Babilonia nasyun imanuypis cananpämi nin
13
Amozpa chulin Isaiastam Tayta Dios licachila Babilonia nasyunta ima pasanantapis:a
2 “Pilyä allaycunanpä altu ulꞌup puntanćhu bandiracta aywiy.
Pilyapäcunanpäb cachacucunäta ayaycaćhapäcuy.
Puydïcunap puncunpa yaycapäcunanpä maquiquiwan sïñaśhchapäcuy.
3 Yaꞌa Tayta Diosmi japächacuśhá pilyäcunäta ayächimú.
Awari,
piñacuynïta camalaycachinäpämi
alli-cama pilyänïcunacta ayächimú.
Paycunamari llallishäwan cushiculcanꞌa” nil.
4 Uyalipäcuy,
ulꞌucunäćhümá lüyatityay cacuyan.
Juntunacüśha nasyuncunap,
malcacunap sumä apaliynintari uyalipäcuy.
Sumä munayniyu Tayta Diosmá
pilyäcunäta juntuyan.
5 Calu-calu malcapïta,
cay allpäpa
manyanpïtamá śhacayalcämun.
Chay achca-achca nunancunawan jinantin allpäta
camacaycünanpämari Tayta Dios śhacayämun.
6 ¡Awćhupäcuy!
¡Tayta Diospa sumä munaynin
janayquićhüñamá cacuyan!c
¡Sumä munayniyüca camacaycünanpä śhacayämunñamá!
7 Chaymi manchacuypïta lluy nunacunap liclanpis
mana callpayüña capäcunꞌa;
śhunꞌunpis pasaypiñamá capäcunꞌa.
8 Sumä-sumä manchäśha cayaptinmá
llaquillawan nanayllaña ñitiläcunꞌa.
Waćhacü walmip nanayninnümá nanaynin canꞌa.
Äśhalayllaman camäśhamá
quiquinpula licapänacuylla licapänaculcanꞌa.
9 Licapäcuy,
Tayta Diospa sumä muyunnin janayquićhüñamá cacuyan.
Sumä-sumä piñacuyninwan,
mućhuchicuyninwan,
rabayacuyninwanmi cay allpäpis pasaypi chaqui pulumäśha quïdanꞌa.
Chayćhu lluy cawsä juchasapacunäpis camacaycüśhamá capäcunꞌa.
10 Sïlućhu cä lluy uyllurcunäpis,
lusirucunäpis manamá achquinꞌañachu.
Intïpis yanayäśhañamá ishpimunꞌa;
quilläpis manañamá acchinꞌañachu.d
11 Tayta Diosmi nin:
“Cay jinantin pachäta
mana allin lulayninpïmi mućhuycachishä;
mana allin lulä nunacunätam juchancunapïta camacaycüśhä.
Puydï juyu nunatacücunäpa nunatucuynintamá,
pampaman ćhulaycüśhä.
Puydïtucücunätamá uyshulächishä.
12 Lluy nunacunätamá ashllayllaman muyüchishä;
Ofir lädućhu fïnu ürucunänümá mana taliycuna capäcunꞌa.
13 Sumä munayniyu yaꞌa Tayta Diospa śhunꞌú timpuśhan
muyuncäćhümá sïlüpis chucchunꞌa,
cay pachäpis caśhancäpi cuyunꞌa.
14 “Chaymi aticaćhäśha luychunu
nunacunaca malcanman päliylla pälipäcunꞌa;
mana michïniyu cä uwishnu
ayllunman ayipäcunꞌa.e
15 Mayanpis chaläśha calꞌa camacaycüśhamá canꞌa:
ispädawan wañüchishamá capäcunꞌa.
16 Ñawin licayaptinmá chulincunactapis
pampaman wipyapäcunꞌa wañunancama;
walmincunapis abusäśhamá capäcunꞌa,
wasincunapis lluy suwäśhamá capäcunꞌa.
17 “Má,
Babilonia nasyunpa cuntranmi
Medo nasyunta śhalcachishä.
Paycuna manamá illaytapis nï üructapis uycunayquita munapäcunchu.
18 Müsucunätapis flïchancunawanmi camacaycülunꞌa;
tacsha chulincunactapis manamá pampachaycunꞌachu;
iñachancunactapis manamá llaquipaycunꞌachu.
19 “Lluy nasyunpïpis sumä-sumänin cä Babilonia nasyun,
Caldea läducunäpa sumä aläjanüla cayalpis Sodoma,
Gomorra malcacta chincachishäcänümá Tayta Dios camacaycülunꞌa.f
20 Babiloniaćhu pipis manañamá imaypis yaćhanꞌañachu;g
milaycuna pasaptinpis pulumäśhañamá cacunꞌa.
Carpallaćhu yaćhä pasacü-cama nunacunäpis chayćhu manañamá
carpanta śhalcachipäcunꞌañachu,
nï uwishnincunactapis michiycälinꞌañachu.
21 “Munti uywacunallañamá chayćhu yaćhapäcunꞌa.
Wasincunaćhüpis unchuchucuycunawan
tucucunallañamá yaćhapäcunꞌa;
munti capishcunallañamá paćhcaycaćhapäcunꞌa.h
22 Sumänin wasincunaćhüpis munti
uywacunallamá awćhupäcunꞌa.
Adurnäśha palasyunćhüpis imaymana atücunallañamá yaćhapäcunꞌa.
Babilonia nasyunpa muyunnin jananćhüñamá cacuyan;
manañamari aśhuycachisha canmanchu” nil.