9
Maylä ućhanüpis umallá caycunman;
maylä pucyunüpis ñawillá caycunman.
Chayćha malcamasïcuna wañuśhanpïta
tutay muyun waꞌanäpä caycunman.a
2 Maylä chunyäcäćhu jamaycunäpä chucllá caycunman.
Chayurá malcäta caćhaycülümanñaćh,
malcäpi licümanñaćh.
Paycuna lluypis watica walminüñamá licalïlälin;
lluypis ipanchä-camañamá licalïlälin.
3 Tayta Diosmi nin:
“Cay nunacunaca flïcha ćhächïcänümá
listu-listu cayalcan artincunacta limananpä.
Jinantin malcaćhu artillañamari timpuyan;
rasunca manañamá caycunchu.
Muyun-muyun maspañamá mana allincällactaña lulapäcun.
‘Lisiyacmi’ nilpis manamá lisipämanchu.
4 “Chay apanacuśhayqui nunacunäpi licaculcay.
Wawꞌi-caśhayquicunamanpis ama chalapacuyalcaychu.
Wawꞌi-caśha-pulam ingañanacun;
apanacuśha-pulam tumpanacun.
5 Lluy-lluymá quiquin-pula ingañanaculcan;
manamá jucllayllapis rasuncäta limä canchu.
Articunallacta limananpämá alluncuna ishpisha-ishpisha;
mana allincällacta lulaytamá jicutapäcun.
6 Am Jeremias pasaypi ingañacücunap ćhawpinćhümi yaćhayanqui.
Chaynu ingañacü-cama capäculmi yaꞌacta mana lisïtucalcämanchu.
Yaꞌa Tayta Diosmari niyá.
7 “Chaymari yaꞌa sumä munayniyu Tayta Dios ní:
Cay malcäwan ¿ima mastamá lulaycüman?
Üructanu ninawan pasaycachilmá allin chuyaman muyuycachishä.
8 Paycunap alluncuna wañuchicü flïchanümá cayalcan;
shimincuna ingañacuycunallactamá yaćhapäcun.
Apanacuśhanta janä shimillanwanꞌa
tuqui-tuquillapmi niycälin;
śhunꞌunćhüñatacmi ichá imamanpis palpachiyllacta pinsayalcan.
9 Chaychun ¿mana lawćhaycümanchu imamá?
Chaynu lulä nasyunta
¿manachun cutichicülüman imatá?
Yaꞌa Tayta Diosmari niyá.
10 “Ulꞌucunäpi apalcaćhaypam waꞌaśhä;
chunyäcäćhu cä pastucunäpïmi aya taquillacta taquishä.
Pastucunaca cañäśhañamari cayan;
chayninpa manañamá imapis pulinñachu.
Wäcacunap büyayllantapis manañamá uyalinchicchu;
Pälï pishucunapis munti uywacunapis
chaypïta lluy-lluyñamá ayiculcan.
11 “Jerusalenta muntun śhüyamanmi muyüchishä;
atücunap yaćhananmanmi licalïchishä.
Juda lädućhu malcacunäta pulumächishämá;
jucllay nunallapis manañamá yaćhanꞌañachu” nil.
12 Caycunacta tantiaycunanpä,
¿mayantá yaćhayniyu cayan?
¿Mayantamá Tayta Dios yaćhachila willacunanpä?
Malcaca,
¿imapïmá pampaman muyüchisha cayan?
¿Imapïmá mana mayanpapis pasayta munaśha chunyänüña cayan?
13 Tayta Diosñatacmi niman:
“Caynu pasäla,
uycuśhá camachicuynïta juc läduman caćhaycälälishanpïmá;
chaynütac yaćhachishäcunacta mana cäsuculcal chaymannu mana cawsapäcuśhanpïmá.
14 Aśhwanpam paycuna lumi śhunꞌunpa munaśhallanta lulaculcäla.
Awquilluncuna yaćhachishannümá taytacha Baalpa ipanta liculcäla.
15 Chaymi Israelpa sumä munayniyu Tayta Diosnin ní:
Cay malcacta ćhacćhayä micuytam micächiśhä;
bininuyu yacuctam upyächishä.b
16 Paycunapis nï awquilluncunapis mana lisishan nasyuncunamanmá chiꞌichishä.
Jucllayllapis mana quïdanancamamá ispädawan camacaycünanpä aticaćhachishä” nil.
17 Sumä munayniyu Tayta Diosmi nin:
“¡Sumäta uyalipäcuy!
Wañüśhacunaćhu waꞌapäcü walmicta ayapämuy;
allinnin yaćhänin walmicuna śhapämuchun.
18 Paycuna jucllaña śhapämul yaꞌanchicpi waꞌapäcuchun.
Ñawinćhu wiꞌillaña juntäśha caycuchun;
ñawinpi wiꞌillaña unyaycamuchun.
19 Sion malcaćhu llaqui-llaqui waꞌaśhanta uyalipäcuy:
‘Camacaycüśham cacuyanchic;
sumä-sumä pinꞌaymanmá ćhulämanchic.
Wasinchiccuna pampaman muyüchishamá cacuyan;
cay malcanchicta caćhayculćha ayicuśhun’ nïta” nil.
20 Walmicuna,
Tayta Diospa willacuyninta uyalipäcuy;
paypa nishanta ćhasquiculcay.
Wamla wawiquicunacta waꞌayta yaćhachipäcuy;
apanacuśhayqui walmi-masiquita aya taquicta yaćhachipäcuy.
21 Wasinchicmanmi bintananpa wañuyca yaycämun;
palasyunchiccunamanmi wañuyca ćhämun.
Wawinchiccunactamá caminucunäćhu wañüchin;
müsucunätamá läsacunäćhu camacaycülun.
22 Tayta Diosmi nin:
“Nunacunämi ćhaclacunäćhu uywap
acancunanu wañüśha anćhalapäcunꞌa.
Trïgucta lutuptin,
lutücäpa ipanćhu trïgu
shiwaläcänümi mayanpapis mana pallalcuśha cućhpalapäcunꞌa” nil.
Tayta Diospa yaćhayninmi nunäpa sumä caynin
23 Tayta Diosmi nin:
“Yaćhayniyüca
yaćhayninpïta ama alawacuchunchu.
Munayniyücäpis allin caśhanpïta ama allintucuchunchu.
Alli cäniyücäpis cäninpïta ama alawacuchunchu.
24 Mayanpis alawacuyta munäcá
yaꞌacta lisipämächun,
chaynütac yaꞌalla Tayta Dios caśhäta tantiapäcuchun;
jinaman yaꞌalla cay allpäćhu
llaquipaywan,
tincüllanman,
cällanman lulaycü caśhäpi alawacuchun.c
Cay lulaycunämari śhunꞌüpänu caycun.
Yaꞌa Tayta Diosmari niyá” nil.
25 Tayta Diosmi nin:
“Umri cayninćhu lluy siñalachicüśha ütac mana siñalachicüśha cäcunäta mućhuycachiná timpu śhayämunñamá.
26 Mućhuycachishä Egiptocta,
Judata,
Edomta,
chaynütac Amonpa milaynincunacta,
Moab lädućhu yaćhäcunäta,
chaynütac taytachanta alawaycunanpä ächanta lutucü chunyäcäćhu yaćhäcunätapis.
Chay nasyuncunaćhu yaćhäcunaca mana siñalachicüśha nunacunamá cayalcan;
Israelcunapis śhunꞌunćhu mana siñalachicüśha nunacunamari cayalcan” nil.d