Tincüllanman cä mandacüca
32
¡Licapäcuy,
tincüllanman licaycü mandacüca śhacayämunñamá!
Puydï yanapänincunapis tincüninman-camamá cäraycälinꞌa.
2 Payꞌa caycunꞌa waywacta atajaycücänümá;
lücu waywapïta pacaycücänümá;
chaqui allpaćhu cä mayunümá.
Chaynütac sumä lupayćhu wancap llantuyninnümari caycunꞌa.
3 Chayurá ñawinwan licäcunaca rasuncäta tantiapäcunꞌañamá.
Linlinwan uyalïcunäpis cäsuculcanꞌañamá.
4 Mana tantiayniyücunäpis allin tantiayniyüñamá caycälinꞌa.
Aclluśhcunäpis tuquicta paćhyachipäculñamá sumäta limapäcunꞌa.
5 Juyu nunacunäpis manañamá “allin nuna” nishañachu capäcunꞌa.
Ingañacücunäpis manañamá “allinpä licaśha nuna” nishañachu capäcunꞌa.
6 Chay juyu nunaca luclu caycunallactamari limapäcun.
Mana allincunallamá śhunꞌunćhüpis muyuyan;
mana allinllactamá yaćhayalcächin Tayta Diosta jalutaculcänanpä.
Micuypi cäcunätapis micanayätamá caćhaycülun;
yacupi cäcunätapis yacunayätamá caćhaycülun.
7 Ingañacücunäpis mana allincunallactamá artincunawan lulapäcun.
Mana allincäman iwipäcunallanpämá limanaculcanpis.
Wacchacunaca tincüninmannu allichaycunanpä ashiycäliptinpis,
artincunawanmá mana allincäman palpachipäcun.
8 Ñatac allin nunacá allin lulaycuytamá imaypis ashiycälin;
paycuná chay allin lulayninćhümari tacyaycälin.
9 ¡Imactapis mana ucü walmicuna śhalcapäcuy!
¡Quiquillayquiman chalapacüśha cä
walmicuna limapäśhäcäta uyalipäcuy!
10 Quiquillayquiman chalapacüśha cä walmicuna
cananpïta,
wata mastam sumä-sumä llaquiculcanqui.
Manañamari üba lantacuna wayunꞌañachu
nï trïgucunapis canꞌañachu.
11 Imapïpis mana llaquicü walmicuna chucchupäcuy;
quiquillayquiman chalapacüśha walmicuna llaquiculcay.
Tuquish müdanayquita juluculcul,
lluchuculcul,
shicacü müdanacunawanñari ćhulaculcay.
12 Chay tuqui-tuqui talpuyniquicunapi,
alli-cama üba lantayquicunapi
maquiquitapis tällalcul-tällalcul llaquiculcay.
13 Ćhaclayquicunaćhu caśhacuna,
caśhayu ulacunallañamá juntäśha wiñanꞌa.
Cushisha cawsayniquicunapis wasiquipi,
malcayquipi chincacunꞌañamá.
14 Murälläśha malcanpis pulumäśhañamá cacunꞌa;
lüyayä malcaca chunyanꞌañamá.
Türricunawan sumä-cama wasicunäpis
munti aśhnucunap maćhaynillanñamá cacunꞌa,
uywacunap cacunallanñamá cacunꞌa.
15 Chaynu caycunꞌa janay pachäpi Tayta Diospa
Ispiritun yaꞌanchicman śhamunancamamá.
Chayćhülämi chunyä chaqui allpaca allin allpaman muyuycunꞌa;
allin allpäñatac sumäcamacta wayuycunꞌa.a
16 Chunyäcäćhüpis tincüninman-cama licaycuycällamari caycunꞌa.
Allin allpaćhüpis cäninman-cama licaycuycällamari caycunꞌa.
17 Tincüninman licaycuycämi jawcayayta wayuycun.
Tincüllanman-cama licaycuycämi jawca cawsaytawan
chalapacuyta wiña-wiñaypä apaycamun.
18 Chayćha malcá jawca cawsayćhu,
chalapacuna sigüru wasićhu
allinllaćhu cawsaycunꞌa.
19 Masqui jinantin munticunäta luntu chincächiptinpis,
masqui malcaca pampaman muyüchisha cayaptinpis,
20 amcunam ichá cushisha allin capäcunqui.
Yacuyü-cama ćhaclayquicunaćhümá talpupäcunqui.
Aśhnuyquiwan wäcayquicunapis
allin pastucunallaćhüñamari micapäcunꞌa.