Jeremías
Willacü Jeremiaspi Isquirbishan
1
Caycunam Hilciaspa chulin Jeremiaspa willacuśhancuna.
Paymi Benjamin ayllućhu cä Anatot malcaćhu yaćhä sasirdüticunäpa milaynin cala.a
2 Juda lädućhu Amonpa chulin Josiasb ćhunca quimsayu (13) wata mandacuyaptinmi,
Jeremiasta Tayta Dios willapäla.
3 Josiaspa chulincuna Joacimwanc Sedequiasmi cala.
Chay chulin Joacim Juda läducta mandacuyaptinpis,
jinaman juc chulin Sedequiaspisd ćhunca jucniyu (11) wata Juda läducta mandacuyaptinpis Jeremiasta Tayta Dios jinallam willapäla.
Chay watap picha quillanćhümari Jerusalenćhu cä nunacunaca prïsu puśhaśha capäcula.
Tayta Diosmi willacüninpä Jeremiasta ayan
4 Tayta Diosmi caynu niman:
5 “Mamayquipa patanćhu manaläpis cayaptiquim yaꞌa lisilacña.
Manaläpis näsimuptiquim japächayculacña.
Lluy malcacunäćhu yaꞌapa willacüní canayquipämari unanchayculacña” nil.e
6 Nimaptinmi nilá:
“¡Ay,
Taytallay,
Dios Taytay!
¡Anchap walaśhllalämi cayá!
¡Manalämá limaytapis atipächu!”
nil.
7 Niptïmi Tayta Dios niman:
“Ama ‘anchap walaśhllalämi cayá’ nil niyaychu.
Mayta linayquipä nishämanpis linquim.
Imacta ninayquipä nishactapis ninquimá.
8 Yaꞌami amwan cayá libraycunacpä.
Mayantapis ama manchacuychu.
Yaꞌa Tayta Diosmari niyá” nil.
9 Nilculmi Tayta Dios maquinta shimïman yataycamal niman:
“Yaꞌami shimiquiman limaynïcunacta ćhulaycamú.
10 Licayꞌari,
cananmi ćhulaycamú nasyuncunaca,
mandacücunaca munayllayquićhu capäcunanpä:
waquincunacta chincachinquim,
juccunacta camacaycunquim,
pampamanmi muyuchinqui,
waquincunactañatacmi śhalcachinqui,
tacyaycachinqui” nil.
11 Nilculmi Tayta Dios niman:
“Jeremias,
¿imactam licayanqui?”
nil.
Nimaptinmi:
“Almendro jaćhap pallaynintam licayá” nilá.
12 Niptïmi Tayta Dios:
“Aw,
allintam licayanqui.f
Chaynümari willacuśhäca lulayman jucllaña ćhulaycuśha cananta licapayá” niman.g
13 Chaypïta caśhanñatacmi Tayta Dios niman:
“Canan,
¿imactam licayanqui?”
nil.
Nimaptinmi:
“Timpuyä manca nurti lädupi jićhayämütamari licayá” nilá.
14 Niptïmi Tayta Dios niman:
“Chay nurti lädupïmi sumä ñacaycuna timpumul cay malcaćhu yaćhäcunäman ćhächimunꞌa.
15 Yaꞌa Tayta Diosmari nurti lädu nasyuncunätawan mandacünincunacta ayayächí.
Paycuna śhamulmari Jerusalenpa puncuncunaćhu mandacuyninta tacyaycälichinꞌa.
Chayćhümi Jerusalenpa murällanta,
Juda lädup malcancunactapis lluy camacaycülunꞌa.
16 Yaꞌacta unꞌaycamal taytachacunaman insinsiucunacta cañaycü malcätamari mućhuycachishä.
Awari,
maquinwan lulaśhan taytachacunäta alawäcunätamari camacaycüśhä.
17 “Am Jeremiasñatacmi wiꞌawniquita sumäta watacuycul lluy nishäcäta willacamunqui.
Paycunap puntanćhu ama manchacuychu;
manchacuptiquiꞌa paycunap ñawquinćhümá chucchuchishayqui.
18 Licay,
cananmi sumä murälläśha malcactanu ćhulaycuśhayqui.
Judapa mandacünincunap,
puydïnincunap,
sasirdütincunap jinantin malcap cuntran śhalcuptiqui jïrrupi ütac brunsipih cä paradïructanu yaꞌami śhaycaycachishayqui.
19 Paycuna cuntrayqui pilyapäculpis manamá llallipäcuśhunquichu.
Libraycunacpä yaꞌami amwan cayá.
Yaꞌa Tayta Diosmari niyá” nil.