Israelcunätam libraycun
27
Chay muyun ćhämuptinmi Tayta Dios sumä jatun munayniyu ispädanwan mućhuycachinꞌa lamarćhu cä jatun manchanaśh cawsäcäta,a
culibraynu pitwiypa-pitwil puliyä Leviatantamá wañüchinꞌa.
2 Chay muyunćhümi Tayta Dios ninꞌa:
“Allin bïnu yalamü übas lantapi taquipäcuy.
3 Yaꞌa Tayta Diosmá licaycuyá,
imaypis üba lantäta rïgapayämi.
Mayanpis mana imanaycunanpämi
tutay-muyun ñawilläćhu caycachí.
4 Paywan manamá piñäśhachu cayá.
Caśhacuna,
caśhayu ulacuna
wiñayämüta talïlulmi ichá
lluy camacaycüśhä,
cañaycüśhä.
5 Sïchuśh yanapaycunäta munalꞌa yaꞌamanꞌari cuticalcämuchun.
Awari,
yaꞌawan allinpanacuchun” nil.
6 Śhamü muyuncunäćhu Jacob sapichacunꞌam;
Israel chillquimunꞌam,
waytamunꞌam.
Jinantin allpämanmá wayuynincuna juntaycunꞌa.
7 ¿Israelta Tayta Dios mućhuycachila
ćhïnicünincunacta mućhuchishannüchun imatá?
¿Paycunacta camacaycuśhannüchun camacaycüla imamá?
8 Manamari ćhïnicünincunactanüchu mućhuycachinꞌa;
juc läducunaman prïsu puśhaśha caywanmari yaćhayllap mućhuycachinꞌa;
inti ishpimunan lädupi waywa pücamücänümari apacunꞌa.
9 Jacobpa mana allin lulaynincuna pampachaycuśha cananpä,
juchancuna wicapäśha cananpämi
iscu lumictanu lluy taytachancunaman
uycuna patacninta camacaycülunꞌa;
mamacha Aserap liträtuncunactapis
uchuyllactapis manam caćhaycunꞌachu;
insinsiu cañaycuna pataccunactapis
manamá caćhaycunꞌachu.
10 Alli-cama malcacunäpis pampaman muyüchishamá canꞌa.
Nunacuna yaćhaśhan malcaca caćhaycüśhamá pulumanꞌa;
chayćhu malta wäcacuna jaćhap lapincunallacta micapäcul jitalänallanñamá canꞌa.
11 Chay lantap pallaynincuna chaquïluptinmari
walmicunaca licalilcälimul paquïlälinꞌa yanuculcänanpä.
Chay malca mana tantiayniyu malcamari.
Chaymi lulänin mana llaquipaycunꞌañachu,
nï cuyacuyninta camalaycachinꞌañachu.
12 Chay muyunćhümá trïgucta ïraśhannu Eufrates mayupïta aśhta Egipto mayücama Tayta Dios juntuycunꞌa.
Am israelcuna,
muju aclaśhanümi jucllap-jucllap aclaycuśha capäcunqui.
13 Chay muyunćhümi curnitillacta sumä tucämuptinb Asiria läduman chiꞌisha cäcunaca,
Egipto läduman apäśha cäcunaca cutipämunꞌa.
Jinalmi Jerusalenćhu,
chuya ulꞌućhu Tayta Diosta alawapäcunꞌa.