Asiria nasyunmi Egiptoctawan Etiopiacta maquinćhu cachinꞌa
20
Juc cutićhu Asiria lädup mandacünin Sargonmi pilyänincunap puydïninta caćhala,
Asdod malcacta duyñuchacuycunanpä.
Jinaptinmi chay malcacta llallilcul maquinćhu cachila.
2 Chay timpućhümi Amozpa chulin Isaiasta Tayta Dios nin:
“Shicacü ćhulacuśha müdanayquita julucuy;
ćhaquiquićhu śhucuyniquitapis julucuy” nil.
Niptinmi Isaias juluculcul mana müdanayu,
cala ćhaquilla pulila.
3 Chaypïtam Tayta Dios nin:
“Egiptoctawan Etiopiacta ima pasanantapis licachinanpämi uywayní Isaias mana müdanayu,
cala ćhaquilla quimsa wata pulila.
4 Asiriap mandäninmi Egipto nunacunäta,
Etiopia nunacunäta prïsu apacunꞌa.
Egiptop pinꞌayninpämi müsupis awquishpis mana müdanayu,
mana śhucuyniyu,
cala siquilla apaśha capäcunꞌa.
5 Jinaptinmi Etiopia nasyunman chalapacü Filisteo nunacunaca cärantapis mayman ćhulaytapis nï atipapäcunꞌachu;
Egipto nasyunpi alawacücunaca chucchuyllaman camäśham capäcunꞌa.
6 Chay muyunćhümi lamar patanćhu yaćhä Filisteo nunacunaca nipäcunꞌa:
‘Egiptocta caynu pasayaptinꞌa ¿imanäśhunñamá?
Asiriap mandacüninpi Egipto libraycamänanchictamá alcalanchic’ ” nil.