Maynu juchayu capäcuśhantam nipäcun
59
Tayta Diosꞌa salbaycunanpä manamá cutu maquichu;
uyaliycunanpä manatacmá linlinpis upachu.
2 Mana allin lulayniquicunamá
Tayta Diospi amcunacta laquichipäcuśhulanqui.
Juchayquicunapïmari pacacuycul
uyaliycuyta manaña munaśhulanquichu.
3 Amcunap maquiquicuna yawarwan anlatacüśhamá cayan.
Dïduyquicunapis mana allincäwan anläśhamá cayan.
Shimiquicunapis mana allincunallactamá ätuyämun;
alluyquicunapis articunallawan juntäśhamá cayan.
4 Tincüllanman licaycuyta manamá mayanpis mañaculcanchu;
rasuncäwan cäraycü manamá mayanpis canchu.
Mana cäcunaman chalapaculmá articunallacta nipäcun.
Mana allincällactamá patalayalcan;
jinalmi millachicuycunallacta waćhaculcan.
5 Amcuna sumä bininuyu culibraypa luntuncunactamá
üllalayalcanqui;
añärup llicancunallactamá awayalcanquipis.
Chay luntucta mayanpis micücá wañunꞌamá;
ñitïluptinꞌa culibraymi yalämunꞌa.
6 Awaśhan llicaca müdanacta lulanapä manamá bälinchu.
Chayurá lulapäcuśhanwan manamá müdaculcanmanchu.
Lluy lulaynincuna mana allin lulaycunallamari;
maquincunapis juyu lulaycunawan juntäśhamá cayan.
7 Mana allincällamanmá ćhaquinpis pinquiylla pinquiyan;
mana juchayücunäpa yawarninta jićhanallanpämá wañupacuyalcan.
Mana allincällamá pinsayninćhüpis muyuyan;
pulishancunaćhüpis llaqui pulumäśhactamá,
camacaycüśhactamá caćhaycülun.a
8 Jawca cayta manamá mayćhu taliytapis yaćhanchu.
Puliyninćhüpis tincüninman licaycuyꞌa manamá canchu.
Caminuncuna wicsu-wicsumá;
paycunacta atïcunaca jawca cawsayta imaypis manamá talipäcunꞌachu.b
9 Chaymi tincüninman licaycuyca yaꞌanchicpi calućhu cayan;
allinca manamá aśhuycamumanchicchu.
Acchïta ashiycuptinchicpis tutällactamá taliycunchic.
Sumä chipyayä muyunta ashiyculpis yanawyaycällaćhümá puliyanchic.
10 Aplacunänümi pilacunäman chalapacullal puliyanchic;
mana ñawiyünümá tantiayllap liyanchic.
Tutapäcäćhünümi ćhawpi muyun mitcacacuyanchic.
Callpallanchicćhülä cayalmi wañüśhanüña tutapäcäćhu cayanchic.
11 Lluypis ucumälinümi apalcaćhayanchic;
ulpaynümi waꞌayanchic.
Tincüninman licaycuyta alcaycuptinchic manamá ćhämunchu.
Mana juchayüpa licaycuśha cayca yaꞌanchicpïta ayicunmá.
12 Mana allin lulayninchiccunamá Tayta Diospa puntanćhu tawacacälun.
Juchanchiccunamá acusayämanchic.
Mana allin lulayninchiccunamá aticaćhayämanchic;
maynu juchayu caśhanchictamá tantiacunchic.
13 Awari,
Tayta Diosta pasaypi mana cäsuculmi ipanchälunchic;
paypïtam japächacülunchic.
Cuntranmá limalanchic,
śhalculanchic.
Śhunꞌunchicćhu uywaśhanchic articunallactamá limanchicpis.
14 Chaymi tincüninman licaycuyca,
allin lulayca yaꞌacunapi calućhu cayan.
Rasuncäta limä manañamá läsacunäćhu canñachu.
Allincäta limäpis manañamá talicunñachu.
15 Rasunca manañamá maycäćhüpis talicunñachu.
Mana allincäpi japächacücätá imantapis quitälälinmá.
Chaynu allinca manaña caśhanta
licälulmari Tayta Dios piñacüla.
16 Chaycunacta allichaycü mayanllapis
mana captinmi Tayta Dios umallanta aywicun.
Chaymi quiquinña sumä munayninwan salbaycula;
tincüninman cä licaycüninwanmi tacyaycachila.c
17 Tincüninman licaycätam atajachicuctanu ćhulacülun.
Salbaśha caycuycätam cascuctanu umanman ćhulacülun.d
Cutichicü caynintam müdanawannu müdacülun.
Silüsu caynintam catawannu catacülun.
18 Jinaculculmi lulaśhanmannu-cama lluyta uycülunꞌa.
Ćhïnicünincunactam tincüninman-cama cutiycachinꞌa.
Cuntran cäcunätam cutichicülunꞌa;
calu lamar patanćhu cäcunätam mirisïdunta uycülunꞌa.
19 Inti ishpimunanpi aśhta inti jiꞌalpunancamam
Tayta Diosta manchacuywan licaycälinꞌa;
sumä caynintam altuman juluycälinꞌa.
Sumä-sumä yacu śhachimuśhancänülämi
Tayta Dios śhamunꞌa.e
20 Tayta Diosmari nin:
“Sionmanmi salbacüca śhamunꞌa;
Jacobpa milaynincuna mana allinninpi
wanacücunämanmi śhamunꞌa” nil.f
21 Chaynütacmi Tayta Dios nin:
“Paycunaman limalicuśhäca caymi:
Ispiritú amcunawanmi imaypis canꞌa;
yaćhachishäcunapis amcunawanmá caycunꞌa.
Amcunap,
chuliquicunap,
willcayquicunap shiminćhüpis
limayní imaycamapis caycunꞌamá” nil.