïdaycunꞌañachu;e
ïgus lantacunäćhüpis manañamá
jucllay ïgusllapis quïdaycunꞌañachu.
Lapincunactapis lluymá chaquïchishä.
Lluy uycuśhäcunactapis cutichicuśhämá.
Yaꞌa Tayta Diosmari niyá’ nil.
14 “Niptinmi nunacunaca nipäcunꞌa:
‘¿Imactañamá cayćhu alcayanchic?
Sumä murälläśha malcacunämanña
ayicuśhun,
chayćhu wañumunanchicpä.
Tayta Diosninchic camacämänanchicpäñamari cacuyan.
Paypa cuntran mana allinta lulaśhanchicpïtamá
bininuyu yacuctaña upyächimanchic.
15 Jawca cawsaytam alcalanchic,
ñatac mana allincällamá ćhämumanchic.
Allin sänulla caycuytam alcalanchic,
ñatac sumä manchacuyllamá ćhämumanchic.
16 Ćhïnicücunaca śhacayalcämunñamá.
Cawalluncunap jämaynincunapis Dan lädupi śhamuśhantamá uyaliyanchic.
Sumä-cama cawalluncuna wijijijyaptin
jinantin allpätapis chucchuchinmá.
Śhacayalcämun jinantin allpäta,
chayćhu lluy imapis cäcunäta camacaycümá;
malcactawan chayćhu lluy yaćhäcunäta camacaycümari śhacayalcämun’ ” nil.
17 Tayta Diosmi nin:
“Amcunamanmi
bininuyu culibracunactanu ćhïnicüniquicunacta caćhayämú.
Chaycunacta manamá mayanpis śhaycachinmanchu.
Chaycunamari camacaycälälishunqui” nil.
Juda lädupïtawan Jerusalenpïtam Jeremias sumä llaquicun
18 Má,
sumä llaquicuyní camacäcayämanñamá;
śhunꞌullá pasaypiñamá illacalpuyällan.
19 Malcäpa ayacuyninta mayćhüñapis uyalinchicmá:
“Sionta Tayta Dios caćhaycülunñamá.
Cayćhu manañamá mandacüninchic canñachu” nipäcuśhanta.
Niptinmi Tayta Dios:
“¿Imapïtamá taytachacunacta
alawapäcuśhayquiwan piñachipämanqui?
¿Imapïtamá juc lädu malcacunap mana bälï
taytachancunacta alawapäcuśhayquiwan piñachipämanqui?”
nin.
20 Nunacunäpis nipäcunmi:
“Cusichapis
pasälunñam,
usya timpupis camacälunñam.
Ñatac yaꞌanchicꞌa jinallalämi mana salbaycuśha cayanchic” nil.
21 Chaynu malcamasïcunap llaquicuyninpïtamá yaꞌapis ñacaycú.
Sumä-sumä llaquishamá cayá;
manchacuycäpa ñitïshamari cayá.
22 Galaadćhu ¿manachun balsamu jampillapis can imamá?
¿Chayćhu manachun mayan jampicüllapis can imatá?
¿Imapïñamá malcamasïcuna manaña allinyapäcunchu?