¿Mayanllá Tayta Diospa munayninta tantiayculatan?^b

2 Paypa ñawquinmá chaqui allpaćhu

sapichacüśha chillquinu sirbïní wiñaycula.

Manamá tuquillachu nï cuyayllapächu cala.

Mana munapaśhmari cala.

3 Nunacunäpa jamuyäśha,

wicapäśha nunamá cala.^c

Sumä nanayta apaycü,

ancha-ancha ñacaycunacta lisiycü nunamá cala.

Yaꞌanchicꞌa licaytapis manamá munalanchicchu.

Mana licayta munaśhamari cala;

paypïta imapis manamá ucamälanchicchu.

4 Rasunpa paymá mana callpayu cayninchictapis julaycamälanchic.

Nanayninchictapis apaculam.^d

Yaꞌanchicñatacmi pinsalanchic Tayta Dios

chaynu asutishanta,

mućhuycachishanta,

ñacachishanta.

5 Ñatac mana cäsucuśhanchicpïmi pay tucsïsha cala;

mana allin lulayninchicpïmi sumä aꞌaśha cala.

Pay ñacaśhanpïtamari jawcacta cawsaycachimanchic;

payta dañäduśhanpïmari jampïsha caycunchic.^e

6 Uwish pintïshanümá lluy cayälanchic;^f

munaśhanchicćhu-camamá lluy puliculanchic.

Ñatac lluypa juchanchicta paymanmá

Tayta Dios ćhulculcula.

7 Sumä ñacachiptinpis,

usuchiptinpis

pay manamá imallactapis limalculachu.

Wañuchinanman uwishta apaycuyäcänümi apaśha cala.^g

Millwanta lutuptin upälla cäcänümi imactapis mana limalculachu.

8 Yanꞌalpïta tumpalculmi cäraycuśha cala.

Paypïta mayanpis manamá śhalcünin calachu;

mana milayniyu wañuptinpis manamá mayantapis imasi uculachu.

Malcap juchanchicpïmi cay allpäćhu

cawsäcunäpi pay juluśha cala;

cay malcap juchanpïmi wañuchisha cala.^h

9 Payꞌa manam ima mana allinllactapis lulalachu,

nï uchuyllapis artictapis limalculachu.

Chaynu cayaptinpis juyu nunacunäpa ćhawpinćhümá wañülälichila;

mana allin nunacunätawan cuscactamá pampälälila.ⁱ

10 Tayta Diosꞌa ñacaycäwanmari ñacachiyta munala.

Juchanchiccuna-laycu quiquinpa cawsayninta

uycuśhanpïtamari wiña-wiñaypä cawsanꞌa;

milaynincunactapis licaycunꞌamari.

Tayta Diosmi munayninta paywan lulaycunꞌa.

11 Ñacayninpa wayuyninta licalmi sumä cushicunꞌa.

Yaćhayninwanmi chuya sirbïní achca-achcacta

chuyaman muyuycachinꞌa;

paycunap mana allin lulaśhancunactamá apaycunꞌa.

12 Chaymi sumä lisishacunäwan cuscactalä ćhulaycuśha canꞌa;

puydïcunäwanlämi llallishanpi altuman juluycuśhapis canꞌa.

Chaynu caycunꞌa cawsayninta wañuycäcama ćhulaycuśhanpïtamá;

juchasapapä licaśha caśhanpamá.^j

Jinayalcaptinpis mana allin luläcunäpi mañaculmi

lluy juchasapacunäpa juchanta apaycula.