20
Bïnuca palacuycunamanmá ćhächishunqui,
puꞌuśha aswaca äśhaycaćhaycunamanmá puśhaśhunqui.
Shincäśha nunaca mana tantiayniyümanmá muyun.
2 Mandacücäpa piñacuynin liyunpa sumä apalcaćhayninnümá;
mayanpis piñachïcá wañuynintamá ashicuyan.
3 Pilyapi aśhucü nunaca alawaycuśhamá;
luclüñatacmi ichá pilyucta talcachin.
4 Talpuy timpućhu illa nunaca manamá äracunchu;
cusicha timpućhu ashipacul manañamá talinꞌañachu.
5 Nunap allin limapaynin luli-luli śhunꞌunpi yalamü yacunümá;
ñatac tantiayniyücällamá imanuypa taliytapis yaćhan.
6 Mayanñapis llaquipayniyu capäcuśhantamá alawaculcan;
ñatac ¿mayantá chalapacuna nunactá taliycunman?
7 Allin nunaca chuya allinllamá cawsaycun;
chulincunapis paynu cawsaycälil sumä cushishamá caycälin.
8 Mandäca cäraycunanpä dispächunmanmi taycucuycun;
chayćhu lluy juchacta licayllanwanmá wamälun.
9 Manamá mayanpis ninmanchu:
“Chuya śhunꞌuyümi cá;
mana juchayümi cá” nil.a
10 Ingañacü balansacunacta,
chutayä tupunapä cäcunacta
Tayta Dios millachicunmi.b
11 Walaśhcunäpa imanuy cawsaynin caśhantapis yaćhanchic
tincüninman allin cawsaycuśhanpamá.
12 Quiquin Tayta Diosmi lulaycula
linlinchictapis uyalinapä,
ñawinchictapis licanapä.
13 Puñuycällapi ama wañupacuychu;
chayllaćhu caculꞌa wacchayälunquimá.
Lichcapacuy;
micuyniqui imaypis mana pishinanpä.
14 Lantïcunämi:
“Manam bälinchu,
manam bälinchu” nipäcun;
lantïlulñatacmi ichá lantishanpi alawacun.
15 Yaćhaywan limäcäpa limayninꞌa alli-alli ürupïpis,
alli-cama aläja lumicunapïpis mas-mas ćhaniyümá.
16 Mana lisinacuśhan nunacta garantiyäcätá müdananta chalay;
cutiycachinancama prindacta chalacuycuy.c
17 Artillanwan imactapis taliyca nunacunäpá mishqui-mishquimá;
chaypïtañatacmi ichá shiminćhu awishquin juntäśhanu licalïlälin.
18 Allin limapaycuywanmá ima lulay munaśhayquicunäpis allin caycunꞌa;
allin tantiaywanmá pilyaytapis allaycuna.
19 Waśha limä nunacunacá śhunꞌunćhu imactapis manamá uywacunmanchu;
waśha limäcunäwanꞌa amari jucllachaculcaychu.
20 Taytanta mamanta mana allinpä licäcá,
sumä manchanaśh tutawyäcäćhünümi acchin camacacalpunꞌa.d
21 Yanꞌanülla ima cänintapis talishancá
mana allinćhümá camacan.
22 Ama imaypis:
“Cananmi cutichicüśhä” niyaychu.
Tayta Diosllaman chalapacuy;
paymi salbaycuśhunqui.e
23 Cabal mana cä tupucunacta Tayta Dios millachicunmá;
ingañacü balansacunacta manamá awniycunchu.
24 Tayta Diosmá camachin nunaca imanuy cawsananpä;f
nunaca manamá yaćhacunchu imanuy cawsaynin canantapis.g
25 Sumäta mana tantiacuycul Tayta Diosman limalicuyal
chay mana lulaycuśhancá manamá allinchu.
26 Yaćhayniyu mandacüca chay mana allin nunacunäta trïguctanümá waywächin;
jinalcul aꞌanapäh cä lumiwanmi camacaycülun.
27 Tayta Diosmi nunäpa ispiritunman-cama acchictanu ćhulaycun;
chaymi imanuy śhunꞌun caśhantapis tunänin-tunänin licaycun.
28 Mandacücätamá imaypis cuyacuyca,
chalapacuna cayca,
llaquipayniyu cayca dispächunta tacyaycachin.
29 Müsucunäpa cushicuynin callpanmi;
yaśhacunaca suꞌu uma cayninwanmi altuman juluycuśha capäcun.
30 Sumä asutim mana allincäta jampiycun;
lawćhaycuycämi śhunꞌunta chuyanchaycun.