Israelcunämi Tayta Diosta ipanchapäcun
“ ‘Tayta Diosmi nin:
Yalpayämi lasacllalä cayal yaꞌapi wañupacuśhayquita,a
imanuypapis śhunꞌüpänu cawsaycuśhayquita;
mana talpuśha cä chunyä chaqui ulꞌucunäpapis
atimäśhayquita yalpayämari.b
3 Chay timpu am israelcunaca yaꞌallapä japächäśhamá capäculanqui.
Wamä cusichänümá amcuna capäculanqui.
Chaymi mayanpis ñacachishüniquicunacta,
mana allin lulaśhanpi tincüninman sumäta mućhuycachilá’ nil.
Yaꞌa Tayta Diosmari niyá” nil.
4 Jacobpa milaynincuna,
Israelpa aylluncuna,
Tayta Diospa willacuyninta uyalipäcuy.
5 Tayta Diosmi amcunacta caynu nishunqui:
“¿Awquilluyquicuna,
yaꞌapi japächacälälinanpä
ima mana allintamá yaꞌaćhu talïlälila?
Paycuna mana bälï taytachacunaman
muyucalcälishanwan mana bälïmanñamá muyülälin.
6 Manañamari imaypis ashipämälañachu:
‘¿Mayćhütan Egiptopi julamäśhanchic Tayta Dios cayan?
¿Mayćhütan imapis mana caśhan chunyä chaqui
ulꞌucunäpa puśhamäninchic cayan?
¿Mayćhütan mayan nunapis mana yaćhaśhan,
pulishan,
wañuylla caśhan allpap puśhamäninchic cayan?’
nil.c
7 “Cay allin allpaman yaꞌamari puśhapämulac;
imaymana allin wayuynincunapi micapäcunayquipä.
Amcunañatacmi ichá yaycuycul pasaypi anlaman allpäta muyülächinqui.
Tücänïtamari millachicuyman muyülächinqui.
8 Sasirdüticunäpis manañamá ashipämälachu
‘¿Mayćhütan Tayta Diosninchic cayan?’
nil.
Camachicuyta yaćhachïcunäpis manañamá lisïtucalcämälachu.
Malcacta puśhaycücunäpis cunträñamá śhalcatityälälila.
Willacünïcunapis taytacha Baalpa śhutinćhüñamá willaculcäla;
chay mana bälï taytachacunap ipantañamá liculcäla.
9 Chaymi cuntrayqui niycuśhayqui;
amcunactapis,
willcayquicunactapis cäraycuśhayquimá.
Yaꞌa Tayta Diosmari niyá.
10 “Má,
lamar patanćhu cä Quitim läduman lilculꞌari licaycälimuy.
Cedar läduman willacüta caćhalculꞌari tuquicta yaćhaycälimuy.
¿Caynu pasaśhannu mayllaćhuꞌa pasalamá?
11 ¿Mayan nasyuncunallá taytachancuna masqui
rasun dios mana cayaptinpis juccunaman muyucalcälilamá?d
Cay malcäñatacmi ichá yaꞌa sumä cä Tayta Diostalä
caćhaycamal mana bälïcunällaman muyucalcälin.
12 Chayta licapäcul sïlucuna,
¡äśhalayllaman camapäcuy!
¡Chucchupäcuy,
llaquiculcay!
Yaꞌa Tayta Diosmari niyá.
13 Chayurá ishcay mana allintamari malcá lulälun:
Cawsä yacucta yaꞌa uycücätalämá caćhaycäläliman;e
jinaman yacucta mana tacyachï laꞌaläśha cäcällamanmá muyucalcälin.
14 “Israelcunaca ¿sirbipacüchun cayalcan imatá?
¿Uyway nunachun näsila imamá?
Chayurá ¿imapïmá waycäśha cayalcan?
15 ¿Imapïmá ćhïnicünincuna liyuncunanu paycunap cuntran muyülïninćhu sumä-sumä apalcaćhayalcan?
¿Imapïmá allpantapis lluy pulumächin?
¿Imapïmá malcancunapis cañaycüśha mana nunayüña cayalcan?
16 Egipto läducunaca Menfis,
Tafnes malcacunapi śhapämulmari,
pinꞌayman ćhulapäcuśhunqui.
17 ¿Chaynu manachun pasaśhulanqui yaꞌa Tayta Diosta caćhaycälälimäśhayquipïta imamá?
¿Chaynu manachun pasaśhulanqui,
allin caminup puśhäniquita unꞌälälishayquipïta imamá?
18 “Canan ¿imactamá julucunqui Egiptoćhu cä
Nilo mayuman lil,
yacunta upyaśhayquiwan?f
¿Imactamá julucunqui Asiria lädućhu cä
Eufratesman lil,
yacunta upyaśhayquiwan?
19 Mana allinniquimá mućhuchishunqui;
cullu linli cayniquimá cunca cuchuyniqui canꞌa.
Chayćhümá Tayta Diosniquita caćhaycuśhayquica,
payta mana manchacuśhayquica mana allinniquipä
ćhacćhä caśhanta licaycunqui.
Yaꞌa sumä munayniyu Tayta Diosmari niyá.
20 “Una-unaypïñamá yüguyquita yaꞌa paquïlá;
ćhänalächishuśhayquita wicapäluptïpis am nilanquimá:
‘Sirbiyta manañam munächu’ nil.
Amꞌa,
ulꞌup altunninćhu-camam,
pallaysapa lantap lulïninćhu-camam
watica walminu mana allinllacta lulalanqui.
21 Allinnin übactanu,
sumänin mujuctanümá yaꞌa talpuyculac.g
Chaynu lulaycuyaptïpis,
¿imanuypamá mana lisisha munti übaman muyülunqui?
22 Masqui achca-achca jabunwan paꞌacuptiquipis,
maynu-maynüpa lijiawan paꞌacuptiquipis,
juchayquip anlan ñawpänïćhu jinallamá caycunꞌa.
Yaꞌa Tayta Diosmari niyá.
23 “Imanuypatá am niyämanquiman:
‘Manamá anlaculächu.
Taytacha Baalcunäta manamari imaypis alawalächu’ nil.
Licacuycuyꞌari,
¿imanuymá cawsayniqui chay pampäćhu cala?
Mana allincunacta lulaśhayquita tantiacuyꞌari.
Amꞌa chalacuyä ćhina camïllu yanꞌal cürricaćhäcänümá cayanqui.
24 Chalacuyä munti ćhina aśhnu ulꞌun-ulꞌun aśhnachicuśhtin cürricaćhäcänümá cayanqui;
ulu aśhnucta ashiyal yanꞌal-yanꞌal licuptin,
¿mayanmá śhaycachinman?
Ulu aśhnuca ashilñatacmi ichá mana ancha ñacanchu;
chalacunan timpućhuꞌa rätullamá talïlun.h
25 Amcuna,
¿imaycamañamá cala ćhaquilla cürricaćhayalcanqui?
¿Imaycamañamá cuncayquipis chaquiyaptin taytachacunacta aticaćhayalcanqui?
Chaynu niptïpis amꞌa:
‘Imanaśhäñamá;
manañam atipämanchu.
Taytachacunäpïtañamá śhunꞌunpis manaña śhunꞌuchu.
Paycunawanñamá licuśhä’ niyanquimari.
26 “Maynümi talïluptin suwaca pinꞌacüśha uyshulan,
chaynümari Israel malcaca,
mandacünincuna,
puydïnincuna,
sasirdütincuna,
willacünincunapis pinꞌayćhu uyshulapäcunꞌa.
27 Amcuna cullüllactamari ‘Anmi taytá canqui’ niyalcanqui.
Lumïtañatacmi ‘Anmi mamá canqui’ niyalcanqui.
Yaꞌactañatacmi ichá manaña licätucul ipanchälälimanqui;
Ñacaycunaćhu cayalcalñatacmi ichá
‘Śhamuyꞌari,
salbaycälillämay’ nicayalcämanquilä canpis.
28 Juda,
¿imapïtá chay lulacuśhayqui taytachayquicunacta mana ayacunquichu?
Malcayquicunanümari achca-achca taytachayquicuna timpuyan.
Paycunari śhapämuchun;
ichapis ñacayćhu cayaptiqui salbaycuśhunquiman.i
29 Amcuna mana allinta cuntrá lulayalcal,
¿imapïmá yaꞌapi quijacuyalcanqui?
Yaꞌa Tayta Diosmari niyá.
30 Amcunap chuliquicunacta yanꞌalñamá asutiyculäpis;
tantiaculcayta manamari munapäcunchu.
Am quiquiquicunamari willacünïcunacta
piña-piña liyunnüpis ispädawan wañülächilanqui.j
31 “Am Israel malca,
cay nishäta sumäta uyalipämay.
¿Amcunapä chunyäcänüchun yaꞌa calá imatá?
¿Pasaypi tutapäśha cäcänüchun yaꞌa calá imamá?
Chayurá,
¿imapïtá nipäcunqui:
‘Libriñamá cayanchic.
Imaypis anman manañamá cutipämuśhäñachu?’
nil.
32 ¿Casaracüśha wamlaca,
tuquish aläjancunapi unꞌälunchun imamá?
¿Casaracuśhan tuquish müdananpïpis unꞌälunchun imatá?
Am malcäñatacmi ichá unayña lluy unꞌälälimanqui.
33 “Waynayquicunacta ashï yalunayquipä,
ishpisha-ishpishamá cacullanqui;
aśhta watica walmicunätapis am yaćhächinquiñamari.
34 Waccha nunacunap,
ima mana allinllactapis lulä nunacunap
yawarninwanmi müdanayquicuna anläśha cayan.
Ima mana allinllacta mana lulayalcaptinpis wañülächilanquimá.
35 Jinayalpis ninquilämá:
‘Ima mana allinllactapis manamá lulalächu.
Tayta Dios yaꞌawan manaćh piñäśhachu cayan’ nil.
Chaynu ima mana allinllactapis
manam lulalächu nishayquipïmi canan cäraycuśhayqui.
36 ¿Imapïtá rätu-rätu jucman-jucman muyuculcunqui?
Asiria lädu pinꞌayman ćhulaśhuśhayquinümá,
Egipto lädupis sumä pinꞌayman ćhulaycuśhunqui.
37 Egiptopïtapis cärayquita chapacuycul
uyshulächishamá cutimunqui.
Chay chalapacuśhayqui nunacunäta
yaꞌa Tayta Diosmari ipanchälú.
Paycuna manañamari imallaćhüpis yanapapäcuśhunquiñachu” nil.