Cawsayninta allinman muyuchinanpämi nin
7
Yaꞌa Jeremiastam Tayta Dios caynu nimäla:
2 “Alawana wasip puncunćhu śhaycuycul cay willacuyta willacamuy:
‘Jinantin Juda lädućhu cäcuna,
alawapäcunayquipä cay puncunpa lluy yaycücuna,
Tayta Dios nishanta uyalipäcuy.
3 Israelpa sumä munayniyu Tayta Diosninmari niyan:
Cawsayniquita,
lulayniquita allichaculcaptiquiꞌa cay allpäćhu cawsachipäcuśhayquim.
4 Ama chalapaculcaychu:
“Cayćhümi Tayta Diospa alawana wasin cayan.
Caymi alawana wasin;
caymari Tayta Diospa alawana wasin” nil artish limaycunämanꞌa.
5 “ ‘Ñatac allin cawsaycälinayquipä chay cawsayniquicunacta,
lulayniquicunacta allinman muyuycälichiy.
Nuna-masiquitapis tincüninman licaycäliy.
6 Chaynütac mana Israel läducunäta,
mana mamayu taytayu cäcunäta,
japanyäśha walmicunäta amaña ñacachipäcuychu.
Jinaman cay sityućhu allin nunacunäta amaña wañuchipäcuyñachu.
Chaynütac quiquiquip mana allinniquipä taytachacunacta amaña alawayalcayñachu
7 Chayurá chaynu cawsaycäliptiquiꞌa awquilluyquicunaman uycuśhá cay allpaćhümari amcunactapis wiña-wiñaypä cawsaycälichishayqui.
8 “ ‘Amcuna chalapacuyalcanqui artish limaycunaman,
rasun mana cäcunämanmari.
9 Amcuna suwacuyalcal,
wañuyalcächil,
mansibacuyalcal,
ingañanayquipä limalicuyalcal,
Baalman insinsiucta cañaycuyalcal,
mana lisishayqui taytachacunacta alawayalcalchun,
10 ¿śhayalcämunquimanlä yaćhanäpä cä wasïman canpis “cayćhuꞌa libriñam cayanchic” nil?
Jinalcul chay imaymana millachicuy lulaycunacta jinalla lulapäcunayquipä libriñam cayanchic ¿niyalcanquilächun imatá?
11 Cay yaćhaná wasïta ¿suwacunap maćhayninpächun licayalcanquiman imamá?a
Chaynüpa licapäcuśhayquitamari yaꞌa licayalcac.
Yaꞌa Tayta Diosmari niyá.
12 “ ‘Canan má,
unaypïta yaćhaśhá Silo nishan malcaman lipäcuy.
Chayćhu Israel malcäpa juchanpïta camacaycüśhätari licaycamuy.
13 Masqui cay mana allin lulayniquicunapi cutipalcul-cutipalcul limapaptïpis manamá uyalicalcämälanquichu.
Maynüpa ayapäcuptïpis manamá limalïtuculcälanquichu.b
Yaꞌa Tayta Diosmari niyá.
14 Cay Silo nishan malcawan lulaśhänümari,
cay alawapämänayqui,
chalapaculcäśhayqui,
jinaman amcunacta awquilluyquicunacta uycuśhá wasiwanpis lulaycuśhä.c
15 Maynümi lluy wawꞌi-caśhancunacta,
Efrainpa lluy milaynincunacta alapacülá,
chaynümá ñawpänïpi calu-calumanlä alapacüśhä’ nil.
16 “Am Jeremias,
cay malcapïta amaña mañacayämaychu.
Paycunapïta amaña ayacayämaychu,
ruygapayämaychu,
nï jicutapayämayñachu.
Yaꞌa manañamari uyaliycuśhayquiñachu.
17 ¿Manachun licanqui paycuna Juda lädup malcancunaćhu lulapäcuśhanta imamá?
¿Manachun licanqui Jerusalenpa cällincunaćhu lulapäcuśhanta imatá?
18 Licayꞌari,
chulincunam yamtacta juntupäcun;
taytancunañatac ninacta latachipäcun;
mamancunañatac arinacta chapupäcund ‘Sïlüpa Maman’e nishan mamachanman tantacunacta uycapäcunanpä.
Chay taytachacunaman jićhaywan uycunacunactalämari yaꞌacta piñachimayninwan uycapäcunpis.
19 Chay lulapäcuśhanwan ¿yaꞌapa mana allinnïpächun lulayalcan imatá?
¿Manachun quiquincunap mana allinninta ashicuyalcan imamá?
Yaꞌa Tayta Diosmi niyá” nil.
20 Chaymi sumä munayniyu Tayta Dios nin:
“Cay sityumanmari sumä piñacuynïta,
rabyacuynïta ćhaycachimuśhä.
Chay nunacunäman,
uywacunäman,
lantacunäman,
ćhaclaćhu talpuycunäman piñacuyní ninanu latäluptin,
manañamá mayanpis manalcachinꞌañachu” nil.
21 Israelpa sumä munayniyu Tayta Diosnin caynümi nin:
“Chay cañaywan uycapämänayquitawan,
lluy uycamänayqui cäcunätapis quiquiquiñari micacäläliy.
22 Awquilluyquicunacta Egiptopi julapämul manamá cañaywan uycamänanpä cäcunäpi nilächu.
Jinaman lluy cañaywan uycunayquipä cäcunäpïtapis imactasi manamá nilächu.f
23 Ñatac awquilluyquicunaman camachilá:
‘Limapäśhäcunacta cäsucalcämaptiquiꞌa yaꞌami Tayta Diosniqui caśhä.
Amcunañatacmi malcá capäcunqui.
Lluy nishämannu cawsaycäliptiquiꞌa ima lulaśhayquićhüpis allinmi caycälinqui’ nil.g
24 “Ñatac paycuná manamari uyalipämälachu nï cäsupämälachu.
Aśhwanpa mana allin lumi śhunꞌunpa munaynintamá lulaculcäla.
Chaynüpamari yaꞌapïta japächaculcul ipanchapämäla.
25 Chaynu capäcula awquilluncuna Egiptopi yalapämuśhanpïta aśhta canancamamá.
Allaycuycäpïmari mana unꞌallal sirbïní willacünïcunacta paycunaman yaꞌa caćhalá.
26 Paycunañatacmi ichá mana uyalicalcämälachu nï cäsucalcämälachu.
Aśhwanpam śhunꞌunta lumiyalcachil awquilluncunapïpis mas piyurlä capäcula.
27 “Am Jeremiasꞌa caycunacta lluymi niycunqui masqui mana uyalïtuculcäśhunayqui captinpis.
Ayaycaćhaypam nimunqui mana cäsuculcänan captinpis.
28 Chayćhümi ninqui:
‘Cay malcam Tayta Diosnin limapäśhanta mana uyaliculcälachu;
allinninpä lawćhaycuśhanta manamá awnipäculachu.
Rasunca amcunaćhu chincacunñamari.
Limayniquicunaćhüpis rasunca manañamá canñachu.
29 Llaquicuypi ächayquita siplay-siplayta lutuculcay.
Chunyä ulꞌucunäćhu llaqui-llaquicta waꞌapäcuy.
Tayta Dios sumä piñäśha cayalñamari ipanchaycul caćhaycälälishunquiña’ ” nil.
30 Tayta Diosmi nin:
“Juda lädup milaynincunamá mana allinta ñawquí lulälälin.
Yaꞌallapä japächäśha cä alawana wasïman millachicuy taytachanta ćhulapäcuśhanwanmá millachicuy anlamanña muyülälichin.
31 Jinaman Ben-hinom pampaćhu cä Tofet nishanćhümi uycuna patactalä śhalcächinpish walaśh wamla chulincunacta cañapäcunanpä.i
Chaycunacta lulananpä yaꞌa manamá imaypis niycümanchu cala;
nïtac pinsayllapis pinsalcümanchu cala.j
32 Chaymi yaꞌa Tayta Dios ní:
Juc muyun manañamá ‘Tofet’ nishañachu canꞌa,
nï ‘Ben-hinom pampa’ nishañachu canꞌa,
sinuꞌa ‘Wañuchinacuśhan pampa’ nishañamari canꞌa.k
Wañücunäta pampananpä manaña captinmari Tofetmanña pampaśha capäcunꞌa.
33 Chay malcaćhu wañücunäta aycha micü wisculcunawan munti uywacunallañamá micapäcunꞌa.
Manañamari mayan manchachïpis canꞌañachu.
34 Juda lädućhu,
Jerusalen malcap cällincunaćhu cushicuypi apalcaćhaycunacta,
asicuycunacta,
casaracuy fistacunacta yaꞌamari chincächishä.l
Jinantin malcamá pasaypi pampaman muyüchisha canꞌa” nil.