Tayta Diosmi Jerusalenta libraycunanpä nin
52
¡Licaćhacuyña Sion,
licaćhacuyña!
¡Jerusalen,
sumä munaywanña śhalcuy!a
¡Chuya malca,
allinnin müdanayquiwanña ćhulacuy!
¡Mana siñalachicüśhacunaca,
anla nunacunaca manañamá
imaypis yaycamunꞌañachu!
2 ¡Jerusalen,
pulbuyquita tapsicuyña!
¡Mandacunayquipä śhalculcul taycucuycuyña!
¡Prïsuśha cä tuquish Sionpa wamla chulin,
ćhänalächishuśhayquita cuncayquipi wicapayñari!
3 Tayta Diosmi nin:
“Amcuna mana
illayllapämá lanticüśha capäculanqui.
Mana illayllawantacmi canan libraycuśhayquipis” nil.
4 Chaynütacmi Tayta Dios nin:
“Punta timpućhu Egipto nasyunmanmi malcá lila,
chayćhu yaćhamunanpä.
Cananꞌa Asiria läduñamá maquinćhu ñacayächin.
5 Canan ¿imactamá licayá?
¿Malcá imapïmá yanꞌalpïta caśhan prïsu puśhaśha cayalcan?
Maquinćhu cachïcunämari apalcaćhachipäcun;
mana camacayculmá muyun-muyun yaꞌacta jalutacapäman.b
6 Chay muyunćhümi malcá yaꞌacta lisipämanꞌa.
Chayćhümari yaćhapäcunꞌa ‘cayćhümi cayá’ nïca paycunawan caśhäta” nil.
7 Maynu sumä tuquim ulꞌucunäpa śhamul
allin willacuycäta apamü,
jawca cawsayta willacü,
salbacuśha canapä willacü,c
Sionta “Tayta Diosniquiꞌa mandacümi” nïcäpa
śhamuśhanta licaycuy.
8 ¡Malcacta täpäcunaca sumämi apaliyalcan!
Quiquin Tayta Dios Sionman
cutimuśhanta ñawinwan licapäculmá
sumä-sumä apaliyalcan.
9 Tunïsha Jerusalen,
cushicuypïta taquipäcuy;
malcanta Tayta Diosmá cunsuylaycun;
Jerusalenta paymá libraycun.
10 Sumä Chuya munayninta Tayta Diosmá
lluy nasyuncunäman camalaycachin.
Tayta Diosninchic salbaycuśhantamá
jinantin pachaca licapäcunꞌa.
11 ¡Babiloniapïta aśhupäcuy,
aśhupäcuy!
¡Ima anlacunactapis ama yataycapäcuychu!d
¡Chaypïta yalupäcuy!
¡Tayta Diospa Chuya cänincunacta apäcuna chuyanchaculcay!
12 Mana-manachu manamá yalapäcunqui;
imapïpis ayiyänüchu manamá liculcanqui.
¡Tayta Diosmari ñawpäninchicta puntanꞌa!
¡Israelpa Tayta Diosninmari ipanchicta śhamunꞌa!
Tayta Diospa sirbïninpa ñacayninpïmi nin
13 ¡Cayćhümi sirbïní cayan!
Paymá allin caycunꞌa;
altuman juluycuśha,
sumä lisisha,
jatunchaycuśhamá canꞌa.
14 Paypa cäran manañamá cärachu canꞌa;
nunap cäran mayćhu caśhanpis
manaña captinmari licapayllaman achca camapäcunꞌa.
15 Achca nasyuncunam licapayllaman camapäcunꞌa;
mandacücunapis äśhalayllamanmá camapäcunꞌa.
Mayanpis mana willacuśhantamari licapäcunꞌa;
mana uyalipäcuśhantamari tantiapäcunꞌa.e