8
Maylä tulïpis canquiman;
mayla mamäpa ñuñunwan ishpïpis canquiman.
Chayurá cällićhu talïlul muchacuycuptí,
manaćhá mayanpis imactapis nimänan canmanchu.
2 Uchuylläpi wiñashá wasïmanćha puśhacucman;
chayćhüćha am yaćhaycachimanquiman.
Yaꞌañatacćha uycucman mishqui aśhnäcunawan
cä bïnucta,
granadillacunap yacunta.
3 Ichü maquiquimanćha umá jawnacuycunman;
allï maquinwanñatacćha macallacaycamanman.
Walaśhca
4 Jerusalen walmicuna,
sumä cuyaśhá
walmïnïta mana licchachinayquipä limaliculcay.
Quiquillanpi lichcanancamari puñucuchun.a
Süta taqui
Apanacuśhancuna taquipäcuśhan
5 ¿Mayanmá chunyäcäpi śhamüca?
¿Mayantá cuyäninpa macallayninćhu śhayämun?
Walaśhca
Mansana lantap siquinćhümi amta lichcachilac.
Chayćhümi mamayqui ishyacuśhulanqui;
chayćhümi mamayqui näsichicuśhulanqui.
Wamlaca
6 Sïlläśhactanu śhunꞌuyquiman ćhulaycallämay;
unanchäśhactanu liclayquićhu uywaycallämay.
Wañuycätanümá sumä-sumä cuyacuycäta atajayta nï atipanchicchu;
sïlacuynin sipultüränümá wiña-wiñaypä.
Cuyacuyninchic quiquin Tayta Dios
walachishan nina mallücänümari.
7 Cuyacuycäta alli-alli yacucunäpis
manamá wañuchinmanchu;
mayucunäpis manamá chincachinmanchu.
Sïchuśh wayapá sumä-sumä cäninwan cuyacuycäta
lantiyta munalꞌa mana allinpä licaśhamá canman.
Apanacuśhancuna taquipäcuśhan
8 Śhullca paninchicpa ñuñun
manalämi camalamunchu.
Paninchicman yaycapacamuptin,
¿imanäśhunćha?
9 Murälla captinꞌa jananmanćha
illaypïta palasyucta śhalcächichwan.
Puncu captinpis cedro ilucunawanćha laꞌaluchwan.
Wamlaca
10 Murällanümá yaꞌa cayá;
ñuñücunapis ishcay türricunanümá cayan.
Chaymi cuyaśhäcäní licamal jawcayayta taliycun.
11 Baal-hamon lädućhümi Salomonpa
üba lantancuna cayan;
chayta täpananpämi nunacunaman uycula.
Paycunañatacmi cusichaćhu walanga (1,000) illayta upäcü cala.
12 Chaynu captinpis yaꞌapamá üba lantaca.
Am Salomonpä walanga (1,000) illaycunaca cachun;
ishcay paćhaccäñatac (200) lantacta täpäcunäpä cachun.
Walaśhca
13 Wirtacunaćhu cuyayllapa cä cuyacuśhá walmillay,
lisinacuśhayquicunam shimiquita uyaliycälin;
yaꞌactapis uyaliycachillämayꞌari.
Wamlaca
14 Cuyaśhäní jucllaña śhacamuy.
Sumä luychunu cürricamuy,
mishqui aśhnä
ulꞌucunapa malta tarushnu śhacamuy.