Taytachacta alawaśhanca waticacuśhannu caśhanpïtam nin
3
Tayta Diosmi nin:
“Má,
juc wayapa walminwan laquinacülunman.
Jinaptin walmica licul juc wayapawan cuscälunman.
Chaynu cayaptin,
¿punta wayapan paywan yapa cuscanmanchun?
¡Manamá!
Yapa cuscaptinꞌa sumä jatun
millachicuymanmi allpäta muyuchinman.a
¿Chaychun amñatac achca waynayquicunawan
waticacuśhayquipïta yaꞌaman cutiycamuyta munayanquiman imatá?
Yaꞌa Tayta Diosmari niyá.
2 Má,
cala ulꞌucunätari sumäta licaycuy;
¿mayllaćhuꞌa manamá mansibaculanquichu?b
Chunyäninćhu täcü Arabia lädu nunacunänümi
täcullal waynayquicunacta alcayculanqui.
Anla mansibacuyniquiwanmari
allpacta millachicuyman muyüchinqui.
3 Chaypa jananmá tamya quillapis manaña canchu;
tamya puꞌuy timpupis chincacunña.
Jinaptinmá waticanüña cayanqui;
mana pinꞌacuyniyu suyla cäramanñamá licalïlunqui.
4 Ayacamanquilämi canpis:
‘Taytallay,
müsu caynïpi anmi
apanacuśhäcac cayanqui’ nil.
5 Nimanquilämi canpis:
‘¿Imaypis piñäśhachun yaꞌawan cayanqui?
¿Imaypis ćhïnipayämanquichun?’
nil.
Chaynu limayalpis lluy mana
allincätamá lulayta jinalla jicutayanqui” nil.
Wanaculcänanpämi nin
6 Chaypïta Josiaspad mandacuyninćhümi Tayta Dios caynu nimäla:
“¿Cullu linli Israel lulaśhanta licalanquichun?
Payꞌa altu ulꞌucunäman lilcul ütac pallaysapa lantacunap lulinninćhümari mansibacun.
7 Yaꞌami pinsalá:
‘Chaycunacta lulaculcul cuticamunꞌaćh’ nil.
Ñatac manamá yaꞌaman cuticamulachu.
Chaynu lulaśhanta mana cäsucü cullu linli ñañan Judamari licala.
8 Chaynütacmi ipanchä Israel mansibacüluptin laquinacuy papilta lulalcul alapacüśhätapis Juda licala.
Chaynu licayalpis ñañan Juda manamá uchuyllapis manchaculachu;
aśhwanpam paypis cullu linlicuycul waticacülun.
9 Awari,
mana imactapis uculmi Juda waticacülun.
Chaynu lumicunacta,
caśhpicunacta alawayninwanmari allpäta millachicuyman muyüchin.
10 Chaynu pasayaptinpis janä śhunꞌullanwanmi cullu linli ñañan Juda cutiycaćhamula;
manamá llapan śhunꞌunwanchu.
Yaꞌa Tayta Diosmari niyá” nil.e
11 Chaypïta yapañatacmi Tayta Dios niman:
“Pasaypi cullu linli Israel jucha lulaśhanpïtapis mas-mastalämi ipanchä Juda lulälun.
12 Chayurá nurti läducta licalcul Israelta nimuy:
“ ‘Yaꞌa Tayta Diosmari niyá:
Cullu linli Israel,
yaꞌaman cuticamuy.
Llaquipayniyu calmi piñacuynïta
nï ćhächishayquichu.
Cuyacuyniyu calmi wiñaypächu
mana piñacüśha cayäśhä.
13 Chay mana allin lulaśhallayquitari awniycuy;
Tayta Diosniquip cuntran śhalcuśhayquita,
pallaysapa lantacunap lulinćhu
mana lisishacunawan mansibacuśhayquita,
jinaman limapäśhacta mana uyalicuśhayquitapis awniycuyꞌari’.
Yaꞌa Tayta Diosmari niyá” nil.
14 Tayta Diosmi nin:
“Cullu linli chulïcuna,
yaꞌaman cuticalcämuy.
Yaꞌamari wayapayqui cayá.
Sionman cutichinäpämi malcapïta-cama jucta aclaycuśhä;
ayllupïta-camañatacmi ishcayta aclaycuśhä.
15 Śhunꞌüpänu cä caminaycütam amcunaman ćhulaycamuśhä.
Paycunam allin tantiaywan yaćhaywan caminaycuśhunqui.
16 Amcuna cay malcäćhu milälälil achca-achcaña cacuyalcal Tayta Diospa limalicuśhan babulninpïtaf manañamá limapäcunquiñachu.
Mayanpis manañamari pinsalcunꞌapischu nï yalpalcunꞌapischu;
manañam watucapäcunꞌachu nï juc babultapis lulapäcunꞌañachu.
Yaꞌa Tayta Diosmari niyá.
17 “Chay timpum Jerusalenta nipäcunꞌa:
‘Tayta Diospa dispächun’ nil.
Tayta Diosta altuman juluycälinanpämari lluy nasyuncunaca Jerusalenman juntunaculcanꞌa.
Pasaypi lumi śhunꞌunpa munayninta manañamari aplanu lulayalcanꞌañachu.
18 “Chay muyuncuna Juda läducunämi Israel läducunäman jucllachacuycul nurti lädu malcapïta cutipämunꞌa.
Awquilluncunaman limalicuśhá allpamanmari cutipämunꞌa.g
19 “Yaꞌami niculá:
Chulïtanümi Israelta licaycuśhä.
Aśhta sumä munapäśhan allpactalämi
jinantin allpäćhu sumä-sumänin
nasyuntalämi uycuśhäpis.
Yaꞌa alcayculá Taytay nimänantam;
imaypis mana unꞌamänantam.
20 Am Israel malcäñatacmi ichá
wayapanta ipanchä walminu ipanchämanqui nil niculá.
Yaꞌa Tayta Diosmari niyá.
21 “Canan,
altunnin chunyä ulꞌucunäćhümi sumä waꞌacuyta uyaliyá;
israelcunämi waꞌaśhtin mañacuyalcan.
Paycuna yaꞌa Tayta Diosta unꞌayculmari
mana allin caminucunaman muyucalcälila.
22 Cullu linli chulïcuna,
yaꞌaman cuticalcämuy.
Mana cäsucuśhayquicunapïta yaꞌami
allinyaycachishayqui” nil.
Niptinmi israelcunaca nipäcun:
“Anmanmi cuticalcämuśhä;
amllamari Tayta Diosllá canqui.
23 Altu ulꞌucunäman yanꞌalpäñamá liyalcá;
ulꞌup puntancunaćhu apalcaćhaśhäcunapis
manañamá imapäpis bälinñachu.
Rasunpa am Tayta Diosllamá
Israelpa salbaycüninca cayanqui.
24 “Millachicuy taytachacunacta alawaśhäwanmi
taytäcuna müsu capäcuśhanpi lluy armaculcäśhancunacta
mana cäman muyülälichí:
uwishnincunacta,
wäcancunacta,
walaśh-wamla chulincunactalä canpis.
25 Uchuylläpïmá canancamapis yaꞌacuna awquillücunapis
am Tayta Diosnïpa cuntran lulayalcá;
Tayta Diosnïpa limapapämäśhanta manamá uyaliculcälächu.
Chaymi pinꞌacüśha capäcuśhä;
pasaypipä uyshulapäcuśhä” nil.